ސްކޫލްތައް ހިންގަން ގާބިލް މީހުން ނުލިބެނީ މުސާރަ ކުޑަވުމުން - މިނިސްޓަރ

ސްކޫލްތައް ހިންގަން ގާބިލް މީހުން ނުލިބެނީ ޕްރިންސިޕަލުންގެ މުސާރަ ކުޑަވުން ކަމަށް އެޑިއުކޭޝަން މިނިސްޓަރ ޑރ.އައިޝަތު އަލީ ވިދާޅުވެއްޖެއެވެ.

މިނިސްޓަރ މިހެން ވިދާޅުވީ، ބުދަ ދުވަހު ރައްޔިތުންގެ މަޖިލީހުގެ ޖަލްސާގައި މަޑުވަރީ ދާއިރާގެ މެމްބަރު އާދަމް ޝަރީފް ކުރެއްވި ސުވާލަށް ޖަވާބު ދެއްވަމުންނެވެ. މިނިސްޓަރ ވިދާޅުވީ، ސްކޫލްތައް ހިންގަން މީހުން ގެއްލިގެންދަނީ މުސާރަ ކުޑަވުމުގެ ސަބަބުން ކަމަށެވެ. މިކަން ރަނގަޅު ކުރުމަށް މަސައްކަތްތަކެއް ކުރެވެމުން އަންނަ ކަމަށާއި، އޭގެތެރެއިން ކުރެވުނު މަސައްކަތުން އެހެން ރަށަކަށް ދަންޏާ އިތުރު އެލަވަންސް ލިބޭ ގޮތަށް މިހާރު ހަމަޖެހިފައިވާނެ ކަމަށެވެ. ސްކޫލްތައް ހިންގުމަށް ޕްރިންސިޕަލުން ތަމްރީނު ކުރުމުގެ ޕްރޮގްރާމެއް އެންމެ ފަހުން ހިންގާފައިވަނީ، 2011ވަނަ އަހަރުއެވެ. މިނިސްޓްރީގެ ފަރާތުން 2020 ވަނަ އަހަރު، މެލޭޝިއާއަށް މީހުން ފޮނުވައިގެން ތަމްރީނު ކުރުމަށް ހަމަޖެހިފައިވީ ނަމަވެސް ކޮވިޑްގެ ސަބަބުން އެކަން ލަސްވެގެން ދިޔަ ކަމަށާއި، ތަމްރީން ޕްރޮގްރާމަށް ފޮނުވުމަށް މިއަހަރު މީހުން ހޯދުމުގެ މަސައްކަތް ކުރެވިފައިވާ ކަމަށް މިނިސްޓަރު ވިދާޅުވިއެވެ. އަހަރަކު 20 މީހުން ތަމްރީން ކުރުމަށް ނިންމާފައިވާއިރު، އެއް އަހަރު ފަހުން ގާބިލް 20 މީހުން ލިބޭނެ ކަމަށް އުންމީދު ކުރައްވާ ކަމަށް ވެސް ވިދާޅުވިއެވެ.

Advertisement

މިހާރު އެޑިއުކޭޝަން ސިސްޓަމްގެ ތެރޭގައި ދިވެހި 165 ޕްރިންސިޕަލުން އަދި 20 ބޭރު ޕްރިންސިޕްލުން އެބަތިބި ކަމަށާއި، އެކްޓިން ސްކޫލް ހެޑްގެ ގޮތުގައި 28 ދިވެހިން އެބަތިބި ކަމަށް މިނިސްޓަރ ފާހަގަކުރެއްވިއެވެ.

މަޑުއްވަރީ ސްކޫލް ޕްރިންސިޕަލަކު ނެތި ކުރިއަށްދާތީ. ޕްރިންސިޕަލް ހަމަޖެހޭނެ ދުވަހެއް އޮޅުން ފިލުވުމަށް މެމްބަރު ކުރެއްވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ، ޕްރިންސިޕަލް ނެތި ކުރިއަށް ދަނީ 15 އޮގަސްޓުގައި ޕްރިންސިޕަލް އިސްތިއުފާ ދިނުމުން ކަމަށެވެ. މީހަކު ހަމަޖެއްސުމަށް ކުރި މަސައްކަތުން ދެ ފަހަރަކު އިއުލާން ކުރުމުންވެސް ޝަރުތު ހަމަވާ މީހަކު ނުލިބުމުން، ތިންވަނަ އިއުލާނާއެކު މިހާރު މީހަކު ލިބިފައިވާ ކަމަށެވެ. އެ ހަމަޖެހުނު ބޭފުޅާ ރާއްޖެ ވަޑައިގަތުމުން އެ ސްކޫލަށް ފޮނުވޭނެ ކަމަށް މިނިސްޓަރ ވިދާޅުވިއެވެ.

ބައެއް ރަށްތަކަށް ޕްރިންސިޕަލުން ހޯދަން ދަތިކަމަށާއި، ޕްރިންސިޕަލުން ތަމްރީނު ކުރުމަށް މަސައްކަތްތަކެއް ކުރައްވާ ކަމަށް ވިދާޅުވިއެވެ. އެގޮތުން މިހާރު ސިސްޓަމްގައި ތިބި ލީޑިންގ ޓީޗަރުން ފެށިގެން މަތީގެ ޓީޗަރުންނަށް ތަމްރީނު ޕްރޮގްރާމް ތަކެއް ހިންގަމުން އަންނަ ކަމަށެވެ. ވަރަށް ގިނަ ސްކޫލްތަކުގައި މި ޕްރޮގްރާމް ހިންގޭ ކަމަށައި، ތަޖުރިބާ ހޯދުމުގެ ދަތުރުތައްވެސް ކުރިއަށްދާ ކަމަށެވެ.

ވޮޮކޭޝަނަލް އެޑިއުކޭޝަން ފުޅާ ކުރުމަށް މަސައްކަތްތަކެއް ކުރެވި، ކޮންސެޕްޓް ޕޭޕަރ އެކުލަވާލާފައިވާ ކަމަށް މިނިސްޓަރ ވިދާޅުވިއެވެ. ރާއްޖޭގެ ފަސް ސަރަހައްދެއްގެ ތެރެއިން ދެ ސަރަހައްދެއްގައި މަސައްކަތް ފެށިފައިވާ ކަމަށް ވިދާޅުވިއެވެ. އެގޮތުން ފުވައްމުލައް ސިޓީ އަދި ކުޅުދުއްފުށި ސިޓީގައި ވޮކޭޝަނަލް ސެކްޓަރ ގާއިމް ކުރުމަށް ތަކެތި ހޯދަމުން އަންނަ ކަމަށެވެ.

މީގެ އިތުރުން ރާއްޖޭގެ އެކި ކަންކޮޅުތަކުގައި 9 ހަބް ސްކޫލެއް ގާއިމް ކުރެވިގެންދާނެ ކަމަށާއި، ކޮންމެ ސްކޫލެއް ޚާއްސަ ކުރެވޭނީ ވަކި ނުކުޅެދުންތެރި ކަމަކަށް ކަމަށެވެ. އިންކުލޫސިވް އެޑިއުކޭޝަނަށް މީހުން ތަމްރީން ކުރަމުން އަންނަކަން ފާހަގކުރެއްވިއެވެ. އެެގޮތުން މޮޑެލް ސްކޫލްތަކުގައިވެސް މީހުން ތަމްރީން ކުރުން ކުރިއަށްދާ ކަމަށް ވިދާޅުވިއެވެ.

މީހުން ރެކްރޫޓް ކުރާއިރު ފެންވަރު ރަނގަޅު މީހުން ގެނައުމަށް މިސަރުކާރުން އުސޫލަށް ބަދަލު ގެނެސްފައިވާ ކަމަށް ވިދާޅުވިއެވެ. ފުރަތަމަ ތިން މަސްދުވަހު ބެލުމަށްފަހު ފެންވަރަށް ބަލައި ފޮނުވާލަން ޖެހޭ ހާލަތުގައި އަނބުރާ ފޮނުވާލާނެ ކަމަށެވެ. މުދައްރިސުންގެ ދަތިކަން އެންމެ ބޮޑަށް އޮތީ ގުރުއާނާއި، ސެކަންޑްރީ ގްރޭޑް ތަކުގައި ކަމަށާއި، ސްކޮލަރޝިޕަށް ހުޅުވާލުމުންވެސް ކުދިން ކުރިމަތި ނުލާ ކަމަށް މިނިސްޓަރ ވިދާޅުވިއެވެ. ޓީޗަރުން ހޯދުމަށް ކުރަމުން އަންނަ މަސައްކަތުގެ ތެރެއިން ކުރިއަށް އޮތް 10 އަހަރަށް ޕްރޮޖެކްޝަނެއް ހެދި، ކުދިން ހޯދުމުގެ މަސައްކަތް ބާރަށް ކުރިއަށްދާކަމަށް ވިދާޅުވިއެވެ.

މިހާރު ތައުލީމީ ނިޒާމުގައި ތިބީ، 5،807 ދިވެހި ޓީޗަރުންނާއި، 1،708 ބޭރު ޓީޗަރުންގެ އިތުރުން 683 ރިލީފް ޓީޗަރުންނެވެ.