މަހުގެ ހަމަ އަގު ހޯދުމަށް ގިނަ މަސައްކަތްތަކެއް ކުރަންޖެހޭ
ހަމަ އަގު ހޯދުމަށް އެންމެ މުހިންމު ކަމަކީ ކޮލިޓީ ރަނގަޅު ކުރުން
ފިޝަރީޒް މިނިސްޓަރ ހުސައިން ރަޝީދު ހަސަން
މަސްވެރިން ބާނާ މަހަށް ހަމަ އަގު ހޯދައިދިނުމަށް ގިނަ މަސައްކަތްތަކެއް ކުރަން ޖެހޭ ކަމަށް ފިޝަރީޒް އެންޑް އެގްރިކަލްޗަރ މިނިސްޓަރ ޑރ. ހުސައިން ރަޝީދު ހަސަން ވިދާޅުވެއްޖެއެވެ.
ރާއްޖެ ޓީވީއަށް ދިން އިންޓަވިއުއެއްގައި މިނިސްޓަރ ވިދާޅުވީ، މަހަށް ހަމަ އަގު ހޯދަން ބޭނުން ނަމަ އެންމެ އިސްކަމެއް ދޭން ޖެހޭނީ މަހުގެ ކޮލިޓީ ރަނގަޅު ކުރުމަށް ކަމަށެވެ. ސަބަބަކީ ބޮޑު އަގުގައި ބޭރު ގައުމުތަކަށް މަސް ވިއްކޭނީ، ރަނގަޅު ކޮލިޓީގައި، މަސްވެރިން ބާނާ މަސް ކުންފުނިތަކާ ހަމައަށް ވާސިލުވެގެން ކަމަށް ވާތީއެވެ.
މިހާރު ކަންތައް ހިނގަމުންދާ ގޮތަށް ބަލާއިރު، ބައެއް ދޯނި ފަހަރުން މަސް ބޭނުމަށްފަހު ނަގާ ތައްޓު މަތީގައި ބޭއްވުމުގެ ތެރޭގައި މަސްގަނަޑަށް އަނިޔާވެފައި ހުރެއެވެ. މީގެ އިތުރުން މަސް އައިސް ކުރަން ނުލައި މާގިނައިރު އަވީގައި ބެއްވުމުގެ ސަބަބުން މަސް ހޫނުވެ އަވަހަށް ކުނިވުމަށް މެދުވެރިވެއެވެ. މިނިސްޓަރ ވިދާޅުވީ މަހުގެ ހަމައަގު ހޯދަން ބޭނުންނަމަ ފަރުވާތެރިކަމާއެކު މިކަންތައްތައް ރަނގަޅަށް ބެލެހެއްޓުމަކީ މަސްވެރިން އެންމެ ބޮޑަށް ސަމާލުކަން ދޭންޖެހޭ ކަންތައްކަމަށެވެ.
މީގެ އިތުރުން ދަތުރު މަތީގައި މަސް ފިނިކޮށްފައި ބެހެއްޓުމަށް ބޭނުންވާ އައިސް ލިބުމުގައި މަސްވެރިންނަށް ދަތިތަކަކާއި ކުރިމަތިލާން ޖެހިފައިވާ ކަމަށް މިނިސްޓަރ ފާހަގަ ކުރެއްވިއެވެެ. އެގޮތުން، ބޭނުންވާ ވަގުތު އެކަށީގެންވާ ވަރަށް އައިސް ނުލިބުމުގެ މައްސަލަ ހައްލު ކުރުމުގެ ގޮތުން 13 ރަށެއްގައި އައިސް ޕްލާންޓު އެޅުމުގެ މަސައްކަތް މިހާރު ކުރިއަށްދާ ކަމަށް މިނިސްޓަރ ވިދާޅުވިއެވެ. މީގެ ސަބަބުން މިހާރު އައިސް ލިބެން ހުންނަ ވަރަށްވުރެ 400 ޓަނުގެ ކެޕޭސިޓީ އިތުރުވެންދާނެއެވެ.
މަސްވެރިން ބާނާ މަސް ކިރުމަށްފަހު ފައިސާ ނުލިބުމުގެ މައްސަލަ މީގެ ކުރިން ވަނީ ފެންމަތިވެފައެވެ. ނަމަވެސް މިހާރު ވަނީ އެމައްސަލަ ހައްލު ކުރެވިފައެވެ. މީގެ އިތުރުން މަސް ކިރުމަށްފަހު މީގެ ކުރިން ފައިސާ އަތަށް ދެމުން އައި އުސޫލު ބަދަލުކޮށް، މިހާރު ވަނީ އޮޑިވެރިޔާގެ އެކައުންޓަށް ފައިސާ ޖަމާ ކުރެވޭނެ ނިޒާމެއް ގާއިމު ކޮށްފައެވެ.
