ދެ ކޮޅިގަނޑާއެކު ކުރިޔަށް އޮތް 3 ދުވަހު ރާއްޖޭގެ މޫސުން ގޯސްވާނެ
ސްރީލަންކާ ކައިރިން ބޭ އޮފް ބެންގާލްގައި އުފެދިފައިވާ ލޯ ޕްރެޝަރުގެ އަސަރު ރާއްޖެއަށް ކުރާނެ
ރާއްޖޭގެ މޫސުން ކުރިޔަށް އޮތް ތިން ދުވަހުވެސް ގޯސްވާނެކަމަށް ވަނީ ލަފާކޮށްފައި
ރާއްޖެއާ ދުރުން އަރަބި ކަނޑާއި ބޭ އޮފް ބެންގޯލްގައި އުފެދިފައިވާ ދެ ކޮޅިގަނޑުގެ ސަބަބުން ކުރިޔަށްއޮތް 3 ދުވަހު ރާއްޖޭގެ ހުރިހާ ހިސާބެއްގައި ވެސް ވައިގަދަވެ ކަނޑުތައް ގަދަވާނެކަމަށް ލަފާކުރެވޭކަމަށް މޫސުމާ ބެހޭ ގައުމީ އިދާރާއިން ބުނެފިއެވެ.
އެހެންކަމުން ހުރިހާ ފަރާތްތަކުން، އަދި ވަކިން ޚާއްސަކޮށް ކަނޑުދަތުރުކުރާ ފަރާތްތަކުން ވެސް މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސްކޮށްފައެވެ. ސްރީލަންކާ ކައިރިން ބޭ އޮފް ބެންގޯލްގައި އުފެދިފައިވާ ލޯ ޕްރެޝަރުގެ އަސަރު ރާއްޖެއަށް ކުރާނެކަމަށް މެޓް އޮފީހުން ވަނީ ބުނެފައެވެ.
މީގެއިތުރުން މެޓް އޮފީހުން ބުނީ ރާއްޖޭގެ ހުރިހާ ހިސާބަކަށް ވެސް ވިއްސާރަކުރާނެކަމަށާއި ބައެއް ރަށްތަކަށް ގުގުރުން ވެސް އެކަށީގެންވާކަމަށެވެ. އަދި ވައިޖެހޭނެކަމަށް ލަފާކުރެވެނީ ހުޅަނގުދެކުނާއި ހުޅަނގުން ގަޑިއަކު 13 މޭލާއި 23 މޭލާ ދެމެދުގެ ބާރު މިނުގައި ކަމަށް މެޓް އޮފީހުން ބުނެއެވެ.
