އެފްއައިވީބީގެ ބީޗް ވޮލީ ޓުއާ އަންނަ އަހަރު ރާއްޖޭގައި
މުބާރާތް އޮންނާނީ އަންނަ އަހަރުގެ އޮކްޓޯބަރު މަހު 13-16 އަށް
ދާދި ފަހުން ބޭއްވި ގައުމީ ބީޗް ވޮލީ މުބާރާތުގެ ތެރެއިން
ދުނިޔޭގެ ވޮލީބޯޅައިގެ މައި ޖަމުއިއްޔާ، އެފްއައިވީބީން އިންތިޒާމުކޮށްގެން ބާއްވަމުން އަންނަ ބީޗް ވޮލީބޯޅަ ޓުއާގެ މުބާރާތެއް އަންނަ އަހަރު ރާއްޖޭގައި ކުރިއަށްގެންދަން ތާވަލުކޮށްފިއެވެ.
މިއީ މިދިޔަ އޮކްޓޯބަރު މަހުގެ ތެރޭގައި އެފްއައިވީބީގެ ރައީސް އަރީ ގްރާސާ ރާއްޖެއަށް ކުރެއްވި ދަތުރުފުޅުގައި މަޝްވަރާކުރެއްވި ކަމެކެވެ. އެގޮތުން ހޯމަ ދުވަހުގެރޭ އެފްއައިވީބީން އިއުލާންކުރި ކަލަންޑަރުގައިވާ ގޮތުން ބީޗް ވޮލީ ޓުއާގެ މުބާރާތެއް އަންނަ އަހަރުގެ އޮކްޓޯބަރު މަހުގެ 13-16 އަށް ކުރިއަށްގެންދަން ވަނީ ތާވަލުކޮށްފައެވެ. މިއީ އެފްއައިވީބީން ބާއްވާ މި ފަދަ މުބާރާތެއް ރާއްޖޭގައި ބާއްވާނެ ފުރަތަމަ ފަހަރެވެ.
"ރާއްޖެ.އެމްވީ" އަށް މައުލޫމާތުދެއްވަމުން ވީއޭއެމުގެ ރައީސް މުޙައްމަދު ރަނޭޝް ވިދާޅުވީ މި މުބާރާތުގައި ވައިލްޑްކާޑް އެންޓްރީއެއްގައި ރާއްޖޭގެ ކުޅުންތެރިންނަށްވެސް ފުރުސަތު ލިބިގެންދާނެ ކަމަށެވެ. ބީޗް ވޮލީ ޓުއާގައި ފިއުޗާ، ޗެލެންޖާސް އަދި އެލީޓް 16 ގެ ތިން ބައި ކުރިއަށްދާއިރު، ރާއްޖޭގައި ކުރިއަށްދާނީ ޗެލެންޖާސްގެ ބައި ކަމަށްވެސް ރަނޭ ވަނީ ވިދާޅުވެފައެވެ.
ރާއްޖޭގެ އިތުރުން ޗެލެންޖާސް ބައި ދެން ބާއްވާނީ މެކްސިކޯ އާއި، ބްރެޒިލާއި، މިސްރާއި، ޗައިނާ އަދި އޮސްޓްރޭލިއާގައެވެ. މީގެ އިތުރުން އަންނަ އަހަރުގެ ޓުއާގެ މުބާރާތްތައް ދެކުނު އެފްރިކާ އާއި، ޗެކް ރިޕަބްލިކާއި، ލަޓްވިއާ އާއި، ސްވިޓްޒަލެންޑާއި، ޖަރުމަން އަދި ފްރާންސްގައި ކުރިއަށްގެންދިޔުމަށްވެސް ވަނީ ތާވަލުކޮށްފައެވެ. މީގެ އިތުރުން އަންނަ އަހަރުގެ ބީޗް ވޮލީބޯލް ވޯލްޑް ޗެމްޕިއަންޝިޕް ޖޫން މަހު އިޓަލީގެ ރޯމުގައި ކުޅެންވެސް ވަނީ ނިންމާފައެވެ.
އަންނަ އަހަރު ރާއްޖޭގައި ބައިނަލްއަގުވާމީ ބީޗް ވޮލީ މުބާރާތެއް ބާއްވާއިރު، އަރީ ގްރާސާ ރާއްޖެއަށް ކުރެއްވި ދަތުރުފުޅުގައި ވަނީ ރާއްޖޭގެ ބީޗް ވޮލީ ކުރިއަރުވަން ގިނަ މަޝްވަރާތަކެއް ކުރައްވާފައެވެ. އެގޮތުން އެ ދަތުރުފުޅުގެ ތެރެއިން އެފްއައިވީބީއާއެކު ވީއޭއެމުން ވަނީ އެއްބަސްވުމެއްގައި ސޮއިކޮށްފައެވެ. އެ އެއްބަސްވުމުގެ ދަށުން ރާއްޖޭގައި ބީޗް ވޮލީބޯޅަ ކުރިއަރުވަން ދެ އަހަރު ދުވަހުގެ ކޯޗިން ތަމްރީނުކުރުމުގެ ޕްރޮގްރާމެއް ކުރިއަށް ގެންދަން ވަނީ ނިންމާފައެވެ. އަދި ގައުމީ އަންހެން އަދި ފިރިހެން ޓީމުގެ ކުޅުމުގެ ފެންވަރު މަތިކުރުމާއި، ގްރާސްރޫޓުން ފެށިގެން މަތީ ފެންވަރާ ހަމައަށް ބީޗް ވޮލީބޯޅައިން ކުޅުންތެރިން ތަމްރީނުކުރުމުގެ މަސައްކަތްތަކަށް ކުރިއެރުން ހޯދުމަށްވެސް ވަނީ އެއްބަސްވެފައެވެ.
ރާއްޖޭގައި ބީޗް ވޮލީ ފުޅާކުރަން މަސައްކަތްކުރަމުން އަންނައިރު، މީގެ ކުރިން ރާއްޖެ ޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަވަމުން ރަނޭ ވިދާޅުވީ ވީއޭއެމުގެ އަމާޒަކީ ލޮސް އެންޖެލެސްގައި 2028 ވަނަ ބާއްވާ އޮލިމްޕިކް ގޭމްސްއަށް ދިވެހިރާއްޖޭގެ ބީޗް ވޮލީ ޓީމެއް ތައްޔާރުކުރުން ކަމަށެވެ.
