ލަފާފުރުމުގެ ދަތިކަން ހައްލުކުރުމަށް ބަޖެޓްގައި 1.7 ބިލިއަން ރުފިޔާ
7 ނޮވެމްބަރު 2021 | އާދީއްތަ 08:52އެންމެ ބޮޑު ހޭދައެއް ކުރުމަށް ހުށަހަޅައިފައިވަނީ ބްރިޖު އެޅުމަށް
މަޑުއްވަރީ ބަނދަރު
ލަފާފުރުމުގެ ދަތިކަން ހައްލުކުރުމަށް 1.7 ބިލިއަން ރުފިޔާ އަންނަ އަހަރުގެ ބަޖެޓްގައި ކަނޑައަޅައިފިއެވެ.
ލަފާފުރުމުގެ ދަތިކަން ހައްލުކުރުމަށްޓަކައި، 169 ރަށެއްގައި ބަނދަރު ހެދުމުގެ މަޝްރޫއު އަންނަ އަހަރަށްލާފާކުރި ބަޖެޓްގައިވަނީ ހިމަނާފައެވެ. މީގެ ތެރޭގައި ހިނގަމުންދާ 41 މަޝްރޫއުއާއި އަލަށްފަށާ 20 މަޝްރޫއުއެއް ހިމެނެއެވެ. މީގެ އިތުރުން ސަރުކާރުން އިސްކަމެއް ދީގެން ކުރިއަށްގެންދާ ޕޯޓު މަޝްރޫއުއަށް 21.0 މިލިއަން ރުފިޔާ ހިމަނާފައިވާއިރު، ރަށްރަށުގައި އަލަށްފެށުމަށް ހަމަޖެހިފައިވާ ހައި-ސްޕީޑް ފެރީ ނެޓްވޯކްގެ އިމްޕްރޫވްމަންޓް ޕްލެޓްފޯމް މަޝްރޫއަށް 30.0 މިލިއަން ރުފިޔާ އަދި އުތުރުގެ ސަރަހައްދުގައި ހައި-ސްޕީޑް ފެރީގެ ނިޒާމު ގާއިމްކުރުމަށް ވެސް ވަނީ ހިމަނާފައެވެ.
ޕީއެސްއައިޕީ ބެހިފައިވާ މައިގަނޑު ދާއިރާތަކުގެ ތެރެއިން އެންމެ ބޮޑު ޚަރަދެއް ކުރުމަށް ހަމަޖެހިފައިވަނީ ވެސް ލަފާފުރުމުގެ ދަތިކަން ހައްލުކުރުމަށެވެ.
ލަފާފުރުމުގެ ދަތިކަން ހައްލުކުރުމަށް ޖުމްލަ 1,747.9 މިލިއަން ރުފިޔާ ބަޖެޓުގައި ވަނީ ހިމަނާފައެވެ. މިއީ ޕީއެސްއައިޕީ ބަޖެޓުގެ 27.9 އިންސައްތައެވެ. މީގެ ތެރެއިން އެންމެ ބޮޑު ޚަރަދެއް ހިނގާނީ ބޭރުގެ އެކި ފަރާތްތަކުން ލިބޭ ލޯނުން ހިންގާ މަޝްރޫއުތަކަށް ކަމަށް ބަޖެޓްގައިވަނީ ކަނޑައަޅާފައެވެ.
އެގޮތުން ވައިގެ ބަނދަރުތައް ތަރައްގީކުރުމަށް ބޮޑު ހޭދައެއް ކުރުމަށްވަނީ ނިންމާފައެެވެ. މީގެ ތެރޭގައި ވެލާނާ އިންޓަރނޭޝަނަލް އެއަރޕޯޓްގެ ޓަރމިނަލް އަދި ރަންވޭ މަޝްރޫޢުއަށް 560.8 މިލިއަން ރުފިޔާ ލޯނުން ޚަރަދުކޮށްގެން ހިންގުމަށް ވަނީ ހަމަޖެހިފައެވެ. މީގެ ތެރޭގައި ސައުދީ ފަންޑު، އަބޫދާބީ ފަންޑު، ކުވެއިތު ފަންޑު އަދި އޯފިޑް ފަންޑުން ހަމަޖެހިފައިވާ ލޯނުތަކުން ކުރާ ޚަރަދުތައް ހިމެނެއެވެ.
ހަމައެހެންމެ، ހިނގަމުންދާ ޑޮމެސްޓިކް ވައިގެ ބަނދަރުތައް ތަރައްގީކުރުމުގެ އެކި މަޝްރޫއުތަކަށް 123.2 މިލިއަން ރުފިޔާ ބަޖެޓުގައި ހިމަނާފައިވާނެއެވެ. މީގެ އިތުރަށް ސ. ގަން ބައިނަލްއަގުވާމީ ވައިގެ ބަނދަރެއްގެ ގޮތުގައި ތަރައްގީކުރުމަށްޓަކައި އިންޑިއަން އެގްޒިމް ބޭންކުގެ ލައިން އޮފް ކްރެޑިޓްގެ ތެރެއިން ފަންޑުކޮށްގެން ކުރިއަށް ގެންދިއުމަށް ހަމަޖެހިފައިވާއިރު، ނ. މާފަރު އެއަރޕޯޓް އެކްސްޓެންޝަން މަޝްރޫއުއަށް އަބޫދާބީ ފަންޑުން 1.6 މިލިއަން ރުފިޔާ އަދި ޑޮމެސްޓިކް ބަޖެޓުން 30.0 މިލިއަން ރުފިޔާ ވަނީ ބަޖެޓްކޮށްފައެވެ.
އެންމެ ބޮޑު ހޭދައެއް ކުރުމަށް ހުށަހަޅައިފައިވަނީ ބްރިޖު އެޅުމަށެވެ. މިއީ ގްރޭޓާރ މާލެ ކަނެކްޓިވިޓީ ޕްރޮޖެކްޓްގެ ބިން ހިއްކުމާ ގުޅިގެން ޢަމަލީ މަސައްކަތްތައް ފަށައިގަތުމަށްޓަކައެވެ. މިގޮތުން މި މަޝްރޫއަށް ޖުމްލަ 633.4 މިލިއަން ރުފިޔާ ހިމަނާފައިވެއެވެ. މީގެ ތެރޭގައި އިންޑިއަން އެގްޒިމް ބޭންކުގެ ލައިން އޮފް ކްރެޑިޓް ފެސިލިޓީގެ ދަށުން 543.3 މިލިއަން ރުފިޔާގެ ލޯނު އަދި އިންޑިއާ ސަރުކާރުގެ ހިލޭ އެހީގެ ގޮތުގައި 76.2 މިލިއަން ރުފިޔާއާއި ދައުލަތުގެ ޑޮމެސްޓިކް ބަޖެޓުން 14.0 މިލިއަން ރުފިޔާ ހޭދަކުރުމަށް ހަމަޖެހިފައިވެއެވެ. މި މަޝްރޫއަކީ މި ސަރުކާރުގެ މައި މަޝްރޫއުތަކުގެ ތެރޭގައި ހިމެނޭ އަދި އިޤްތިޞާދީ ފުދުންތެރިކަން އިތުރުކުރުމަށްޓަކައި ރާވައިފައިވާ އެންމެ މުހިއްމު އެއް މަޝްރޫއުއެވެ.
