އާންމު ދަތުރުފަތުރުގެ ގޮތުގައި ބަހުގެ ޚިދުމަތް ދިނުމަށް, ޓްރާންސްޕޯޓް މިނިސްޓްރީން ކަނޑައަޅާ ފަރާތަކުން އެކަމަށް ލައިސަންސް ދީފައިވާ ފަރާތްތަކަށް، އެ ޚިދުމަތް ދެވޭގޮތަށް ގަވައިދެއް އެކުލަވާލައި ގެޒެޓްކޮށްފިއެވެ.

އެއްގަމު ދަތުރުފަތުރުގެ ގާނޫނުގެ 3 ވަނަ މާއްދާގެ (ހ) އިން ބާރު ލިބިގެން އެކުލަވާލާފައިވާ "އާންމު ދަތުރުފަތުރުގެ ގޮތުގައި ބަހުގެ ޚިދުމަތް ދިނުމުގެ ގަވާއިދު"ގައި ވާގޮތުން އާންމު ދަތުރުފަތުރުގެ ގޮތުގައި ބަހުގެ ޚިދުމަތް ދިނުމަށް ބޭނުންކުރަންވާނީ ބީ0، ބީ1 ނުވަތަ ބީ2 ގިންތީގެ އުޅަނދުތަކެވެ. އަދި މި އުޅަނދުތައް އެއްގަމުގައި ދުއްވާ އިންޖީނުލީ އުޅަނދު ރަޖިސްޓަރީކުރުމުގެ ގަވާއިދު ގައި ބަޔާންކޮށްފައިވާ މިންގަނޑުތަކަށް ފެތެންވާނެ ކަމަށް ބަޔާންކޮށްފައިވެއެވެ.

އާންމު ދަތުރުފަތުރުގެ ގޮތުގައި ބަހުގެ ޚިދުމަތް ދިނުމަށް އެދޭ ފަރާތްތަކުން އެކަމަށް ކުރިމަތިލުމަށް މިނިސްޓްރީން ނުވަތަ މިނިސްޓްރީން ކަނޑައަޅާ ފަރާތަކުން އިއުލާނު ކުރުމުން، އެކަމަށް އެދި ޕްރޮޕޯސަލެއް ހުށަހަޅަންޖެހޭނެއެވެ. އެގޮތުން ޚިދުމަތް ދިނުމަށް އެދި ހުށަހަޅާ ފަރާތުގެ މައުލޫމާތާއި، ޚިދުމަތް ދިނުމަށް އެދި ހުށަހަޅާ ފަރާތުގެ މާލީ ޤާބިލުކަން ހުރި މިންވަރު އެނގޭނެ ލިޔުމަކާއި، އާންމު ދަތުރުފަތުރުގެ ޚިދުމަތް ދިނުމަށް ހުށަހަޅާ ގޮތުގެ ތަފުސީލު މި ޕްރޮޕޯސަލްއާއެކު ހުށަހަޅަންޖެހޭނެއެވެ.

ބަހުގެ ޚިދުމަތް ދޭ ސަރަހައްދުގައި ބަސް ދަތުރުކުރާނެ މަގުތައް ކަނޑައަޅާނީ، އެ ސަރަޙައްދެއްގައި ޚިދުމަތް ދިނުމަށް ލައިސަންސް ދޭ ފަރާތާއި، ޚިދުމަތް ދޭ ފަރާތާ ދެމެދު މަޝްވަރާ ކުރުމަށްފަހު، މިނިސްޓްރީން ނުވަތަ މިނިސްޓްރީން ކަނޑައަޅާ ފަރާތަކުންނެވެ. އެ މަގުތައް ބަދަލުކުރަން ނިންމައިފިނަމަ އެ ނިންމުމެއް، ޚިދުމަތް ދިނުމަށް ލައިސަންސް ދޭ ފަރާތުން، ޚިދުމަތް ދޭ ފަރާތަށާއި ޚިދުމަތް ލިބިގަންނަ ފަރާތަށް އެއް މަސް ދުވަހުގެ ކުރިން އަންގަންވާނެ ކަމަށް ގަވައިދުގައި ވެއެވެ.

ބަހުގެ ޚިދުމަތް ދޭ ސަރަހައްދުތަކުގެ ލޯކަލް ކައުންސިލުން، މިނިސްޓްރީން ކަނޑައަޅާ މިންގަނޑަށް އެ ސަރަހައްދެއްގައި ބަސްހުއްޓިތައް ގާއިމްކޮށް، ބަލަހައްޓަންޖެހެއެވެ. ބަހުގެ ޚިދުމަތް ދޭ ފަރާތުން އެ ޚިދުމަތް ދޭން ފެށުމުގެ ކުރިން އުޅަނދު ރަޖިސްޓްރީކުރަންޖެހެއެވެ. އަލިފާނުގެ ހާދިސާއެއް ހިނގައިފިނަމަ އެކަމުން ރައްކާތެރިވުމަށް ފިޔަވަޅު އެޅޭނެ ނިޒާމެއް ގާއިމްކުރަންޖެހެއެވެ. ބަހުގަައި އަވަސް ފަރުވާ ދެވޭނެ ގޮތް ފަހިވެފައި ހުރުމާއި، އުމުރުން ދޮށީ މީހުންނާއި، ނުކުޅެދުންތެރިކަން ހުންނަ މީހުންނާއި، ކުޑަކުދިންނާއި، މާބަނޑު އަންހެނުންނާއި، އަދިވެސް މިނޫން ފަރާތްތަކަށް ވެސް ފަސޭހައިން އަރާ ފޭބޭނެ އިންތިޒާމު ހަމަޖެހިފައި ހުންނަންޖެހެއެވެ. މީގެ އިތުރުން ބަހުގައި ސެކިއުުރިޓީ ކެމެރާ ހަރުކުރެވިފައި ހުންނަންޖެހެއެވެ.

ބަސް ދުއްވާ ޑްރައިވަރަކީ ބަސް ދުއްވުމުގެ ކެޓަގަރީގެ ޑްރައިވިންގ ލައިސަންސާއި، އާންމު ދަތުރުފަތުރުގެ ގޮތުގައި ބަސް ދުއްވުމުގެ ހުއްދަ މިނިސްޓްރީން ނުވަތަ މިނިސްޓްރީން ކަނޑައަޅާ ފަރާތަކުން ދީފައިވާ ދިވެއްސަކަށް، ނުވަތަ ދިވެހިބަހުން ވާހަކަދައްކަން އެނގޭ، ދިވެހި ދައުލަތުގެ ރެސިޑެންޓް ވިސާ ލިބިފައިވާ ބިދޭސީއަކަށް ވާންވާނެ ކަމަށް ގަވައިދުގައިވެއެވެ.

މި ޚިދުމަތް ދިނުމަށް އަގެއް ކަނޑައަޅާނީ ޚިދުމަތް ދިނުމަށް ލައިސަންސް ދޭ ފަރާތާއި ޚިދުމަތް ދޭ ފަރާތާ ދެމެދު މަޝްވަރާކުރުމަށްފަހު، ޚިދުމަތް ދިނުމަށް ލައިސަންސް ދޭ ފަރާތުންނެވެ. ޚިދުމަތް ލިބިގަންނަ ފަރާތުން ބަހަށް އަރުވާ ވީލްޗެއަރއާއި، ކުޑަކުދިންގެ ޕްރޭމާއި، އަތްދަބަސް ފަދަ ތަކެއްޗަށް އިތުރު ފީއެއް ނެގުމަކީ މަނާކަމެއް ކަމުގައި ގަވއިދުގައި ބަޔާންކޮށްފައިވެއެވެ.

މީގެ އިތުރުން ސްކޫލް ކުދިންނަށް ޚާއްސަކޮށް ވަކި ބަހެއް ދުއްވިދާނެ ކަމަށް މި ގަވައިދުގައި ވެއެވެ. ސްކޫލް ކުދިންނަށް ޚާއްޞަކޮށްގެން ވަކި ބަހެއް ދުއްވާނަމަ، ސްކޫލް ބަހެއްކަން އެނގޭ ފަދަ ނަން ބޯޑެއް ފަސޭހަކަމާއެކު ފެންނަގޮތަށް ބަހުގައި ހަރުކޮށްފައި ހުންނަންވާނެއެވެ. އަދި ސްކޫލުތަކާ ވީހާވެސް ކައިރިއަށް ބަސް ދަތުރުކުރުމުގެ އިންތިޒާމު ހަމަޖައްސަންވާނެ ކަމަށާއި، މިކަންތައް ކަނޑައަޅާނީ މިނިސްޓްރީ އޮފް އެޑިޔުކޭޝަންގެ މަޝަވަރާއާއެކުގައި ކަމަށް ގަވައިދުގައި ބުނެފައިވެއެވެ. ސްކޫލް ކުދިންނަށް ޚާއްސަކޮށް ހެޔޮ އަގުތަކެއް ކަނޑައަޅަންޖެހޭނެއެވެ.

ގަވައިދުގައި ވާގޮތުން ޚިދުމަތް ދޭ ފަރާތުން އެ ޚިދުމަތް ދެމުން ގެންދާގޮތް މިނިސްޓްރީން ނުވަތަ މިނިސްޓްރީން ކަނޑައަޅާ ފަރާތަކުން ރަނގަޅަށް ބަލަންވާނެއެވެ. މި ގަވާއިދު ތަންފީޛުކުރާ ފަރާތަކުން ނުވަތަ އެކަމުގެ އިޚްތިޔާރު ދީފައިވާ ފަރާތަކުން ބަސް ޗެކުކުރަން ބޭނުންވެއްޖެ ހިނދެއްގައި ބަސް ހުއްޓުވައި ޗެކުކުރުމުގެ އިޚްތިޔާރު އެ ފަރާތަކަށް ލިބިގެންވެއެވެ.

ޚިދުމަތް ދޭ ފަރާތުން ބަހުގެ ޚިދުމަތް ހުއްޓާލާނަމަ، ޚިދުމަތް ދިނުން ހުއްޓާލުމުގެ މަދުވެގެން 90 ދުވަހުގެ ކުރިން ޚިދުމަތް ދޭ ފަރާތުން އެކަން މިނިސްޓްރީ ނުވަތަ މިނިސްޓްރީން ކަނޑައަޅާ ފަރާތަކަށް ލިޔުމަކުން އަންގަންވާނެއެވެ. އަދި ގަވައިދާ ޚިލާފަށް ބަހުގެ ޚިދުމަތް ދޭނަމަ އެ ފަރާތެއް 2،000 ރުފިޔާއިން ޖޫރިމަނާކުރެވޭނެ ކަމަށް ގަވައިދުގައި ބަޔާންކޮށްފައިވެއެވެ.