ބީއެމްއެލްއިން ދަނގެތީގައި އޭޓީއެމްގެ ޚިދުމަތް ފަށައިފި

ބޭންކް އޮފް މޯލްޑިވްސް (ބީއެމްއެލް)އިން އދ. ދަނގެތީގައި އޭޓީއެމްއެއް ބަހައްޓައިފިއެވެ.

ބީއެމްއެލްއިން މުޅި ރާއްޖެއަށް ބޭންކިންގ ޚިދުމަތް ފުޅާކުރުމަށް ކުރަމުންދާ މަސައްކަތްތަކުގެ ދަށުން، ދަނގެތީގައި ހުޅުވި ސެލްފް ސަރވިސް ބޭންކިންގ އޭޓީއެމް ސެންޓަރާއެކު، އަމިއްލަ ފަރުދުންނާއި ވިޔަފާރިތަކުން، ފައިސާ ޖަމާކުރުމާއި ފައިސާ ނެގުމުގެ އިތުރުން، ބިލަށް ފައިސާ ދެއްކުމާއި ޓްރާންސްފަރ ކުރުމުގެ ޚިދުމަތް 24 ގަޑިއިރު ލިބިގެންދާނެއެވެ.

މީގެ އިތުރުން، ބީއެމްއެލްއިން ވަނީ އދ. އަތޮޅު މަހިބަދޫގައި އެކުންފުނިން ގާއިމުކޮށްފައިވާ ސެލްފް ސަރވިސް ބޭންކިންގ ސެންޓަރ އަޕްގްރޭޑްކޮށްފައެވެ. އެއަތޮޅުގައި މިހާރު ޖުމްލަ ހަތަރު ރަށެއްގައި އޭޓީއެމްގެ ޚިދުމަތް ބީއެމްއެލްއިން އަންނަނީ ދެމުންނެވެ. މީގެ ތެރޭގައި ހިމެނެނީ މަހިބަދޫ، ދިގުރަށް، ދަނގެތި އަދި މާމިނގިއްޔެވެ.

މުޅި ރާއްޖޭގެ ހުރިހާ ކަންކޮޅުތަކަކަށް ބޭންކިންގެ ޚިދުމަތް ތައާރަފުކުރުމުގެ އަމާޒުގައި ބީއެމްއެލްއިން ކުރަމުން އަންނަ މަސައްކަތުގެ ތެރެއިން، 20 އަތޮޅެއްގައި 35 ބްރާންޗް އަދި 74 ސެލްފް ސަރވިސް ބޭންކިންގ ސެންޓަރ ބީއެމްއެލްއިން ވަނީ ތައާރަފުކޮށްފައެވެ. މީގެ އިތުރުން 135 އޭޓީއެމްއާއި 200ށްވުރެ ގިނަ ކޭޝްއޭޖެންޓުންގެ އިތުރުން، އެންމެ ޒަމާނީ ޓެކްނޮލޮޖީއާއެކު، ބީއެމްއެލްގެ އަމާޒަކީ ވަކިވަކި ފަރުދުންނާއި ވިޔަފާރިތަކަށް ފަސޭހަ ވާނެ ގޮތަށް އެކުންފުނީގެ ޚިދުމަތްތައް ދިނުމެވެ.