ކޮވިޑް-19ގެ ކޭސްތަކާ ގުޅިގެން އަތޮޅުތެރޭގެ 23 ރަށެއް މޮނިޓަރިންގެ ހާލަތަށް ގެނެސްފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން ބުނީ މިހާތަނަށް މޮނިޓަރިންގެ ހާލަތަށް ގެނެސްފައިވަނީ ސ. ހިތަދޫ، ސ. މަރަދޫ، ސ. މަރަދޫ-ފޭދޫ، ސ. ފޭދޫ، ސ. ހުޅުމީދޫ، ފ. ނިލަންދޫ، ލ. ގަން، ށ. ފީވަށް، ބ. ތުޅާދޫ، ބ. ގޮއެދޫ، ނ. ހޮޅުދޫ، މ. މުލަށް، ނ. ކެނދިކުޅުދޫ، ކ. ގުރައިދޫ، ށ. ފުނަދޫ، މ. ދިއްގަރު، ގއ. ކޮލަމާފުށި، ނ. މިލަދޫ، ކ. ހުރާ، މ. މުލި، ނ. މަނަދޫ، ށ. ގޮއެދޫ އަދި ބ. ހިތާދޫ އެވެ.

އެޗްޕީއޭއިން އާންމުކުރި ތަފާސްހިސާބުތަކަށް ބަލާއިރު މޮނިޓަރިންއަށް ލާފައިވާ ރަށްރަށުގެ ތެރެއިން މޮނިޓަރިންގައި އޮންނަތާ އެންމެ ގިނަ ދުވަސްވީ އައްޑޫ ސިޓީގެ އަވަށްތައް ކަމަށްވާ ސ. ހިތަދޫ، ސ. މަރަދޫ، ސ. މަރަދޫ-ފޭދޫ އަދި ސ. ފޭދޫ އެވެ. މި އަވަށްތައް މޮނިޓަރިންގެ ހާލަތަށް ގެނެސްފައިވަނީ 28 އޮގަސްޓް 2021 ގައެވެ. އަދި އައްޑޫ ސިޓީގެ ހުޅުމީދޫއާއި ފ. ނިލަންދޫ މޮނިޓަރިންގެ ހާލަތަށް ގެނެސްފައިވަނީ ސެޕްޓެންބަރު މަހުގެ ތެރޭގައެވެ. 13 ރަށެއް އޮކްޓޫބަރު މަހުގެ ތެރޭގައި މޮނިޓަރިންއަށް ލާފައިވާއިރު، ނޮވެމްބަރު މަހުގެ މިހާތަނަށް ހަތަރު ރަށެއް މޮނިޓަރިންއަށް ލާފައިވެއެވެ.

މޮނިޓަރިންގެ ހާލަތަށް ރަށެއް ގެންނަނީ ބަލި ފެތުރިފައިވާ މިންވަރު ދެނެގަނެ ކޮންޓެކްޓް ޓްރޭސިންގެ މަސައްކަތްތައް ކުރުމަށެވެ. މޮނިޓަރިންގެ ހާލަތުގައިވާ ރަށްރަށުގެ ކަންކަން އެޗްޕީއޭއިން ވަރަށް ގާތުން ބަލަމުންދާ ކަމަށާއި، ހާލަތު ރަނގަޅު ރަށްރަށް މޮނިޓަރިންއިން ނަގަމުންދާ ކަމަށް އެޗްޕީއޭއިން ބުނެއެވެ.

ރާއްޖޭގައި ކޮވިޑްގެ ހާލަތު ރަނގަޅުވެ، ޚާއްސަކޮށް މާލެ ސަރަހައްދުގައި ކޮވިޑްގެ ހާލަތު ރަނގަޅުވުމާއެކު، އަޅާފައިވާ ފިޔަވަޅުތަކަށް ގިނަ ލުއިތަކެއް ވަނީ ދީފައެވެ. އަދި ވެކްސިންގެ ދެ ޑޯޒް ފުރިހަމަކޮށްފައިވާ މީހުންނަށް އަތޮޅުތެރެއަށް ދަތުރުކުރެވޭ ގޮތަށް މިހާރު ވަނީ ހުޅުވާލާފައެވެ. ނަމަވެސް އަތޮޅުތެރޭގެ ރަށްރަށުގައި ކޮވިޑް-19ގެ ކޭސްތައް ފެންނަ މިންވަރު ދަނީ އިތުރުވަމުންނެއެވެ. އެއާއެކު މިހާރު މޮނިޓަރިންގެ ހާލަތުގައި ހުރި ރަށްރަށުގައި ކޮވިޑް-19 ކޮންޓްރޯލް ކުރުމަށް ގިނަ ފިޔަވަޅުތަކެއް ވަނީ އަޅާފައެވެ.

ކޮވިޑް-19ގެ ރާއްޖޭގެ ހާލަތަށް ބަލާއިރު، ބުދަ ދުވަހުގެ އިރުއޮއްސި 6:00ން ބުރާސްފަތި ދުވަހުގެ އިރުއޮއްސި 6:00ށް 3518 ސާމްޕަލް ނަގާފައިވާ ކަމަށާއި، އޭގެ ތެރެއިން 109 މީހުން ޕޮޒިޓިވްވެފައިވާ ކަމަށެވެ. އެއީ މާލެ ސަރަހައްދުން 17 މީހުންނާއި އަތޮޅުތެރޭގެ ރަށްރަށުން 84 މީހުންނާއި ހިންގަމުންދާ ރިސޯޓުތަކުން 8 މީހުންނެވެ. 1961 އެކްޓިވް ކޭސް ހިމެނޭއިރު، 27 މީހަކަށް ހޮސްޕިޓަލުގައި އެޑްމިޓްކޮށްގެން ދަނީ ފަރުވާ ދެމުންނެވެ.

އެޗްޕީއޭގެ ތަފާސްހިސާބުތައް ދައްކާ ގޮތުން މިހާތަނަށް ރާއްޖެއިން 88386 މީހުން ޕޮޒިޓިވްވެފައިވެއެވެ. އަދި 86168 މީހުން ބަލިން ރަނގަޅުވެފައިވެއެވެ. އަދި 244 މީހުން މިބަލީގައި ވަނީ ނިޔާވެފައެވެ.