ގޮނޑި ބަދަލުވުމުން 7 އަހަރުން ނުވި ކަންތައް 7 ދުވަހުން!

ރާއްޖޭގެ ހުރި އާސާރީ ތަންތަނާއި ބިނާތަކާއި މަގްބަރާތަކީ އާބާތުރަ ފިލުައި އަބަދުވެސް ޒީނަތްތެރިކޮށްފައި ހުންނަންޖެހޭ ތަންތަނެވެ. އެއި ވަކި ބަޔަކު ވެރިކަމުގައި ތިބިގެން ކުރަންޖެހޭ ކަންކަމެއް ނޫނެވެ. އެއީ ކޮންމެ ބަޔަކު ވެސް ކުރަން ޖެހޭ ކަމެކެވެ. ނަމަވެސް ވެރިކަން ލިބުމާއެކު މިކަންކަން ބައެއް ފަރާތްތަކުން ހަނދާން ނެތެއެވެ. ވެރިކަމުގެ ޖާހަތުގައި ޖެހި މޮޅު ތަކެއްޗާއި މަންފާކުރަނިވި ތަކެތި ފެނުނީމާ އެހެން ހުރިހާ އެއްޗަކުން ހަނދާން ނެތެއެވެ.

ކޮންމެ އަހަރެއްގެ ވެސް ނޮވެމްބަރ 3 ވަނަ ދުވަހަކީ ރާއްޖެއަށް ޚާއްސަ ދުވަހެކެވެ. ވަކި ބަޔަކަށް އޮތް ދުވަހެއް ނޫނެވެ. ރާއްޖޭގެ މިނިވަންކަމާއި އިސްތިގުލާލު އަތުލާ ދިވެހިންގެ މައްޗަށް ވެރިވެގަންނަން ދިވެހިންގެ ތެރެއިން ގައުމަށް ޣައްދާރުވި ބަޔަކު ހިންގި ބޮޑު ލޭއޮހޮރުވުމެކެވެ. އެދުވަސް މާޒީގެ ތެރެއަށް ދިޔަ ނަމަވެސް އެކަން ހަނދާންކޮށްދޭ ކަންކަން ފެންނަން އެބަހުއްޓެވެ. އެއްތަނަކީ ހެންވޭރު ސަހަރާގައި ފަސްދާނުލެވުނު އެދުވަހުގެ ބަތަލުންގެ މަގުބަރާއެވެ. އެތަން ވީރާނާވަން ދޫކޮށްލާ އެހެން ހުންނަތާ އެތައް އަހަރެއް ވަނީ ވެފައެވެ. ސީދާ ތާރީޚެއް ނޭނގުނު ނަމަވެސް ރާއްޖޭގައި ސިޔާސީ ކަންކަން އަރަފޯދޭން ފެށި ފަހުން އެތަން ބަލަހައްޓާނެ ބަޔަކު ވެސް ނެތެވެ.

މިހެން ހުއްޓާ މިއަހަރުގެ ނަސްރުގެ ދުވަހަށް މާލެ ސިޓީ ކައުންސިލުން އެތަން ސާފުކޮށް މަހާނަގާތައް ސާފުކޮށް ކުލަލައި މުޅި ސަހަރާގެ އެތަން އެކަނި ޒީނަތްތެރިކޮށްފިއެވެ. ކޮންމެއަކަސް މިއީ ވަރަށް ރަނގަޅު ކަމެކެވެ. މުނިސިޕަލް ޚިދުމަތް ދޭން ތިބި ބަޔަކު ކުރަން ވެސް ޖެހޭ ކަމެކެވެ. ލާޒިމުކަމެކެވެ. މާލޭ މޭޔަރު ކޮށްދިން މަސައްކަތަށް ހަމަ ޝުކުރު ހައްގެވެ. ސާބަހެވެ. ވަރަށް ފުރިހަމައެވެ.

ނަމަވެސް ބައެއް މީހުން ބުނަނީ ތިޔައީ ސިޔާސީ ސްޓަންޓެއް ކަމަށެވެ. ގޮވީ ފަޓާސްބަރިއެއް ހެން އަތަށް ކަމަށެވެ. އެހެނީ 7 އަހަރު މިނިސްޓަރުކަމުގައި މުއިއްޒު ހުރިއިރު، މުނިސިޕަލް ހުރިހާ ޚިދުމަތެއް އަތްދަށުލައިގެން އަންބޮޑިއަށް ލައިގެން އުޅުނު އިރު 7 އަހަރު 7 ފަހަރު ނަސްރުގެ ދުވަސް އައި އިރު މުއިއްޒުގެ ލޯ ސިއްސައިގެން ގޮސް ވެސް އެތަނަށް ސީދާ ނުކުރެވެނު ކަމަށް މީހުން ބުނެއެވެ.

ދެން ދައްކަނީ އެއިރު ސިޓީ ކައުންސިލުން ކަންކަން ނުކުރާ ވާހަކައެވެ. މިއަދު މޭޔަރުކަމުގެ ގޮނޑީގައި އިންނައިރު، އެއިރުގެ މާލެ ސިޓީ ބިއްލޫރިޖެހި ގެއިން ނެރެ މަގުމަތިކޮށްލާ މުނިސިޕަލް ޚިދުމަތްތައް މުއިއްޒުގެ ކޮޓަރިއަށް ވެއްދި ހަނދާންވެސް ނެތިދާނެއެވެ. ނަމަވެސް އެ ހަނދާން ނުނެތޭނެ ސިވިލް މުވައްޒަފުންނާއެކު މިހާރުވެސް މުއިއްޒު އިނީ މަސައްކަތުގައެވެ. އެ މުވައްޒަފުން މަގުމަތިކޮށްލި ހަނދާން އަދި ނެތޭނެހެން ހިޔެއް ނުވެއެވެ.

ވިހާ މަރުވާ ވެސް ބެލެހެއްޓީ މުއިއްޒެވެ. ދަފްތަރާއި ވެސް ކުޅުނީ މުއިއްޒެވެ. މާލޭގެ ރައްޔިތުންނަށް ލިބެން އޮތް ބޯހިޔާވަހިކަން ދެ ފަހަރަށް ވެސް ނިގުޅައިގަތީ މުއިއްޒެވެ. ފުލެޓްތައް މިނިސްޓަރުންގެ ލިސްޓަށް ބަހައި ހުސްކޮށްލީ ވެސް މުއިއްޒެވެ.

މިހާރު މާލޭގެ މަގުތަކުގައި ދިދަ ޖަހައި އެކަން ކުރިކަމަށް ޓްވީޓްކޮށް ސްޓަންޓް ޖެއްސަނީއެވެ. ރަށްރަށުގައި އަދި ސިޓީ ތަކުގައި ނަމަވެސް، ސަރުކާރުން އަންގައިގެން ނުވަތަ މިނިސްޓްރީތަކުން އަންގައިގެން ދިދަ ޖެހުމާއި ދިދަ ފަތި ދެމި ޒަމާން ގޮސް މާޒީ ވެއްޖެއެވެ. އެކަން ކުރަނީ ކައުންސިލްތަކުން އެ ކައުންސިލެއްގެ މުނިސިޕަލް މަސައްކަތެއްގެ ގޮތުގައެވެ. ދުވަހެއް ފާހަގަ ކުރަން އާދޭސް ދަންނަވަން ނުވަތަ ދިދަ ޖަހަން އެދި ފަތްކޮޅެއް މިހާރަކު ނުފޮނުވާނެއެވެ. އެއީ ކައުންސިލްތަކުގެ ޒިންމާއެކެވެ. ކައުންސިލްތަކުން ކުރަން ޖެހޭ ކަމެކެވެ.

އެހެންކަމުން ޝަހީދުންގެ ބިނާ ސާފުކޮށް އެތަނުގައި ކުލަކޮޅެއްލާ މާލޭގެ މަގުތަކުގައި ދިދަ ޖެހީ އިޚުލާސްތެރިކަމެއް އޮވެގެން ނޫނެވެ. އެއީ ހަމަ ދެއްކުން ތެރިކަމެވެ. މާ ދުރު ނޫން މުއިއްޒުގެ މިނިސްޓަރު ކަމުގައި ޝަހީދުންގެ ބިނާއިން ބައެއް ކަނޑައި ނަގައި ސަހަރާ ސާފުކޮށް އެތަނުގައި ޕާކިން ޒޯން ހެދީވެސް ހަމަ މުއިއްޒެވެ. މިއީ ދައްކާ ހުސް ނުވާނެ ވާހަކައެވެ.

މުއިއްޒެވެ. 7 އަހަރުން ނުވި ކަންކަން 7 ދުވަހުން ކޮށްދިނީމާ އެއީ އިޚުލާސްތެރިކަމާއެކު ކުރި ކަމެއްގެ ގޮތުގައި ނުބެލެވޭނެއެވެ. ސިޔާސީ ސްޓަންޓެއް ޖެއްސީއެވެ. ނަމަވެސް އެ ސްޓަންޓް މިއަދު ގަބޫލުކުރާނެ ބަޔަކު ނެތެވެ. ގޮވީ އަތަށެވެ. ގޮނޑި ބަދަލުވުމުން ތިޔަ ހިންގުމެއް ހިނގަނީ ހަމަ އެކޮޅުކޮޅުންނެވެ.