ބީއެމްއެލްގެ ސްކޮލާޝިޕް ފަންޑް ތައާރަފްކޮށްފި
ބީއެމްއެލްގެ ސްކޮލާޝިޕް ފަންޑަކީ އެކުންފުނީގެ 40 ވަނަ އަހަރީ ދުވަހާ ގުޅުވައިގެން ތަޢާރަފްކުރި ފަންޑެއް
ބިއެމްއެލް ސްކޮލާޝިޕް ފަންޑް ތައާރަފްކުރުން
ބޭންކް އޮފް މޯލްޑިވްސް (ބީއެމްއެލް) އިން އެކުންފުނީގެ 40 ވަނަ އަހަރީ ދުވަހާ ދިމާކޮށްގެން ކުރިއަށްގެންދާ ހަރަކާތްތަކުގެ ތެރެއިން 'ބީއެމްއެލް ސްކޮލާޝިޕް ފަންޑް' ތައާރަފްކޮށްފިއެވެ.
ބީއެމްއެލްއަށް މިއަހަރު ފުރޭނީ 39 އަހަރެވެ. މިއަންނަ އަހަރުގެ ނޮވެމްބަރ މަހު އެކުންފުންޏަށް 40 އަހަރު ފުރުމާ ހަމައަށް، ކޮންމެ މަހަކު ވެސް މުޖުތަމަޢަށް ފައިދާހުރި މުހިންމު ހަރަކާތެއް ހިންގުމަށް އެކުންފުނިން ވަނީ ނިންމާފައެވެ. އެގޮތުން މިއީ ކޮންމެ މަހަކަށް ހަރަކާތެއްގެ އުސޫލުން ބަހާލައިގެން ހިންގުމަށް ހަމަޖެހިފައިވާ ހަރަކާތްތަކުގެ ތެރެއިން ފުރަތަމަ ހަރަކާތެވެ.
ބުދަ ދުވަހު ތައާރަފް ކުރެވުނު ސްކޮލާޝިޕް ފަންޑު މެދުވެރިކޮށް ހުރިހާ ޚަރަދަކާއެކު ރާއްޖޭން ބޭރުން ބޭންކިންގ އަދި ފައިނޭންސްގެ ދާއިރާއިން 3 ދަރިވަރަކަށް ސްކޮލާޝިޕް ދިނުމަށް ވަނީ ހަމަޖެހިފައެވެ. މި ފަންޑަކީ ކޮންމެ އަހަރަކު ކޮންމެ ފަރާތަކަށް ވެސް ބައިވެރި ވެވޭނެހެން ހުނަރުވެރި ދިވެހި ޒުވާނުން މި ދާއިރާއިން ބިނާ ކުރުމުގެ އަމާޒުގައި ހުޅުވުނު ފަންޑެކެވެ.
މިކަމާ ގުޅޭ ގޮތުން ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރ ޓިމް ސޯޔަރ ވިދާޅުވީ މިއަންނަ އަހަރު ބޭންކުގެ 40 ވަނަ އަހަރީ ދުވަސް ފާހަގަކުރާއިރު މިއީ ބޭންކަށް ހާސިލްކުރެވޭ މުހިންމު ލަނޑުދަނޑިއަކަށް ވެގެންދާނެ ކަމަށެވެ. އަދި ބީއެމްއެލްގެ އަހަރީ ދުވަހާ ގުޅިގެން ގިނަ ހަރަކާތްތަކެއް ހިންގުމަށް ރާވާފައި ވާއިރު، މިއީ އެކުންފުނީގެ ކަސްޓަމަރުންނާއި، މުޖުތަމައަށާއި މުވައްޒަފުން ހިމެނޭހެން އެ ފަރާތްތަކަށް އެހީތެރިވުމަށާއި އަގުވަޒަން ކުރުމުގެ ގޮތުން ކުރެވޭ މުހިންމު ކަންތައްތަކެއް ކަމަށެވެ. ހަމައެހެންމެ މި ހަރަކާތުގެ ޒަރިއްޔާއިން މުޖުތަމަޢަށް އެހީތެރިވެ ގައުމުގެ މުސްތަގުބަލަށް އިންވެސްޓް ކުރެވޭކަމީ އެކުންފުނިން ފަޚުރުވެރިވާކަމެއް ކަމަށެވެ. މީގެ އިތުރުން ކޮޕް ސަމިޓްގައި މަޝްވަރާ ކުރުވުނު ކަންތައްތަކާ ގުޅުވައިގެން ތިމާވެއްޓާ ގުޅުންހުރި މުހިންމު ހަރަކާތްތަކެއް ހިމަނައި، ގަސް އިންދުމުގެ ބިޔަ މަޝްރޫއެއް ހިންގުމަށް އިސްކަންދޭނެ ކަމަށްވެސް ޓިމް ވިދާޅުވިއެވެ.
ބީއެމްއެލްގެ ސްކޮލާޝިޕް ފަންޑަށް ހުށަހެޅުމާގުޅޭ ތަފްސީލު ފަހުގެ ތާރީޚެއްގައި ބީއެމްއެލްގެ ވެބްސައިޓްގައި ހާމަކުރެވޭނެއެވެ.
