ސާނަވީ އިމްތިހާނުގައި ދުނިޔޭގެ އެއްވަނަ ފަސް ދަރިވަރަކަށް
18 ނޮވެމްބަރު 2021 | ބުރާސްފަތި 21:42ދުނިޔޭގެ އެއްވަނަ ހޯދީ ތަފާތު ފަސް މާއްދާއަކުން
ދުނިޔޭގެ އެއްވަނަ ހޯދި ފަސް ދަރިވަރުން
ދިވެހިރާއްޖޭގައި 2019 ވަނަ އަހަރު ސާނަވީ އިމްތިހާނު ހެދި ދަރިވަރުންގެ ތެރެއިން ފަސް ދަރިވަރަކު ދުނިޔޭގެ ފަޚުރުވެރި އެއްވަނަ ހޯދައިފިއެވެ.
މުޅި ދުނިޔޭގެ އެކި ކަންކޮޅުތަކުން އެތައް ހާސް ދަރިވަރުންނެއް ބައިވެރިވި މި އިމްތިހާނުތަކުގެ ތެރެއިން ރާއްޖޭގެ ފަސް ދަރިވަރުން އެއްވަނަ ހޯދާފައި ވަނީ ތަފާތު ފަސް މާއްދާއަކުންނެވެ. މީގެ ތެރެއިން ދެ ދަރިވަރުންނަކީ އަމީނިއްޔާ ސްކޫލުގެ ދަރިވަރުންނެވެ. އިނާމު ދިނުމުގެ ރަސްމިއްޔާތު މިފަހަރު ބެއްވީވެސް އަމީނިއްޔާ ސްކޫލުގައެވެ.
2019 ވަނަ އަހަރު ޖީސީއީ އޯލެވެލް އާއި އެސްއެސްސީ އިމްތިހާނުގައި ރާއްޖެއިން ބައިވެރިވި ދަރިވަރުންގެ ތެރެއިން 419 ދަރިވަރަކު ގަދަ 10ގައި ހިމެނިފައި ވާއިރު، އޭގެ ތެރެއިން 28 ދަރިވަރަކު ގައުމީ ގަދަ 10ގެ އެއްވަނައިގައި ހިމެނުނެވެ. މީގެ އިތުރުން ދުނިޔޭގެ އެއްވަނައިގައި ފަސް ދަރިވަރުން ހިމެނުނު އިރު، ޖުމްލަ 42 ދަރިވަރަކު ދުނިޔޭގެ އެކި ވަނަތަކުގައި ހިމެނުނެވެ. އަދި ހައި އެޗީވްމަންޓް އެވޯޑު 11 ދަރިވަރަކު ހާސިލްކުރިއެވެ.
ސާނަވީ އިމްތިހާނުގައި 2019 ވަނަ އަހަރު ރާއްޖެއިން ބައިވެރިވީ 4،987 ދަރިވަރުންނެވެ. މީގެ ތެރޭގައި ހިމެނެނީ 2،538 ފިރިހެން ދަރިވަރުންނާއި، 2،449 އަންހެން ދަރިވަރުންނެވެ.
މި އިމްތިހާނު ހެދި ދަރިވަރުންގެ ތެރެއިން ތިން މާއްދާއިން ފާސްވެފައި ވަނީ 67 އިންސައްތަ ދަރިވަރުންނެވެ. އަދި ފަސް މާއްދާއިން ފާސްވި ދަރިވަރުންގެ އަދަދު ވަނީ 68.3 އިންސައްތައަށް އަރާފައެވެ.
