އިންގްލެންޑަށް ފަސޭހަ މޮޅެއް، އިޓަލީ އެއްވަރު

ފީފާ ވޯލްޑް ކަޕުގެ ޔޫރަޕް ކޮލިފައިންގައި ހުކުރު ދުވަހުގެރޭ ކުޅުނު މެޗުން އަލްބޭނިއާ އަތުން ފަސޭހަކަމާއެކު އިންގްލެންޑް މޮޅުވިއިރު، އިޓަލީ އާއި ސްވިޓްޒަލެންޑް ބައްދަލުކުރި މެޗު އެއްވަރުވެގެން ނިމިއްޖެއެވެ.

ކޮލިފައިންގެ ގްރޫޕް އައިގައި ހިމެނޭ އިންގްލެންޑް މޮޅުވީ އަލްބޭނިއާ އަތުން ފަސޭހަކަމާއެކު 5-0 ގެ ނަތީޖާއަކުންނެވެ. މި މޮޅާއެކު އިންގްލެންޑުން ވަނީ ވޯލްޑް ކަޕް ކޮލިފައިންތަކުގައި ބަލިނުވެ 29 މެޗު ހަމަކޮށްފައެވެ.

އަމިއްލަ ގައުމުގައި ކުޅުނު މެޗުގައި އިންގްލެންޑުން މޮޅު ކުޅުމެއް ދެއްކިއިރު، އެ ޓީމުން މި މެޗުގައި ފަސް ލަނޑުވެސް ޖަހާފައިވަނީ ފުރަތަމަ ހާފުގައެވެ. އެގޮތުން މެޗުގެ ކުރީކޮޅު ހެރީ މެގުއާ އިންގްލެންޑަށް ލީޑު ނަގައިދިންއިރު، މި މެޗުގައި އެ ޓީމުގެ ކެޕްޓަން ހެރީ ކޭން ވަނީ ހެޓްރިކް ހަދާފައެވެ. ދެން މި މެޗުގައި އިންގްލެންޑުން ކާމިޔާބުކުރި އަނެއް ލަނޑު ޖަހައިދިނީ ޖޯޑަން ހެންޑަސަންއެވެ.

މި މޮޅާއެކު އަންނަ އަހަރު ގަތަރުގައި ބޭއްވުމަށް ހަމަޖެހިފައިވާ ވޯލްޑް ކަޕަށް ކޮލިފައިވުމާ ގާތަށް އިންގްލެންޑް ޖެހިލިއިރު، އެ ޓީމަށް ދެން ބޭނުންވަނީ އެންމެ ޕޮއިންޓެކެވެ. އަދި މިހާތަނަށް ކޮލިފައިންގެ މެޗަކުން އިންގްލެންޑް ބަލިވެފައިނުވާއިރު، ކޮލިފައިންގެ ގްރޫޕް އައިގެ އެއްވަނައިގައި އެ ޓީމު އޮތީ ކުޅުނު ނުވަ މެޗުން ލިބުނު 23 ޕޮއިންޓާއެކުއެވެ.

ދެވަނައިގައި އޮތް ޕޮލެންޑަށް ނުވަ މެޗުން 20 ޕޮއިންޓް ލިބިފައިވާއިރު، ތިންވަނައިގައި އޮތް އަލްބޭނިއާއަށް ނުވަ މެޗުން ލިބިފައިވަނީ 15 ޕޮއިންޓެވެ. ކޮލިފައިންގައި ހުކުރު ދުވަހުގެރޭ ކުޅުނު މެޗުން ޕޮލެންޑުން ވަނީ ރަށުން ބޭރުގައި ކުޅެ އެންޑޯރާ އަތުން 4-1 ގެ ނަތީޖާއަކުން މޮޅުވެފައެވެ.

މީގެ އިތުރުން ކޮލިފައިންގެ ގްރޫޕް ސީގައި ހިމެނޭ އިޓަލީ އާއި ސްވިޓްޒަލެންޑް ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ.

އިޓަލީގައި ކުޅުނު މި މެޗުގެ ވަރަށް ކުރީކޮޅު ސްވިޓްޒަލެންޑުން ވަނީ ލީޑު ނަގާފައެވެ. މެޗު ފަށައިގެން 11 ވަނަ މިނެޓުގައި އުފެއްދި ކައުންޓަ އެޓޭކަކުން މި ލަނޑު އެ ޓީމަށް ކާމިޔާބުކޮށްދިނީ ސިލްވަން ވިޑްމާއެވެ. އެކަމަކު މެޗުގެ 36 ވަނަ މިނެޓުގައި ލޮރެންޒޯ އިންސީނިއާ ހުރަސްކޮށްދިން ބޯޅައަކުން ޖިއޮވާނީ ޑި ލޮރެންޒޯ ވަނީ ލަނޑެއް ޖަހައި، އިޓަލީއަށް ނަތީޖާ އެއްވަރުކޮށްދީފައެވެ.

އޭގެ ފަހުން ލީޑު ނަގަން މި މެޗުގެ ފަހު މިނެޓުގައި އިޓަލީއަށް ޕެނަލްޓީއެއް ލިބުނު ނަމަވެސް، އެ ޓީމުގެ ޖޯޖީނިއޯ ފޮނުވާލި ޕެނަލްޓީ ދިޔައީ ގޯލާ އަމާޒުނުވެއެވެ. މިއީ އޭރިއާ ތެރެއިން އިޓަލީގެ ޑޮމެނިކޯ ބެރާޑީއަށް ކުރި ފައުލަކަށް، ވީޑީއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ރެފުރީ ދިން ޕެނަލްޓީއެކެވެ.

މި ނަތީޖާއާއެކު ގްރޫޕް ސީގެ އެއްވަނައިގައި އޮތް އިޓަލީ އާއި ދެވަނައިގައި އޮތް ސްވިޓްޒަލެންޑަށް ވަނީ ހަތް މެޗުން 15 ޕޮއިންޓް ލިބިފައެވެ. އަދި ތިންވަނައިގައި އޮތް ނޮދަން އަޔަލެންޑާއި ހަތަރުވަނައިގައި އޮތް ބަލްގޭރިއާއަށް ހަތް މެޗުން ލިބިފައިވަނީ އަށް ޕޮއިންޓެވެ.