ދުނިޔޭގެ ތަރިކައިގައި ހިމަނަން މަސައްކަތްކުރަނީ ކޯގަންނު ގަބުރުސްތާނުގެ މިސްކިތެއް: ތޯރިގު

ދުނިޔޭގެ ތަރިކައިގެ ލިސްޓުގައި ހިމެނުމަށް މަސައްކަތް ކުރަމުންދަނީ އައްޑޫ މީދޫ ކޯގަންނު ގަބުރުސްތާނުގައި ހުރި މިސްކިތެއް ކަމަށް މިނިސްޓްރީ އޮފް އަރޓްސް ކަލްޗަރ އެންޑް ހެރިޓޭޖްގެ ސްޓޭޓް މިނިސްޓަރ މުހައްމަދު ތޯރިގު ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ތޯރިގު ވިދާޅުވީ ރާއްޖޭގެ ތަރިކަ، ދުނިޔޭގެ ތަރިކައިގެ ލިސްޓުގައި ހިމެނުމުގެ މަސައްކަތަކީ އިއްޔެ ފެށި މަސައްކަތެއް ނޫން ކަމަށެވެ. މި މަސައްކަތް ކުރަމުން އަންނަތާ ކިތަންމެ ދުވަހެއް ވެފައިވާކަމަށާއި، ނަތީޖާއެއްގެ ގޮތުން މިހާތަނަށް އައި އިރު ރާއްޖޭގެ 5 ނުވަތަ 6 ތަނެއް ދުނިޔޭގެ ތަރިކައިގެ ވަގުތީ ލިސްޓުގައި ހިމެނިފައިވާކަމަށް ތޯރިގު ވިދާޅުވިއެވެ.

ތޯރިގު ވިދާޅުވީ މި ލިސްޓުގައި ހިމެނުމަށް މަސައްކަތްކުރަމުންދާ ތަންތަން ވެސް އެބަހުރި ކަމަށާއި، މިގޮތުން އައްޑޫ ކޯގަންނު ގަބުރުސްތާނުގައި ހުރި މިސްކިތް ފާހަގަކޮށްލެވޭކަމަށް އޭނާ ވިދާޅުވިއެވެ. އެތަނުގައި ގާއިމްކޮށްފައިހުރި މިސްކިތް ދުނިޔޭގެ ތަރިކައިގެ ތެރޭގައި ހިމެނުމަށް މަސައްކަތްކުރަމުންދާއިރު އެ މިސްކިތުގެ އިތުރުން ގަބުރުސްތާނާއި، އަދިވެސް އެތަނުގައި ހުރި އެހެން ތަންތަން ވާނީ ހިމާޔަތްކުރެވި ރައްކާތެރިކުރެވިފައިވާ ތަންތަނަށް ކަމަށް ވިދާޅުވިއެވެ.

މިތަން ދުނިޔޭގެ ތަރިކައިގެ ތެރޭގައި ހިމެނުމަށް މިހާރުވެސް ގިނަ މަސައްކަތްތަކެއް ކުރިއަށްދާކަމަށް އޭނާ ވިދާޅުވިއެވެ. އެގޮތުން ކަރުދާހުގެ މައިގަނޑު މަސައްކަތްތައް މިހާރު ވަނީ ނިމިފައިކަމަށް ވެސް އޭނާ ވިދާޅުވިއެވެ.

ތޯރިގު އިތުރަށް ވިދާޅުވީ ދުނިޔޭގެ ތަރިކައިގެ ވަގުތީ ލިސްޓުގައި ހިމެނިފައިވާ ތަންތަން ދާއިމީ ލިސްޓަށް ބަދަލުކުރުމަށް ވެސް މަސައްކަތްތަކެއް ކުރިއަށްދާ ކަމަށެވެ. ދުނިޔޭގެ ފެންވަރުގައި ފާހަގަކޮށްލެވޭ ތަރިކައެއް ރާއްޖޭގައި ހުރުމަކީ ވަރަށް ބޮޑު ކަމެއް ކަމަށް އޭނާ ވިދާޅުވިއެވެ. އެހެންކަމުން އެތަންތަން ދާއިމީ ލިސްޓުގައި ހިމެނުމަށް ކުރާ މަސައްކަތްތައް ހުއްޓުމެއް ނެތި ކުރަމުންދާކަމަށާއި، މީގެ ތިން ރިޕޯޓެއް އަދިވެސް ހުށަހަޅަންޖެހޭކަމަށް ވިދާޅުވިއެވެ. އަންނަ އަހަރުގެ ތެރޭގައި އެ ރިޕޯޓުތައް ހުށަހެޅޭނެކަމަށް ގަބޫލުކުރައްވާކަމަށް ތޯރިގު ވިދާޅުވިއެވެ.

މީދޫ ކޯގަންނު ގަބުރުސްތާނަކީ އައްޑު އަތޮޅު މީދޫގައި ފުރަތަމަ އިސްލާމްދީން ގަބޫލްކޮށްގެން މި ތިބި މުސްލިމުން މަރުވުމުން އެމީހުން ވަޅުލުމަށް ޚާއްސަކުރެވިގެން އުފެދުނު ތަނެކެވެ. އެއީ މީގެ 900 އަހަރު ކުރިން ކަމަށް ތާރީޚީ ލިޔުންތަކުގައިވެއެވެ. ކޯގަންނު ގަބުރުސްތާނު އޮތީ މީދޫގެ އުތުރު ބިތުގައެވެ.

ކޯގަންނުއަކީ ބުނެވޭ ގޮތުގައި މީދޫ އިސްލާމްވުމުގެ ކުރިން ބުދު ދީނުގެ މީހުން މަރުވުމުން އެމީހުންގެ ހަށިތައް އެންދުމަށް ބޭނުންކުރި ވަކި ރަށެކެވެ. އޭރު މީދޫ މީހުން ދިރިއުޅުނީ ރަށުގެ އެންމެ އިރުމަތީ ފަރާތުން ވޭރާނޑު ނުވަތަ ވޭރުގަނޑު ސަރަހައްދުގައެވެ. އިސްލާމް ވުމަށް ފަހު އެސަރަހައްދު ދޫކޮށް ރަށުގެ އުތުރު ފަރާތާއި މެދުތެރެއަށް އެމީހުން ބަދަލުވެ ޖެހިގެން އޮތް ކޯގަންނު އިސްލާމުންގެ ގަބުރުސްތާނަކަށް ބަދަލުކޮށް އެތާގައި މީހުން ވަޅުލާން ފެށީއެވެ. ކޯގަންނުއަކީ އެއްވެސް ޝައްކެއްނެތި ރާއްޖޭގައިވާ އެންމެ ގަދީމީ އިސްލާމީ ގަބުރުސްތާނެވެ. އެތަނަކީ މިއަދު ހިމާޔަތްކުރެވިފައިވާ ގައުމީ އާސާރެކެވެ. އެތަން އާސާރަކަށްވަނީ ކޮންމެހެން ގަބުރުސްތާނަކަށް ވެގެނެއް ނޫނެވެ. ހިރިގަލުގެ މަސައްކަތާއި ބިސްތާނުތަކުގެ ޑިޒައިނާއި މިސްކިތްތަކުގެ އަދަދާއި އެތަންތަނުގެ ތާރީޚު އަދި އައްޑުއެތައްދެކުނުގެ ރަށްތައް އިސްލާމްދީނަށް އެނބުރުމުގެ ސަބަބުކަމަށް މެދުވެރިވި ބޭކަލެއްގެ ޒިޔާރަތް އެތަނުގައި ހުރުމަކީ އެތަނުގެ މުހިންމުކަން ބޮޑުވެގެންދާ ސަބަބުތަކެއް ކަމަށް ތާރީޚީ ލިޔުންތަކުގައިވެއެވެ.