ޔުނެސްކޯގެ އެހީގައި އެކުލަވައިލި އައިސީޓީ މާސްޓަރ ޕްލޭން އޮތީ ނިމިފައި ކަމަށާއި، އަންނަ ޖަނަވަރީ މަހުގެ ތެރޭގައި، އެ މާސްޓަރ ޕްލޭނަށް އަމަލުކުރަން ފެށޭނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.

ރައީސް މިހެން ވިދާޅުވީ 2019 ވަނަ އަހަރުގެ ސާނަވީ ތައުލީމު ނިންމައި އިމްތިހާނުތަކުން އެންމެ ރަނގަޅު ނަތީޖާ ހޯދި ދަރިވަރުންނަށް އިނާމާއި ހަނދާނީ ލިޔުން ދިނުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ އުނގެނުމުގަޔާއި، އެނޫން ގޮތްގޮތުންވެސް ޚާއްސަ އެހީއަށް ބޭނުން ކުދިން އަޅުގަނޑުމެންގެ ތެރޭގައި އެބަތިބި ކަމަށެވެ. ތަޢުލީމު ހާސިލް ކުރުމުގައިވެސް އެފަދަ ކުދިންނަށް އެހީތެރިކަން ފޯރުކޮށްދިނުމަކީ ސަރުކާރުގެ ޒިންމާއެއް ކަމަށާއި، މި ސަރުކާރުން އުފެއްދި ޑިޕާޓްމަންޓް އޮފް އިންކްލޫސިވް އެޑިޔުކޭޝަންގެ ފަރާތުން އެކަމުގައި ވަރަށް މުހިންމު މަސައްކަތްތަކެއް ކުރަމުން އަންނަ ކަމަށެވެ.

ރައީސް ވިދާޅުވީ ރާއްޖޭގައި ފުރަތަމަ ފަހަރަށް ތައުލީމުގެ ގާނޫނެއް ތަންފީޒު ކުރަން ފެށީ، ހިނގަމުންމިދާ 2021 ވަނަ އަހަރުގެ ތެރޭގައި ކަމަށެވެ. މަތީ ތައުލީމާއި ތަމްރީނުގެ ގާނޫނަށް އަމަލުކުރަން ފެށީވެސް، ހަމަ މި އަހަރުގެ ތެރޭގައި ކަމަށާއި، މިއީވެސް މުޅިން އަލަށް ރާއްޖޭގައި އަމަލުކުރަން ފެށި ގާނޫނެއް ކަމަށެވެ.

ރައީސް ވިދާޅުވީ މި ދެ ގާނޫނުގެ ބޭނުމަކީވެސް، ގާނޫނުއަސާސީން ކަށަވަރުކޮށްދީފައިވާ އުނގެނުމުގެ ހައްގު، ތައުލީމީ ހުރިހާ މަރުހަލާއެއްގައި ފުރިހަމައަށް ކަށަވަރުކޮށްދިނުން ކަމަށެވެ. އެއްވެސް ތަފާތުކުރުމެއްނެތި، ފެންވަރު ރަނގަޅު ތައުލީމާއި ތަމްރީނުދީ، އިސްލާމީ ޢަގީދާއާއި، އިސްލާމީ ތަރުބިއްޔަތު ދެވޭނެ މާހައުލެއް ގާއިމުކޮށްދިނުމަކީވެސް މި ގާނޫނުގެ ވަރަށް މުހިންމު މަގްސަދެއް ކަމަށް ރައީސް ވިދާޅުވިއެވެ. ރައީސް ވިދާޅުވީ ތައުލީމީ ދާއިރާއަށް ޚާއްސަކޮށްގެން، ޔުނެސްކޯގެ އެހީގައި އެކުލަވައިލި އައިސީޓީ މާސްޓަރ ޕްލޭންވެސް މިހާރު އޮތީ ނިމިފައި ކަމަށެވެ. އިރާދަކުރެއްވިއްޔާ، މި އަންނަ ޖަނަވަރީ މަހުގެ ތެރޭގައި، އެ މާސްޓަރ ޕްލޭނަށް އަމަލުކުރަން ފެށޭނެ ކަމަށެވެ.

މީގެ އިތުރުން މިއަހަރުގެ ތެރޭގައިވެސް މުޅިން އައު ކަމެއް ތައުލީމީ ދާއިރާއަށް ތައާރަފް ކުރައްވާ ކަމަށާއި، އެއީ ސެޓެލައިޓް މަފްހޫމުގެ ދަށުން ކިޔަވައިދޭން ފެށުން ކަމަށެވެ. ސްކޫލްގައި ކިޔަވާ އުމުރުގެ ކުދިން މަދުވުމުން، ސްކޫލް ނެތް ތިން ރަށެއްގައި، މި އަހަރުގެ 2 ވަނަ ޓާރމްގައި، މި ޕްރޮގްރާމް ފެށޭނެ ކަމަށެވެ. އެއީ ބ. އަތޮޅު ފެހެންދޫއާއި، ވ. ތިނަދޫއާއި، އެ އަތޮޅު ރަކީދޫއެވެ.

ރައީސް ވިދާޅުވީ އޭރުން އެ ތިން ރަށުގެ ދަރިވަރުން، ކިޔެވުމަށްޓަކައި ފެރީއެއްގައި އެހެން ރަށަކަށް ދިޔުމަށް އުފުލަންޖެހޭ ބުރަ ފިލައިގެންދާނެ ކަމަށެވެ. އަދި އެ ތިން ރަށުގެ ދަރިވަރުންނަށް ކިޔަވައިދޭނީ، މާލޭގެ ހުރަވީ ސްކޫލްގައި ގާއިމުކޮށްފައި ހުންނަ ސެޓެލައިޓް ހަބްގައި ތިއްބަވާ ޓީޗަރުން ކަމަށެވެ.

މިފަދަ މުހިންމު ބަދަލުތައް ތައުލީމީ ދާއިރާއަށް ގެނައުމުގެ ބޭނުމަކީ، ގައުމު ތަރައްގީ ކުރާނެ މީހުން ބިނާކުރުއްވުން ކަމަށް ރައީސް ވިދާޅުވިއެވެ. އަދި ގައުމު ތަރައްގީ ކުރާނެ ގޮތުގެ ވިސްނުން ސިކުނޑީގައި އުފެއްދޭފަދަ، އިލްމީ އަދި ޖިސްމާނީ ގާބިލްކަން ދަރިންނަށް ހޯދައިދެއްވުން ކަމަށެވެ. އަދި އެކަން އިރާދަކުރެއްވިއްޔާ އަޅުގަނޑުމެންނަށް ކާމިޔާބު ކުރެވޭނެ ކަމަށެވެ.