ވޯލްޑް ކަޕުގެ ޖާގައެއް އާޖެންޓީނާއަށް

ފީފާ ވޯލްޑް ކަޕުގެ ދެކުނު އެމެރިކާ ކޮލިފައިންގައި ބުދަ ދުވަހުގެ ފަތިހު ކުޅުނު މެޗުން ބްރެޒިލާ އެއްވަރުކޮށް އަންނަ އަހަރު ގަތަރުގައި ބޭއްވުމަށް ހަމަޖެހިފައިވާ ވޯލްޑް ކަޕުގެ ޖާގައެއް އާޖެންޓީނާއިން ކަށަވަރުކޮށްފިއެވެ.

އާޖެންޓީނާ އަކީ ދެކުނު އެމެރިކާ ބައްރުން ވޯލްޑް ކަޕަށް ކޮލިފައިވި ދެވަނަ ޓީމެވެ. އެގޮތުން މީގެ ކުރިން ބްރެޒިލުން ވަނީ އެ މުބާރާތުގެ ޖާގައެއް ކަށަވަރުކޮށްފައެވެ.

ކޮލިފައިންގައި ބުދަ ދުވަހުގެ ފަތިހު އާޖެންޓީނާ އާއި ބްރެޒިލް ބައްދަލުކުރިއިރު، މި މެޗު ނިމުނީ ދެ ޓީމުންކުރެ ޓީމަކަށް ލަނޑެއް ނުޖެހިއެވެ. އާޖެންޓީނާ އާއި ބްރެޒިލް ބައްދަލުކުރި މެޗު އެއްވަރުވެގެން ނިމުނުއިރު، މި ފަހަރުގެ ކޮލިފައިންގައި މި ދެ ޓީމު އަދި މިހާތަނަށް މެޗަކުން ބަލިވެފައެއް ނުވެއެވެ.

އާޖެންޓީނާގައި ކުޅުނު މެޗުގައި ލަނޑެއް ޖަހަން ދެ ޓީމަށްވެސް ރަނގަޅު ފުރުސަތުތަކެއް ލިބިގެންދިޔައިރު، މެޗުގެ ކުރީކޮޅު ބްރެޒިލުގެ ވިނީޝިއުސް ޖޫނިއާއަށް ވަނީ ރަނގަޅު ފުރުސަތެއް ލިބި ބޭކާރުވެފައެވެ. އަދި ފުރަތަމަ ހާފު ނިމެން ގާތް ވެފައި ވަނިކޮށް އޭރިއާ ބޭރުން އާޖެންޓީނާގެ ރޮޑްރިގޯ ޑެ ޕޯލް ފޮނުވާލި ނުރައްކާތެރި ހަމަލާއެއް ބްރެޒިލުގެ ގޯލްކީޕަރު އެލިސަން ބެކާ ވަނީ ދިފާއުކޮށްފައެވެ.

އަދި މި މެޗުގެ ދެވަނަ ހާފުގައި ބްރެޒިލުގެ ފްރެޑް ފޮނުވާލި ހަމަލާއެއް ގޯލުގެ ހުރަސް ދަނޑިއަށް އަމާޒުވިއިރު، މެޗު ނިމެން ގާތް ވެފައި ވަނިކޮށް އޭރިއާ ބޭރުން އާޖެންޓީނާގެ ކެޕްޓަން ލިއޮނެލް މެސީ ފޮނުވާލި ހަމަލާއެއްވެސް ބްރެޒިލުގެ ގޯލްކީޕަރު އެލިސަން ވަނީ ހުއްޓުވާފައެވެ.

މި ނަތީޖާއާއެކު އާޖެންޓީނާއަށް ވޯލްޑް ކަޕުގެ ޖާގައެއް ކަށަވަރުވީ ބުދަ ދުވަހުގެ ފަތިހު ކުޅުނު މެޗުން ޗިލީ އަތުން 2-0 ގެ ނަތީޖާއަކުން އެކުއެޑޯ މޮޅުވުމުންނެވެ.

ދެކުނު އެމެރިކާ ކޮލިފައިންގެ ގަދަ ހަތަރު ޓީމަށް ވޯލްޑް ކަޕުގެ ޖާގަ ލިބޭއިރު، ކޮލިފައިންގެ އެއްވަނައިގައި ބްރެޒިލް އޮތީ ކުޅުނު 13 މެޗުން ލިބުނު 35 ޕޮއިންޓާއެކުއެވެ. ދެވަނައިގައި އޮތް އާޖެންޓީނާއަށް 13 މެޗުން 29 ޕޮއިންޓް ލިބިފައިވާއިރު، ތިންވަނައިގައި އޮތް އެކުއެޑޯ އަށް 14 މެޗުން ވަނީ 23 ޕޮއިންޓް ލިބިފައެވެ. އަދި ހަތަރުވަނައިގައި ކޮލަމްބިއާ އޮތީ 14 މެޗުން 17 ޕޮއިންޓާއެކުއެވެ.