"ފަސްޓް ލޭންގުއޭޖް އިންގްލިޝް ޕޭޕަރުގައި އިށީންނަން ބޭނުންވާ ދަރިވަރުންނަށް އެ ފުރުސަތު ފަހިކޮށްދިނުން މުހިންމު"
19 ނޮވެމްބަރު 2021 | ހުކުރު 05:25ދަރިވަރުންގެ ގާބިލުކަން އެކަމުން ދައްކުވައިދޭނެ
ޓޮޕް ޓެން ރަސްމިއްޔާތުގައި އެޑިއުކޭޝަން މިނިސްޓަރ ޑރ. އާއިޝަތު އަލީ ވާހަކަދައްކަވަނީ
ފުރަތަމަ ބަހަކީ އިނގިރޭސި ބަސް ކަމުގައި ދެކިގެން، ފަސްޓް ލޭންގުއޭޖް އިންގްލިޝް ޕޭޕަރުގައި އިށީންނަން ބޭނުންވާ ދަރިވަރުންނަށް އެ ފުރުސަތު ފަހިކޮށްދިނުން މުހިންމުކަމަށް ގަބޫލުކުރައްވާކަމަށް އެޑިއުކޭޝަން މިނިސްޓަރ ޑރ. އާއިޝަތު އަލީ ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ، 2019 ވަނަ އަހަރު ގްރޭޑް 10ގެ ދަރިވަރުން ހާސިލްކުރި ކާމިޔާބީތައް ފާހަގަކުރުމަށް ބުރާސްފަތި ދުވަހުގެރޭ ބޭއްވި "ޓޮޕް ޓެން" ޖަލްސާގައި ވާހަކަދައްކަވަމުންނެވެ.
މިނިސްޓަރ ވިދާޅުވީ ރާއްޖޭގައި އެންމެ ފުރަތަމަ އިނގިރޭސި ކިޔަވައިދެމުން އައިއިރު ރާއްޖޭގެ ދަރިވަރުން އިށީންނަމުން އައީ އިނގިރޭސިވިލާތުގެ ފަސްޓް ލޭންގުއޭޖް އިންގްލިޝް ޕޭޕަރުގައި ކަމަށެވެ. ގިނަ އަހަރުތަކަކަށް މިގޮތަށް ކުރިއަށްގޮސް މިހާރު ދިވެހި ދަރިވަރުން އިށީންނަމުން ދަނީ ސެކަންޑް ލޭންގުއޭޖް އިންގްލިޝް ޕޭޕަރުގައި ކަމަށް މިނިސްޓަރ ވިދާޅުވިއެވެ.
އެހެންނަމަވެސް މިހާރުވެސް ފަސްޓް ލޭންގުއޭޖް އިންގްލިޝް ޕޭޕަރުގައި އިށީންނަން ބޭނުންވާ ދަރިވަރުންނަށް އެކަން ފަހިކޮށްދިނުން މުހިންމު ކަމުގައި ދެކިވަޑައިގަންނަވާކަމަށް މިނިސްޓަރ ވިދާޅުވިއެވެ. އެ ފުރުސަތު ފަހިކޮށްދިނުމަކީ ދަރިވަރުންގެ ގާބިލުކަން ދައްކުވައިދޭނެ ކަމެއް ކަމަށާއި، މިއީ ތޫނުފިލި ކުދިންގެ ކިބައިން ކުރެވޭނެ އުންމީދުތައް މަތިކުރެވޭނެ ކަމެއް ކަމަށް މިނިސްޓަރ ވިދާޅުވިއެވެ.
މީގެ އިތުރުން މިނިސްޓަރ ވަނީ، ދަރިވަރުންނާމެދު މައިންބަފައިންނާއި މުދައްރިސުން ކުރާ އުންމީދަކީ ވަރަށް މުހިންމު އެއްޗެއް ކަމަށް ވިދާޅުވެފައެވެ.
ދަރިވަރުންނަށް ކަންކަން ވާނެކަން މުދައްރިސުންނާއި ބެލެނިވެރިން ގަބޫލުކޮށް އެކަން އެ ކުދިންނަށް ދައްކާނަމަ، އެމީހުންގެ އުންމީދާ ހަމައަށް ވާސިލްވެވޭތޯ ދަރިވަރުން މަސައްކަތްކުރާނެ ކަމަށް މިނިސްޓަރ ވިދާޅުވިއެވެ. ކުއްޖަކު ކިޔެވުމަށް ދެރަވާނެކަމަށް ގަބޫލުކުރާނަމަ ތޫނުފިލި ކުދިންވެސް ނެރޭނީ ދެރަ ނަތީޖާއެއް ކަމަށް މިނިސްޓަރ ވިދާޅުވިއެވެ. އެހެންކަމުން ދަރިވަރުންނާމެދު މުޅި މުޖުތަމައުން ކުރާ އުންމީދުތަކާއި ދެކޭ ގޮތްވެސް މަތިކުރަންޖެހޭކަމަށް މިނިސްޓަރ ވިދާޅުވިއެވެ.
2019 ވަނަ އަހަރު ޖީސީއީ އޯލެވެލްއާއި އެސްއެސްސީ އިމްތިހާނުގައި ރާއްޖެއިން ބައިވެރިވި ދަރިވަރުންގެ ތެރެއިން 419 ދަރިވަރަކު ގަދަ 10ގައި ހިމެނިފައި ވާއިރު، އޭގެ ތެރެއިން 28 ދަރިވަރަކު ގައުމީ ގަދަ 10ގެ އެއްވަނައިގައި ހިމެނުނެވެ. މީގެ އިތުރުން ދުނިޔޭގެ އެއްވަނައިގައި ފަސް ދަރިވަރުން ހިމެނުނު އިރު، ޖުމްލަ 42 ދަރިވަރަކު ދުނިޔޭގެ އެކި ވަނަތަކުގައި ހިމެނުނެވެ. އަދި "ހައި އެޗީވްމަންޓް އެވޯޑް" 11 ދަރިވަރަކު ހާސިލްކުރިއެވެ. އަދި ފަސް ދަރިވަރަކު ވަނީ ދުނިޔޭގެ އެއްވަނަ ހޯދާފައެވެ.
