މީދޫގައި ކެއްކުމުގެ މުބާރާތެއް ބާއްވައިފި
މިމުބާރާތުން 1 ވަނަ ހޯދީ "ރަނި" ޓީމް
މީދޫ "ޗޭނު"ން ބޭއްވި ކެއްކުމުގެ މުބާރާތް
އައްޑޫސިޓީ ގެ އަމިއްލަ ޖަމްޢިއްޔާއެއްކަމަށްވާ މީދޫ އެކުވެރިންގެ ޗޭނުން އިންތިޒާމްކޮށްގެން ކެއްކުމުގެ މުބާރާތެއް ބާއްވައިފިއެވެ. މީދޫގެ 3 ޓީމަކުން ވާދަކުރި މިމުބާރާތްއޮތީ އިއްޔެ މީދޫގައެވެ. މުބާރާތް ކުރިއަށްދިޔައީ ބައިވެރިވި "ރަނި" ޓީމާއި "ހުށިޔާރު" ޓީމާއި "އާހިތަ" ޓީމްގެ މެދުގައެވެ. މިއިން ކޮންމެ ޓީމަކަށް އެއްވަރަކަށް ކާބޯތަކެތި ތައްޔާރު ކުރުމަށް ބޭނުންވާ ސާމާނު ޙަވާލު ކުރުމަށްފަހު އެތަކެތި ބޭނުންކޮށްގެން މެންދުރުގެ ކެއުމެއް ވަނީ ކޮންމެ ޓީމަކުންވެސް ތައްޔާރުކޮށްފައެވެ.
ޓީމްތަކުން ތައްޔާރުކުރި މެންދުރުގެ ކެއުންތަކުގައި ތަފާތު ވައްތަރުގެ ބަތާއި، މަހާއި ކުކުޅުގެ ބާވަތްތަކާއި ސެލެޑްއަދި ޑެޒަޓާއި ޖޫސް ހިމެނެއެވެ. ބައިވެރިން ތައްޔާރު ކުރި މީރު ބުއިންތައް ގިނަ ބައެއްގެ ލޮލުގައި އަޅައިގަތް މިމުބާރާތުގައި ބައިވެރިން ދެއްކި ހުނަރަށްވެސް ގިނަ ބަޔަކު ތަޢުރީފް ކޮށްފައިވެއެވެ. މިމުބާރާތް އިންސާފު ކުރުމުގައި ފަނޑިޔާރުންވަނީ ރަހައިގެ އިތުރުން އުފެއްދުންތެރިކަމާއި، ހުށަހަޅައިދިނުމާއި، ގުޅިގެން މަސައްކަތް ކުރުމާއި އަދި ވަގުތަށް ޙުރުމަތްތެރިކޮށް ހިތި މިންވަރު ބަލާފައެވެ.
މިމުބާރާތުން 1 ވަނަ ހޯދީ "ރަނި" ޓީމެވެ. މިޓީމް 1 ވަނައަށް ދިޔައީ އުފެއްދުންތެރިކަމާއި ހުށަހެޅުމުން ވެސް އެންމެ މަތިން މާކްސް ހޯދައިގެންނެވެ. ދެވަނަ ހޯދި "ހުށިޔާރު" ޓީމު އެމަގާމަށްދިޔައީ އެންމެ މީރު ކެއުން ތައްޔާރުކޮށްގެންނެވެ.
މިމުބާރާތުގެ ފަނޑިޔާރުންގެ ޓީމުގައި އިސްކޮށް ހަރަކާތްތެރިވީ ކެއްކުމުގެ ދާއިރާއިން ގިނަ ތަޖުރިބާތަކެއް ހޯއްދަވާފައިވާ ޝެފް ސަވާދު ޢަބްދުﷲ ދީދީއެވެ. މުބާރާތް އިންސާފް ކޮށްދެއްވުމަށްފަހު ސަވާދު ވިދާޅުވީ މިމުބާރާތުގެ ބައިވެރިންނަކީ ކެއްކުމުގެ ތަޖްރިބާހުރި ބައެއްކަން ތައްޔާރުކުރި ތަކެތީން ދޭހަވިކަމަށާއި ލިބިފައިހުރި މަދު އައިޓަމްތަކުގެ ބޭނުން ކޮށްގެން މީރު ގިނަ ބާވަތްތަކުގެ ކެއުން ތައްޔާރު ކޮށްފައިވާ ކަން ފާހަގަ ކުރެވުނު ކަމަށެވެ.
މިފަދަ މުބާރާތެއް ބޭއްވުމުގެ މަޤްޞަދާއި ބެހޭގޮތުން "ޗޭނު"ގެ ރައީސާ ޝައްފާފު ރިޟްވާނު ވިދާޅުވީ މިއީ ބައިވެރިންގެ މެދުގައި އެކުވެރިކަމާއެކު މަސައްކަތްކުރުމުގެ ރޫޙެއް އާލާކޮށް މިފަދަ ކަންކަމަށް އަހުލުވެރިކުރުވުމުގެ މަޤްޞަދުގައި ބޭއްވި މުބާރާތެއް ކަމަށެވެ.
މީދޫ އެކުވެރިންގެ ޗޭނަކީ މުޖުތަމަޢުގެ ލާބައާއި މަންފާއަށްޓަކައި ގިނަގުނަ ޚިދުމަތްތަކެއް ފޯރުކޮށްދެމުންދާތާ 13 އަހަރަށްވުރެ ގިނަ ދުވަސްވީ މަދަނީ ޖަމްޢިއްޔާއެކެވެ.
