ލޯހުޅުވައިގެން ރަގަޅަށް ބަލައިބަލާށެވެ. ސިޔާސީ ވާދަވެރިކަމުގައި ފެންނަ ތަންތަން ނުފެންނަކަމަށް ނުހަދާށެވެ. ރާއްޖެ ވެއްޓިފައިވާ ވަޅުގަނޑުން ސަލާމަތް ކުރެއްވުމަށް ރައީސް ޞާލިޙު ވެވަޑައިގަންނަވަމުންދާ ގުރުބާނީތައް ނިކަން ދެކެބަލާށެވެ. ރާއްޖޭގެ ހީރަސް ކެނޑިފައިވާ އިޖުތިމާއީ އަދާލަތުގެ ގަނޑުތައް އެއްތަންކުރައްވައި ހީރަސް ޖެއްސެވުމުގައި ހޯއްދަވަމުންދާ ކާމިޔާބީތައް ނިކަން ދެކެބަލާށެވެ. ރައްޔިތުންގެ ސަލާމަތާއި ރައްކާތެރިކަމަށް ކުރެވެމުންދާ މަސައްކަތްތައް ދެކެބަލާށެވެ. އަސާސީ ޚިދުމަތްތައް ފޯރުކޮށް ދިނުމަށް ކުރެވޭ ކަންކަން ނުފެންނަނީ ހެއްޔެވެ. ބައިނަލް އަގުވާމީ ގޮތުން ލިބެމުންދާ ކާމިޔާބީތައް އެހުރީ ފެންނާށެވެ. ތައުލީމާއި ތަރުބަވީ ނިޒާމު ކުރިއަރަމުން އަންނަތަން ދެކެބަލާށެވެ. ސިޔާސީ ހަމަޖެހުމާއި ފަރުދީ މިނިވަންކަން ހޯއްދަވައިދެއްވަމުން ދަނީ ކިހާ ރަނގަޅަކަށް ހެއްޔެވެ.
އެތައް ޒަމާނެއް ވަންދެން ލަފާފުރޭނެ ގޮތެއް ނެތި އިހުމާލު ކޮށްލެވިފައިތިބި ކުދި ރަށްރަށަށް ލަފާފުރުން ފަސޭހަ ކޮށްދެއްވައި ބޭރުތޮއްޓާއި ބަނދަރުތައް ހަދަމުން އެދަނީ ފަތުއަޑު ކިޔާފައެވެ. ރައީސް ޞާލިޙުގެ ފަސްއަހަރު ނިމޭއިރު ލަފާފުރަން އުނދަގޫ، މީހުން އުޅޭ އެއްވެސް ރަށެއް ނޯންނާނެއެވެ. އެރަށްރަށުގައި ބަނދަރު ހެދި، ބޭރުތޮށިލައި، އެއްގަމު ވާޓަރުނެތް ރަށެއް ނޯންނާނެކަން ޔަގީނެވެ. އެ މަސައްކަތްތައް އެ ދަނީ ބާރަށް ކުރިއަށެވެ.
ރަށްގިރުމުގެ ނުރައްކާތެރިކަން ކުރިމަތިވެފައިވާ ހުރިހާ ރަށެއްގައިހެން އެރަށަކަށް ދިމާވެފައިވާ މައްސަލަތައް ހައްލުކޮށް، ރައްކާތެރިކަމުގެ ފިޔަވަޅުތައް އަޅައި، ރަަށްތައް އެބަ ސަލާމަތްކޮށްދެއްވައެވެ. ކުޑަރަށެއް ބޮޑުރަށެއް ތަފާތެއް ނުކުރައްވައެވެ. ބައިބޯ ރަށެއް ބައިމަދު ރަށަކަށް ނުބައްލަވައެވެ.
ރައްކާތެރި ބޯފެން ފޯރުކޮށް ދެއްވުމަށް ކުރެވެމުންދާ މަސައްކަތްތައް ވެސް ހުއްޓުމެއް ނެތި އެދަނީ ކުރިއަށެވެ. ފެނަށް ޖެހުމުގެ ދަތިކަން މުޅި ރާއްޖޭން ނައްތާލެއްވުމަށް ރައްކާތެރި ފެނުގެ ނިޒާމެއްގެ ތެރެއިން ހުރިހާ ރައްޔިތުންނަށް 2023 ގެކުރިން ލިބި ފުރިހަމަ ވެގެން ދާނެއެވެ. އެ މިސްރާބަށް ކުރެވޭ މަސައްކަތް ރާއްޖޭގެ ހުރިހާ ދިމާލަކުން އެހެރަ ފެންނަނީއެވެ. ލޯ ހުޅުވައިގެން ބަލައިލަބަލާށެވެ.
ފެނުގެ ފަށަލަ ނަޖިހުން ތަޣައްޔަރުވެ، ހަލާކުވެފައިވާ ރަށްރަށަށް ހާއްސަ އިސްކަމެއް ދެއްވައިގެން ނަރުދަމާގެ މަސައްކަތް އެބަކުރެވެއެވެ. ފެންފަށަލަ ހަލާކުވެފައިވާ ރަށްރަށުގައި އެ މަސައްކަތް ކުރެވެމުން ދާއިރު އެނޫން ރަށްރަށް ވެސް އިހުމާލު ކޮށްނުލާ ނަރުދަމާގެ މަސައްކަތް ކުރިއަށް އެބަގެންދެއެވެ.
ކަރަންޓުގެ ދަތިކަން ކުރިމަތިވަމުންދާ ހުރިހާރަށެއްގައި ވެސް އެރަށަކަށް އެންމެ އެކަށީގެންވާ ގޮތަކަށް ކަރަންޓުގެ ޚިދުމަތް ފޯރުކޮށްދީ، ފެންވަރު މަތިކުރުމަށް ކުރެވެމުންދާ މަސައްކަތްތަކަށް ކުޑަވެސް ހުއްޓުމެއްނާދެއެވެ. އިންޖީނުގެތައް ބޮޑުކުރުމާއި، އައު އިންޖީނުގެތައް އެޅެމުން އެހެރަ ދަނީއެވެ. އެންމެ އެކަށީގެންވާ ޖަނަރޭޓަރު ސެޓްތަކާއި ކޭބަލްގެ އިތުރުން ޓްރާންސްފޯމަރުތައް ބަހައްޓައިގެން ޚިދުމަތުގެ ފެންވަރު މަތިކުރަމުން އެ ގެންދަވަނީ ރޮކެޓް ސްޕީޑްގައެވެ.
ރައީސް ޞާލިޙުގެ ވެރިކަމުގެ ފަސް އަހަރުގެ ތެރެއިން ދެ އަހަރު ބަޔަކީ މުޅި ދުނިޔެ އާލަމީ ވަބާއެއްގައި މަރުތަޅު އެޅުވިފައި އޮތް ދުވަސްތަކެކެވެ. ގައުމުތައް އޮތީ އެކީ އެކައްޗަކަށް ހުއްޓިފައެވެ. އެންމެންހެން ތިބީ ފުރާނަ ސަލާމަތްކުރުން ނޫން ހުރިހާ ކަމެއް ހުއްޓާލައި އެކަހެރިވެ ބަންދުވެފައެވެ. އެއްތަނުން އަނެއްތަނަށް މުދާއުފުލުމާއި އައިސްގޮސް އުޅުން އޮތީ ހުއްޓިފައެވެ. އެކަކަށް އެއްކަމެއް ވެސް ނުކުރެވެއެވެ. އެހެންނަމަވެސް އެންމެ އުފާވީ ކޮވިޑްގެ އުދަގޫ އަދި އެހާމެ ދަތި ހާލަތުގައި ވެސް ކޮވިޑްގެ ނުރައްކާތެރިކަން ނެތް ހިސާބުތަކުގައި ދަތިއުނދަގުލުގައި ނަމަވެސް އަސާސީ ޚިދުމަތްތައް ގާއިމުކުރުމުގެ މަސައްކަތް ނުހުއްޓި ކުރިޔަށް ގެންދެވީތީއެވެ. ރައްޔިތުންގެ ހައްގުތަކަށް ހުރުމަތްތެރިކޮށް ހިއްތަވައި ވެރިއެއްގެ ދުރުވިސްނުން ފުޅާ ސާބިތުކަމުގެ ބޮޑުކަމަށްޓަކައެވެ. ވާދަވެރިންގެ ފުރައްސާރައަށް ބީރުކަންފަތެއް ދެއްވައިގެން ރައްޔިތުންގެ އަސާސީ ހައްގުތައް އަދާކުރެއްވުމަށް ސާބިތުވެ ހުންނެވީތީއެވެ.
އެއްވެސް ޝައްކެއްނެތި ޔަގީން ކުރެވޭ ކަމަކީ 2023 އަންނައިރު ރާއްޖޭގައި މީހުން އުޅޭ އެއްވެސް ރަށެއްގައި އަސާސީ ފެންވަރެއްގައި ލަފާފުރުމުގެ ދަތިކަމެއް އިހުސާސްކުރަން ނުޖެހޭނެ ކަމެވެ. ތަޣައްރުވެފައިވާ ނަޖިސް ފެނުން ފެންވަރަން އެއްވެސް ރަށެއްގައި ނުޖެހޭނެހެން ނަރުދަމާގެ މައްސަލަތައް ހައްލުވެގެން ދާނެކަމެވެ. ރައްކާތެރި ބޯފެން ނުލިބިގެން އެއްވެސް ރަށެއްގައި އެއްވެސް މީހަކަށް އުޅެން ނުޖެހޭނެކަމެވެ. އާނއެކެވެ. އަސާސީ ޚިދުމަތް ފޯރުކޮށް ދިނުމަށް ރައީސް ޞާލިޙު ވަރެއްނެތެވެ.
