އައްޑޫ ސިޓީގައި މިހާރު ބަންދުކޮށްފައި އޮތް ދެ ރިސޯޓްގެ ތެރެއިން ކެނަރީފް ކުރިއަށް އޮތް ދެމަހުގެ ތެރޭގައި ހުޅުވޭނެ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެއެމްވީއާ ވާހަކަދައްކަވަމުން މައުސޫމް ވިދާޅުވީ، ދެ ރިސޯޓު ވެސް ވީހާވެސް އަވަހަކަށް ހުޅުވުމުގެ މަސައްކަތް ކުރައްވަމުން ގެންދަވާ ކަމަށާއި، ފުރަތަމަ ހުޅުވޭނީ ކެނަރީފް ރިސޯޓް މޯލްޑިވްސް ކަމަށެވެ. އަދި ކުރިއަށް އޮތް ދެމަހުގެ ތެރޭގައި އެތަން ހުޅުވިގެންދާނެ ކަމަށް މައުސޫމް ވިދާޅުވިއެވެ.
މައުސޫމް ވިދާޅުވީ، ސަދަރން ޒޯންގައި ފަތުރުވެރިކަން ފުޅާކުރުމަށް ޓްރެވެލް އެޖެންސީތަކާއެކު މަޝްވަރާ ކުރެވެމުން އަންނަ ކަމަށާއި، އެ ސަރަހައްދަށް އެއަރލައިންތައް ގެނައުމަށް މަސައްކަތްތަކެއް ކުރަައްވާ ކަމަށެވެ. އައްޑޫ، ފުވައްމުލައް އަދި ހުވަދު އަތޮޅު ހިމެނޭހެން ސަދަރން ޒޯން ދުނިޔެއަށް އިޝްތިހާރު ކުރުމަށް މަސައްކަތް ކުރައްވަމުންގެންދަވާ ކަމަށެވެ.
މިހާރު އޮތް އެންމެ ބޮޑު ގޮންޖެހުމަކީ، އެތެރޭގެ އުދުހުންތަކުގެ އަގު ބޮޑުވުން ކަމަށާއި، ފްލައިޓް ޓިކެޓްގެ އަގު ހެޔޮ ކުރެވޭނީ ވެސް ދަތުރުކުރާ މީހުންގެ އަދަދު އިތުރުވުމުން ކަމަށެވެެ. އުންމީދު ކުރައްވަނީ އަންނަ އަހަރު އިތުރު ކުރިއެރުންތަކެއް ލިބިގެންދިޔުން ކަމަށް މައުސޫމް ވިދާޅުވިއެވެ.
އަންނަ އަހަރު ޖެނުއަރީ މަހުގައި ހޯމް ސްޓޭ ތައާރަފްވުމުން އެ ސަރަހައްދަށް އިތުރު ކުރިއެރުންތައް ލިބިގެންދާނެކަން ފާހަގަކުރައްވަމުން މައުސޫމް ވިދާޅުވީ، އައްޑޫ ސިޓީގައި މިހާރުވެސް ހޯމް ސްޓޭއަށް ބަދަލު ކޮށްލެވޭނެ ފެންވަރަށް ހަދާފައިހުރި ގެތައް އެބަހުރި ކަަމަށެވެ. އެކަމަށް މަގުފަހި ކުރެވޭނެ ހުރިހާ ކަމެއް ސަރުކާރުން ކޮށްދެއްވާނެ ކަމުގެ ޔަގީންކަން މައުސޫމް ދެއްވިއެވެ.
ސަރުކާރުން ކަނޑައެޅި އެންމެ ކުޑަ އުޖޫރައާއެކު ފަތުރުވެރިކަމުގެ ދާއިރާގައި މަސައްކަތްކުރާ، ރަށްރަށުގެ މުވައްޒަފުންނަށް ކުރިއެރުންތަކެއް ލިބިގެންދާނެ ކަމަށާއި، މަސައްކަތްކުރައްވާނީ އެންމެ ކުޑަ އުޖޫރައަށްވުރެ މަތީ އާމްދަނީއެއް ހޯއްދަވައި ދެއްވުމަށް ކަމަށް ވިދާޅުވިއެވެ. ބޮޑު މުސާރަ ލިބޭ ވަޒީފާތަކަށް ދިވެހިން ގެންދިޔުމަށް މިހާރުވެސް މަސައްކަތް ފައްޓަވާފައިވާ ކަމަށް މައުސޫމް ވިދާޅުވިއެވެ.
އައްޑޫ ސިޓީގެ ތިން ރިސޯޓުގެ ތެރެއިން ސައުތު ޕާމް ރިސޯޓް މޯލްޑިވްސް މިހާރު ހުޅުވައި އަންނަނީ ފަތުވެރިންނަށް ޚިދުމަތް ދެމުންނެވެ. ކެނަރީފް ރިސޯޓް ހުޅުވުމަށް މަސައްކަތް ކުރަމުން އަންނައިރު، ޝަންގްރިއްލާސް ވިލިނގިލި ރިސޯޓް އެންޑް ސްޕާ ހުޅުވޭނެ ވަކި ތާރީޚެއް އަދި ހާމައެއްނުކުރެއެވެ.
