އެމްޑަބްލިޔުއެސްސީން 20 ރަށެއްގައި ހިންގާ ޕްރޮޖެކްޓްތަކަށް ބޭރު ގައުމުތަކުން މީހުން ނުގެންނަން: ޝާހު
ސަރުކާރުން ގެންގުޅޭ ސިޔާސަތުތަކަކީ އެމްޑަބްލިޔުއެސްސީ އިން ވަރަށް ވިސްނާކަމެއް
މާލޭގައި ފެން ރައްކާ ކުރާ އިތުރު 2 ތާންގީ ބެހެއްޓުމުގެ މަސައްކަތް ފެށުމުގެ ތެރެއިން
އެމްޑަބްލިޔުއެސްސީން 20 ރަށެއްގައި ހިންގާ ޕްރޮޖެކްޓަށް ބޭރު ގައުމުތަކުން މީހުން ނުގެންނަން ކަމަށް މާލެ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ)ގެ މެނޭޖިންގ ޑިރެކްޓަރ ހަސަން ޝާހު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ޝާހު ވިދާޅުވީ ސަރުކާރުން ގެންގުޅޭ ސިޔާސަތުތަކަކީ އެމްޑަބްލިޔުއެސްސީން ވަރަށް ވިސްނާކަމެއް ކަމަށެވެ. އަދި އެ ކުންފުންޏަށް ލިބިފައިވާ 20 ރަށުގެ ޕްރޮޖެކްޓުގައި ވެސް ބޭރު ޤައުމުތަކުން ބިދޭސީ މަސައްކަތްތެރިން ނުގެންނަ ކަމަށެވެ.
އެގޮތުން ހުރިހާ ޕްރޮޖެކްޓްތައް ސަބް ކޮންޓްރެކްޓް ކުރަނީ ދިވެހި ކުންފުނިތަކަށް ކަމަށާއި ދިވެހި ކުންފުނިތައް ލައްވާ މަސައްކަތް ކުރުވާ ކަމަށެވެ. އަދި ގިނަ ފަހަރަށް އެ ރަށެއްގެ ކުންފުންޏަކަށް ފުރުސަތު ދެވިގެންދާ ކަމަށާއި ބޭނުން ވަނީ ފައިސާ ރާއްޖޭގެ އިޤްތިޞާދުގެ ތެރޭގައި ދައުރުވާނެ ގޮތެއް ހެދުން ކަމަށް ޝާހު ވިދާޅުވިއެވެ.
ޕްރޮޖެކްޓުތައް ނުހުއްޓި ކުރިއަށް ގެންދިޔުމަށްޓަކައި ޕްރޮޖެކްޓްގެ ކޮމްޕޯނަންޓްތައް ބަހާލައިގެން ކުރާ ކަމަށާއި ކުންފުނިން މަސައްކަތް ކުރަނީ ޕްރޮޖެކްޓްތައް ނުހުއްޓި ކުރިއަށް ގެންގޮސް ނިންމުމަށް ކަމަށް ޝާހު ވިދާޅުވިއެވެ.
ވަރަށް ގިނަ ރަށްރަށުގެ ކައުންސިލާއި ރައްޔިތުން ޕްރޮޖެކްޓްތަކާ ގުޅިގެން އިތުބާރު ބޭނުންވާ ކަމަށާއި އެ ކުންފުނިން ޕްރޮޖެކްޓްތައް ހިންގުމަށް ބޭނުންކުރަނީ ކޮލެޓީ ރަނގަޅު ޕްރޮޑަކްޓްތައް ކަމަށް ވިދާޅުވިއެވެ.
އެމްޑަބްލިޔުއެސްސީން މިހާރު ޕްރޮޖެކްޓްތައް ކުރިއަށް ގެންދާ ބައެއް ރަށްރަށަކީ އއ. މަތިވެރި، ބ. މާޅޮސް، ރ. އިންނަމާދޫ، ށ. ފީވަށް، އަދި ލ. ފޮނަދޫއެވެ.
ޕްރޮގްރާމުގައި އިތުރަށް ވާހަކަ ދައްކަވަމުން ޝާހު ވިދާޅުވީ ނަރުދަމާއަށް ކުރަން ޖެހޭ ޚަރަދު ބޮޑުވުމުން އެކަމުން ފައިދާ ނުވާ ކަމަށެވެ.
މެއިންޓެނަންސްއަށް ޓަކައި އަބަދު އަތުން ޚަރަދުދާކަން ފާހަގަކުރައްވައި ޝާހު ވިދާޅުވީ މުސްތަޤްބަލުގައި ވެސް އޮތީ ނަރުދަމާއަށް އެކުންފުނިން ބޮޑު ޚަރަދެއްދާ ގޮތަށް ކަމަށެވެ. ތިމާވެށި ހިމާޔަތް ކުރުމަށާއި ހުރިހާ ކަމަކަށް ބަލާއިރު ރޯ ނަޖިސް ޑަމްޕް ކުރެވެން ނެތް ކަމަށް ވިދާޅުވިއެވެ. ސީދާ ފަރުތަކަށް ދޫކުރެވޭ ނަޖިހުގެ ސަބަބުން ފަރުތަކަށް ބޮޑެތި ގެއްލުންތަކެއް ލިބެމުން އަންނައިރު، އެތަންތަނަށް ފަރުވާކުރުމަށް ވެސް ބޮޑު ޚަރަދެއް ހިނގާނެ ކަމަށް ޝާހު ވަނީ ފާހަގަކުރައްވާފައެވެ.
މީގެ އިތުރުން މިކަމުގެ ސަބަބުން ލިބޭ ގެއްލުންތަކާމެދު ރައްޔިތުން ހޭލުންތެރިކުރުވުމަކީ ވަރަށް މުހިންމު ކަމެއްގެ ގޮތުގައި ޝާހް ވިދާޅުވިއެވެ. އެގޮތުން ނަރުދަމާ ނިޒާމުގެ ތެރެއިން މޫދަށް ދޫކުރާ ނަޖިހުގެ ސަބަބުން މޫދަށް އެރޭ މީހުންނަށް ލިބޭ ގެއްލުންތައް ފާހަގަކުރައްވައި ޝާހު ވިދާޅުވީ، މާލޭގެ ސްވިމިންގ ޓްރެކަށް މޫދަށް އެރުމުގެ ސަބަބުން ކަންފަތުގައި ޖަރާސީމު އުފެދޭކަމަށް ޑޮކްޓަރުން ބުނެފައިވާ ކަމަށެވެ. އަދި މިހާލަތު ރާއްޖޭގެ އެހެން ގިނަ ރަށްތަކެއްގައި ވެސް ތަކުރާރު ވަމުން އަންނަ ކަމަށެވެ.
އެހެންކަމުން ތިމާވެށި ހިމާޔަތް ކުރަން ބޭނުންނަމަ ނަރުދަމާގެ ނިޒާމުން ތިމާވެއްޓަށް ލިބެމުން އަންނަ ގެއްލުންތައް ހުއްޓުވުމަށްޓަކައި ރައްޔިތުންގެ އަތުން ފީއެއް ނެގުމަކީ ރަނގަޅު ކަމެއް ކަމުގައި ޝާހު ވިދާޅުވިއެވެ.
