ނޯވޭ ބަލިކޮށް ނެދަލެންޑްސް ވޯލްޑް ކަޕަށް

ފީފާ ވޯލްޑް ކަޕުގެ ޔޫރަޕް ކޮލިފައިންގައި އަންގާރަ ދުވަހުގެރޭ ކުޅުނު މެޗުން ނޯވޭ ބަލިކޮށް އަންނަ އަހަރު ގަތަރުގައި ބޭއްވުމަށް ހަމަޖެހިފައިވާ ވޯލްޑް ކަޕަށް ނެދަލެންޑްސް ކޮލިފައިވެއްޖެއެވެ.

ކޮލިފައިންގެ ގްރޫޕް ޖީގައި ހިމެނޭ ނެދަލެންޑްސްއިން ވޯލްޑް ކަޕުގެ ޖާގައެއް ހޯދީ ނޯވޭ އަތުން 2-0 ނަތީޖާއަކުން މޮޅުވެގެންނެވެ.

ނެދަލެންޑްސްގައި ކުޅުނު މި މެޗުގައި ފޯރިގަދަ ކުޅުމެއް ފެނިގެންދިޔައިރު، މި މެޗުގައި ނެދަލެންޑްސްއިން ދެ ލަނޑުވެސް ޖަހާފައިވަނީ މެޗުގެ ފަހު ވަގުތުގައެވެ. އެގޮތުން މެޗު ނިމެން ހަ މިނެޓަށް ވެފައި ވަނިކޮށް ނެދަލެންޑްސްއިން ލީޑު ނެގިއިރު، މި ލަނޑު އެ ޓީމަށް ކާމިޔާބުކޮށްދިނީސްޓީވެން ބާގްވެއިނެވެ. އަދި މެޗުގެ އިތުރު ވަގުތުގައި ނެދަލެންޑްސްއަށް ލީޑު ފުޅާކޮށްދިން ލަނޑު ކާމިޔާބުކޮށްދިނީ މެމްފިސް ޑިޕާއިއެވެ.

މި މޮޅާއެކު ގްރޫޕް ޖީގެ އެއްވަނަ ނެދަލެންޑްސްއިން ހޯދީ ކުޅުނު 10 މެޗުން ލިބުނު 23 ޕޮއިންޓާއެކުއެވެ. މި ގްރޫޕުގެ ދެވަނަ ލިބުނީ 10 މެޗުން 21 ޕޮއިންޓް ހަމަކުރި ތުރުކީއަށެވެ. އެއާއެކު ތުރުކީ ވާދަކުރާނީ ޕްލޭއޮފް ބުރުގައެވެ. އަދި ނެދަލެންޑްސް އަތުން ބަލިވި ނޯވޭ ވަނީ ވޯލްޑް ކަޕަށް ކޮލިފައިނުވެ ކަޓާފައެވެ. އެ ޓީމު ތިންވަނައިގައި އޮތީ 10 މެޗުން 18 ޕޮއިންޓާއެކުއެވެ.

އަންނަ އަހަރުގެ ވޯލްޑް ކަޕުގެ ޖާގައެއް ނެދަލެންޑްސްއިން ހޯދިއިރު، އެ ގައުމުން އެންމެ ފަހުން ވޯލްޑް ކަޕް ކުޅުނީ ބްރެޒިލުގައި 2014 ވަނަ އަހަރު ބޭއްވި މުބާރާތުގައެވެ. އޭރު ނެދަލެންޑްސްގެ ކޯޗަކަށް ހުރީ މިހާރުވެސް އެ ޓީމުގެ ކޯޗުގެ މަގާމުގައި ހުރި ލުއީ ވެން ހާލެވެ. އޭނާ ވަނީ އެ ފަހަރުގެ ވޯލްޑް ކަޕުގެ ސެމީ ފައިނަލަށް ނެދަލެންޑްސް ގެންގޮސްދީ، އެ މުބާރާތުގެ ތިންވަނަ ހޯދާފައެވެ.

އެކަމަކު އެ މުބާރާތަށްފަހު ވެން ހާލް ނެދަލެންޑްސްގެ ކޯޗުކަން ދޫކޮށްލިއިރު، އޭނާ އަލުން ނެދަލެންޑްސްއާ ހަވާލުވީ މިދިޔަ އޯގަސްޓް މަހުގެ ތެރޭގައެވެ. އަން އަހަރުގެ ވޯލްޑް ކަޕުގެ ނިޔަލަށް ނެދަލެންޑްސްގެ ކޯޗުގެ މަގާމާ ވެން ހާލް ހަވާލުވިއިރު، މިއީ ނެދަލެންޑްސްގެ ކޯޗުގެ މަގާމާ އޭނާ ހަވާލުވި ތިންވަނަ ފަހަރެވެ.

ވޯލްޑް ކަޕަށް ނެދަލެންޑްސް ކޮލިފައިވިއިރު، މިހާތަނަށް ޖުމްލަ 13 ގައުމެއް ވަނީ މި މުބާރާތަށް ކޮލިފައިވެފައެވެ. އޭގެ ތެރެއިން 10 ގައުމަކީ ޔޫރަޕުގެ ގައުމުތަކެވެ.