އޮކްޓޯބަރު މަހު ރެކޯޑު އަދަދަކަށް މުދާ އެތެރެކޮށްފި
5 ނޮވެމްބަރު 2021 | ހުކުރު 15:27އޮކްޓޯބަރު މަހު 3.8 ބިލިއަން ރުފިޔާގެ މުދާ އެތެރެކުރި
ކަސްޓަމްސް ކްލިއަރެންސް
މިއަހަރުގެ މިހާތަނަށް ރާއްޖެއަށް އެންމެ ގިނަ މުދާ އެތެރެކުރީ ނިިމިދިޔަ އޮކްޓޯބަރު މަހު ކަމަށް ކަސްޓަމްސްއިން ބުނެފިއެވެ.
ކަސްޓަމްސްއިން ވަނީ 2020 ވަނަ އަހަރާއި 2021 ވަނަ އަހަރުގެ މިހާތަނަށް ރާއްޖެއަށް ކޮށްފައިވާ މުދަލުގެ ތަފާސްހިސާބުތައް އާންމުށްފައެވެ. ތަފާސްހިސާބުތައް ދައްކާގޮތުން ނިމިދިޔަ އޮކްޓޯބަރު މަހު ރެކޯޑު އަދަދަކަށް ވަނީ ރާއްޖެއަށް މުދާ އެތެރެކޮށްފައެވެ. އެއީ 3.8 ބިލިއަން ރުފިޔާގެ މުދަލެވެ.
ކަސްޓަމްސްއިން ބުނީ ކޮވިޑް-19ގެ ކުރިން ރާއްޖެއަށް މުދާ އިމްޕޯޓުކުރަމުން އައި މިންވަރަށް މިހާރު ރާއްޖެއަށް މުދާ އިމްޕޯޓުކުރަމުން އަންނަ ކަމަށެވެ. މި އަދަދާ ގާތްކުރާ އަދަދަކަށް އެންމެ ފަހުން މުދާ އިމްޕޯޓުކޮށްފައިވަނީ 2020 ވަނަ އަހަރުގެ ޖެނުއަރީމަހު ކަމަށް ކަސްޓަމްސްއިން ބުނެފައިވެއެވެ. އެއީ 3.7 ބިލިއަން ރުފިޔާގެ މުދަލެވެ. މިއަހަރުގެ އޮކްޓޯބަރުމަހު އިމްޕޯޓުކުރި މުދާ ކޮވިޑް-19ގެ ކުރިން އިމްޕޯޓުކުރަމުންއައި އަދަދަށްވުރެވެސް އިތުރުކަން ކަސްޓަމްސްއިން ފާހަގަކޮށްފައިވެއެވެ. އެގޮތުން 2019 ވަނަ އަހަރު މަހެއްގެ މައްޗަށް ރާއްޖެއަށް އެތެރެކުރަނީ 3.7 ބިލިއަން ރުފިޔާގެ މުދާކަމަށް ކަސްޓަމްސްއިން ބުނެފައިވެއެވެ.
ކަސްޓަމްސްއިން ވަނީ މިއަހަރު ރާއްޖެ އިމްޕޯޓުކުރެވުނު މުދަލުގެ ތަފްސީލުތައްވެސް ހިއްސާކޮށްފައެވެ. އެގޮތުން ޖެނުއަރީމަހު އިމްޕޯޓުކޮށްފައިވަނީ 2.8 ބިލިއަން ރުފިޔާގެ މުދަލެވެ. ފެބްރުއަރީމަހު 2.8 ބިލިއަން ރުފިޔާގެ މުދާ، މާޗް މަހު 3.5 ބިލިއަން ރުފިޔާގެ މުދާ، އޭޕްރީލް މަހު 2.9 ބިލިއަން ރުފިޔާގެ މުދާ، މެއި މަހު 3 ބިލިއަން ރުފިޔާގެ މުދާ، ޖޫން މަހު 3 ބިލިއަން ރުފިޔާގެ މުދާ، ޖުލައި މަހު 2.7 ބިލިއަން ރުފިޔާގެ މުދާ، އޮގަސްޓު މަހު 3.4 ބިލިއަން ރުފިޔާގެ މުދާ، ސެޕްޓެމްބަރު މަހު 3.5 ބިލިއަން ރުފިޔާގެ މުދާ އަދި އޮކްޓޯބަރު މަހު 3.8 ބިލިއަން ރުފިޔާގެ މުދާ ރާއްޖެ އެތެރެކޮށްފައިވެއެވެ.
މި އަދަދުތަކުން އެނގޭގޮތުގައި މިއަހަރުގެ އޮގަސްޓުމަހުން ފެށިގެން ރާއްޖެއަށް މުދާ އިމްޕޯޓުކުރާ މިންވަރު ވަނީ އިތުރުވާން ފަށާފައެވެ. މިއީ އިތުރު ވިޔަފާރިތައް ފެށި ގައުމުގެ އިގްތިސާދު ރަނގަޅުވަމުންދާކަމުގެ ހެއްކެކެވެ.
