ގަރާޖެއް ނެތި ވެހިކަލް ރަޖިސްޓްރީ ކުރުމުގެ އިސްލާހުގެ ބިލް ބާތިލް ވެއްޖެ
ނުފެންނަ ކަމަށް 43 މެމަބަރުން ވޯޓު ދެއްވި
ހުޅުމާލޭގެ މަގެއްގައި ވެހިކަލް ޕާކް ކޮށްފައި
ގަރާޖެއް ނެތި ހަތަރު ފުރޮޅުލީ އެއްގަމު އުޅަނދު ރަޖިސްޓްރީ ކޮށްދޭ ގޮތަށް ހުށަހެޅި އިސްލާހުގެ ބިލް ބާތިލްވެއްޖެއެވެ.
ބިލަށް ވޯޓަށް އެހުމުން ބިލު ފާސްކުރަން ފެންނަ ކަމަށް އެއް މެމްބަރަކު ވޯޓު ދެއްވިއިރު، ނުފެންނަ ކަމަށް 43 މެމަބަރުން ވޯޓު ދެއްވިއެވެ. ވަކި ގޮތަކަށް ވޯޓު ދެއްވަން ބޭނުން ނުވާ 3 މެމަބަރުން ތިއްބެވިއެވެ. އަނބުރާ ކޮމިޓީއަށް ފޮނުވަން ފެންނަ ކަމަށް 4 މެމްބަރުން ވޯޓު ދެއްވިއިރު، ނުފެންނަ ކަމަށް ވޯޓު ދެއްވީ، 40 މެމްބަރުންނެވެ. ވަކި ގޮތަކަށް ވޯޓު ދެއްވަން ބޭނުން ނުވާ 2 މެމަބަރުން ތިއްބެވިއެވެ. އެއާއެކު ބިލު ބާތިލް ކަމަށްވަނީ ކަނޑައަޅާފައެވެ.
ގަރާޖެއް ނެތި ހަތަރު ފުރޮޅުލީ އުޅަނދު ރަޖިސްޓްރީ ކުރެވޭ ގޮތަށް އެއްގަމު ދަތުރުފަތުރުގެ ގާނޫނަށް މި އިސްލާހު ހުށަހެޅުއްވީ ނޮޅިވަރަމް ދާއިރާގެ މެންބަރު މުހައްމަދު ނަޝީދެވެ. ކޮމިޓީން ނިންމީ، އެ އިސްލާހު ފާސް ނުކުރުމަށާއި، މިހާރު ޕާކްކުރުމަށް ރައްޔިތުންނަށް ދިމާވާ ދަތިތަކާއި ގޮންޖެހުންތައް ހައްލުކޮށްދިނުމަށާއި، އެކަމުގައި ހުރި މާލީ އުދަގޫތައް ފިލުވައިދިނުމަށް ދައުލަތުގެ ކަމާ ގުޅޭ މުއައްސަސާތަކުން އިންތިޒާމުތަކެއް ހަމަޖެއްސުމަށެވެ.
ގާނޫނަށް ހުށަހެޅިފައިވާ އިސްލާހުގައި ބުނެފައިވަނީ، އިންޖީނުލީ އެއްގަމު އުޅަނދު ރަޖިސްޓްރީ ކުރަން ހުށަހަޅާއިރު ގަރާޖެއްގައި އެ އުޅަނދު ބާއްވާނެ ކަމުގެ ލިޔުން ހުށަހެޅުން ލާޒިމެއް ނޫން ކަމަށެވެ.
މި އިސްލާހާ ގުޅޭ ގޮތުން މާލެ ސިޓީ ކައުންސިލްގެ ޚިޔާލު ވެސް ކޮމިޓީން ވަނީ ހޯދާފައެވެ.
ކޮމިޓީން މީގެކުރިން ވަނީ އެ އިސްލާހު ފާސްކުރަން ފެންނަ ކަމަށް ނިންމާފައެވެ. އެކަމަކު މަޖިލީހުގެ ނާއިބުރައީސް އީވާ އަބްދުﷲ ހިމެނޭ ގޮތަށް އެމްޑީޕީގެ ބައެއް މެންބަރުން އެ އިސްލާހަށް ދެކޮޅު ހެއްދެވުމުން އިސްލާހު އަލުން ދިރާސާކުރުމަށް ކޮމިޓީއަށް ފޮނުވީ މިދިޔަ އޭޕްރީލް 29 ވަނަ ދުވަހުއެވެ.
