ރިސޯޓު ހެދުމަށް އެކި ފަރާތްތަކަށް ދެވިފައިވާ ރަށްތަކުގެ ތެރެއިން ރިސޯޓު ނުހަދައި ހުރި ރަށްތައް ރިސޯޓުގެ ގޮތުގައި ތަރައްގީ ކުރުމަށް އިންވެސްޓަރުން ހޯދުމުގެ ގިނަ މަސައްކަތް ކުރަމުން އަންނަ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ރިސޯޓުތައް ތަރައްގީ ކުރުމަށް ފައިސާ ހޯދަން ވޯލްޑް ބޭންކާއި މަޝްވަރާ ކުރެއްވި ކަމަށް މީގެ ކުރިން ފިނޭންސް މިނިސްޓަރ އިބްރާހިމް އަމީރު ވިދާޅުވިއެވެ. ނަމަވެސް މިނިސްޓަރ މައުސޫމް ވިދާޅުވީ ވޯލްޑް ބޭންކުން ފަންޑު ލިބިއްޖެނަމަ އެބޭނުން ކުރާނީ މުޅި ފަތުރުވެރިކަމުގެ ސިނާއަތު އިތުރަށް ތަރައްގީ ކުރުމަށް ކަމަށެވެ. އެގޮތުން ސިނާއަތުގެ އޮނިގަނޑު ހަރުދަނާ ކުރުމަށް ޚާއްސަ އިސްކަމެއް ދެއްވާނެ ކަމަށް މިނިސްޓަރ މައުސޫމް ވިދާޅުވިއެވެ.
ރާއްޖޭގައި ރިސޯޓު ތަރައްގީ ކުރުމަށް ޖުމްލަ 108 ފަރާތަކަށް ވަނީ އެކި ރަށްތައް ދޫކުރެވިފައެވެ. މި ރަށްތަކުގައި ރިސޯޓު ތަރައްގީ ކުރުމަށް އިންވެސްޓަރުން ހޯދަން ޚާއްސަ ފޯރަމެއް މިއަންނަ މަހު ދުބާއީގައި ބޭއްވުމަށް ހަމަޖެހިފައިވާ ކަމަށް މިނިސްޓަރ މައުސޫމް ވިދާޅުވިއެވެ. މިނިސްޓަރ ވިދާޅުވީ މިރަށްތަކުގެ ތެރެއިން އިންވެސްޓަރުން ހޯދުމަށް މަސައްކަތް ކުރައްވާނީ ވަކި ޝަރުތުތަކެއް ހަމަވާ ރިސޯޓުތަކަށް އެކަނި ކަމަށެވެ. އަދި ޝަރުތުތައް ވަރަށް އަވަހަށް ކަނޑައަޅާ އެކަން އަންގާނެ ކަމަށެވެ.
މިއީ ރަށްތައް ލިބިފައިވާ ފަރާތްތަކުގެ ތެރެއިން މާލީ ގޮތުން ދަތިތަކާއި ކުރިމަތިލާން ޖެހިފައިވާ ފަރާތްތަކަށް ލިބިގެންދާނެ ވަރަށް ރަނގަޅު ފުރުސަތެކެވެ. މިފޯރަމުގެ ސަބަބުން ރަނގަޅު އިންޓަރެސްޓް ރޭޓުތަކަކާއެކު ފަންޑު ހަމަޖެހިގެން ދާނެކަމަށް ބެލެވެއެވެ.
ކޮވިޑް-19ގެ ބަލިމަޑުކަމަށްފަހު ރާއްޖެ އަންނަ ފަތުރުވެރިންގެ އަދަދު ދަނީ ދުވަހެއް ދުވަހަކަށް އިތުރުވަމުންނެވެ. ފަތުރުވެރިކަމުގައި ރާއްޖެއާ ވާދަކުރާ ގިނަ ގައުމުތަކެއްގެ ބޯޑަރު އަދިވެސް މުޅިން ހުޅުވާލާފައި ނުވާތީ، ރާއްޖެއަށް އަންނަ ފްލައިޓުތަކުގެ އަދަދު ވަނީ ބޮޑުތަނުން އިތުރުވެފައެވެ. އެހެންކަމުން ގިނަ ފްލައިޓްތަކެއް އެއްފަހަރާ ޖެއްސޭނެ އަދި ޚިދުމަތް ދެވޭނެ ގޮތް ހެދުމަށް ދާދި ފަހުން ވަނީ ވެލާނާ އެއަރޕޯޓުގެ އައު އެޕްރޯން މުޅިން ހުޅުވާލާފައެވެ. މިއާއެކު ރިސޯޓުތަކަށް އަންނަ ޓޫރިސްޓުން ގިނަވެ އެނދުތައް ފުރިގެންދާނެ ކަމަށް ބެލެވެއެވެ.
