މިހާތަނަށް އަންނާނެ އެންމެ ސާފުތާހިރު 5 އަހަރު ކަމުގައި، މި 5 އަހަރު ވެގެންދާނެ – ރައީސް
10 ނޮވެމްބަރު 2021 | ބުދަ 17:11ތަރައްގީގެ ވާހަކަ ދައްކަން ފެށޭނީވެސް ގައިން ތާހިރުވެ ތިބެގެން
ފެނާއި ނަރުދަމާގެ މަސައްކަތް ރަށެއްގައި ކުރިއަށްދަނީ
ދިވެހިޖުމްހޫރިއްޔާއަށް މިހާތަނަށް އަންނާނެ އެންމެ ސާފުތާހިރު ފަސްއަހަރަކީ މިފަސްއަހަރު ކަމުގައި ވެގެންދާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ 54 ވަނަ ޖުމްހޫރީދުވަހުގެ މުނާސަބާގައި ބޭއްވި ހަފުލާގައި ގައުމާ މުޚާޠަބު ކުރައްވާ ވާހަކަފުޅުދައްކަވަމުންނެވެ. ރައީސް ވިދާޅުވީ ވޭތުވި 3 އަހަރަށް ފެށުމުގެ ކުރިން ވެސް، އެމަނިކުފާނު ދެންނެވި ވާހަކައެއް މިއަދުވެސް ހަނދުމަފުޅުގައި އެބަހުންނެވި ކަމަށެވެ. އެއީ، ތަރައްގީގެ ވާހަކަ ދައްކަން ފެށޭނީވެސް ގައިން ތާހިރުވެ ތިބެގެންކަމެވެ.
ރައީސް ވިދާޅުވީ ދިވެހި ޖުމްހޫރިއްޔަތުގެ ތެރެއިން އެމަނިކުފާނު ފާއިތު މިކުރި 3 އަހަރުގެ މައިގަނޑު އެއް އަމާޒަކީ ހުރިހާ ރަށެއްގައި ސާފު ފެނާއި ނަރުދަމާގެ މަސައްކަތް ހިންގުން ކަމަށެވެ. އަދި އިރާދަކުރެއްވިއްޔާ ކުރިއަށް އޮތް ދެ އަހަރާއެކު، ދިވެހިޖުމްހޫރިއްޔާއަށް މިހާތަނަށް އަންނާނެ އެންމެ ސާފުތާހިރު ފަސްއަހަރު ކަމުގައި، މިފަސްއަހަރު ވެގެންދާނެ ކަމަށެވެ.
ރައީސް ވިދާޅުވީ ތިލަމާލެ ކަނެކްޓިވިޓީގެ މަސައްކަތް މާތް ﷲގެ ވާގިފުޅާއެކު ހުއްޓުމެއްނެތި ކުރިއަށްދާނެ ކަމަށެވެ. އަދި ހައިސްޕީޑް ފެރީ ނެޓްވޯރކްގެ ހަރުފަތްތައް ދާނީ ގިރާ ކުރަމުން ކަމަށާއި، ދަތުރުފަތުރުގެ ވިއުގައިގެ އަގު ރައްޔިތުންނަށް ލާހިކު ކުރުމަށްޓަކައި އެކަށީގެންވާ ސަބްސިޑީ ސަރުކާރުން ދެއްވާނެ ކަމަށެވެ.
މީގެ އިތުރުން ލަފާފުރުމުގެ ދަތިކަން ހައްލު ކުރުމަށް، 100 އަށްވުރެ ގިނަ ބަނދަރުގެ މަސައްކަތް އެކިމަރުހަލާގައި ހިނގާނެ ކަމަށާއި، އިއާދަ ކުރަނިވި ހަކަތައާ އެކުއެކީ، ކަރަންޓްގެ އިތުބާރު ބޮޑު ކުރުމުގެ މަސައްކަތް ބާރަށް ކުރިއަށްދާ ކަމަށެވެ.
ރައީސް ވިދާޅުވީ ދިވެހިންގެ އިގުތިސާދު ހުޅުވާލެވި، މަސައްކަތް ފެށި، އައު އާންމު ހާލަތަށް ރުޖޫއަވުމުގެ މަސައްކަތް ބާރު ސްޕީޑްގައި ކުރިއަށްދާ ކަމަށެވެ. އަދި އަހަރު ނިމޭއިރަށް އަންދާޒާ ކުރެވޭ ފަތުރުވެރިންގެ ޖުމްލަ ހުރީ 1.3 މިލިއަން ގައި ކަމަށާއި، ކުރެވޭ އަންދާޒާ ތަކުން، ފަތުރުވެރިކަން އަންނަ އަހަރުވެސް ދާނީ އިތުރަށް ކުރިއަށް ކަމަށެވެ. ނަތީޖާއެއްގެ ގޮތުން، އިގުތިސާދީ، މާލީ ދިރާސާ ތަކުގެ މާހިރުން ރާއްޖެއާމެދު ކުރާ އުންމީދު ވަރަށް ބޮޑު ކަމަށް ރައީސް ވިދާޅުވިއެވެ.
ރައީސް ވިދާޅުވީ ކުރިއަށް އޮތް 2 އަހަރުގެ ތެރޭގައި، ސަރުކާރުގެ މައިގަނޑު ފޯކަސް ސީދާ ކުރަންޖެހެނީ މި 5 އަހަރަށްވީ ވައުދުތައް ފުއްދައި ނިންމުމަށް ކަމަށެވެ. 2022 ވަނަ އަހަރުގެ ބަޖެޓް ހުށަހެޅީ އެމިސްރާބަށް ވާސިލުވުމުގެ އަމާޒުގައި ކަމަށާއި، ކޮވިޑް-19އިން ގެއްލުނު ދިގުމުއްދަތަކީ ބަހަނާ އެއްގެ ގޮތުގައި ބެލޭކަށް ނެތް ކަމަށެވެ. ރައީސް ވިދާޅުވީ އަންނަ އަހަރު، އިޖްތިމާއީ ދާއިރާއަށް ޚާއްސަ އިސްކަމެއް ބަޖެޓްގައި ދެވިފައިވާނެ ކަމަށެވެ. އަދި ސިއްހީ ދާއިރާގެ ޚިދުމަތްތައް ފުޅާކުރުމަށް އިތުރު ޑޮކްޓަރުންނާއި ނަރުހުން ހޯދުމަށް ބަޖެޓްކުރެވިފައިވާ ކަމަށެވެ.
ރައީސް ވިދާޅުވީ ސަރުކާރުގެ އިދާރާތަކުން ރައްޔިތުންނަށް ދޭ ޚިދުމަތް މާބޮޑަށްވެސް އަވަސްކުރަންޖެހޭ ކަމަށެވެ. އަންނަ އަހަރު ސަރުކާރުން އިސްކަންދޭނެ އަނެއް ކަމަކީ މިއީ ކަމަށާއި، ޚިދުމަތްތައް އެކުވެނި އެއް ފުރާޅެއްގެ ދަށުން ފޯރުކޮށްދިނުމަށް އަންނަ އަހަރު މަސައްކަތް ފެށޭނެ ކަމަށް ރައީސް ވިދާޅުވިއެވެ. އަދި ޚިދުމަތްތައް ޑިޖިޓަލައިޒްކުރުމަށް އަންނަ އަހަރަށް ވަރަށްބޮޑު އިސްކަމެއްދީގެން ބަޖެޓްކުރެވިފައިވާނެ ކަމަށް ރައީސް ވިދާޅުވިއެވެ.
