އިޔާދަކުރަނިވި ހަކަތައަށް ބަދަލުވުމުގައި ރާއްޖެއާ ބައިވެރިވުމަށް ދުނިޔެއަށް ޝައުނާ ގޮވާލައްވައިފި
އިޔާދަކުރިނިވި ހަކަތައަށް ބަދަލުވުމަކީ ހަމައެކަނި މޫސުމަށް އަންނަ ބަދަލުތަކުގެ އަސަރުކުޑަކުރުމަށް ކުރާކަމެއް ނޫން
ކޮޕް26 ކޮންފަރެންސްގެ ހަވާސާ ބައްދަލުވުމެއްގައި އެންވަޔަރަންމަންޓް މިނިސްޓަރ ވާހަކަދައްކަވަނީ
މިހާރު ކުރިޔަށްދާ ކޮޕް26 ކޮންފަރެންސްގެ ހަވާސާގައި ކުރިޔަށްދިޔަ އެނަރޖީ ޑޭ ހަރަކާތުގައި ވާހަކަދައްކަވަމުން ރާއްޖެއިން އިޔާދަކުރަނިވި ހަކަތައަށް ދިޔުމަށްކުރަމުންދާ މަސައްކަތްތަކަށް އެންވަޔަރަންމަންޓް މިނިސްޓަރ އައިމިނަތު ޝައުނާ އަލިއަޅުވާލައްވައިފިއެވެ.
އެނަރޖީ ޑޭ އޯޕަނިންގ އިވެންޓްގައި ވާހަކަދައްކަވަމުން މިނިސްޓަރ ވިދާޅުވީ ރާއްޖެފަދަ ގައުމުތަކަށް އިޔާދަކުރިނިވި ހަކަތައަށް ބަދަލުވުމަކީ ހަމައެކަނި މޫސުމަށް އަންނަ ބަދަލުތަކުގެ އަސަރުކުޑަކުރުމަށް ކުރާކަމެއް ނޫންކަމަށެވެ. އެހެންނަމަވެސް މޫސުމަށް އަންނަ ބަދަލުތަކާ ގުޅިގެން ކުރިމަތިވާ ކަންކަމަށް އެޑަޕްޓްވުމާއި އެބަދަލުތަކުން ކުރާ އަސަރުތަކުން އަރައިގަތުމަށް ވެސް މުހިންމުކަމެއްކަމަށެވެ.
ރާއްޖެއަކީ ހަކަތަ އުފެއްދުމުގައި ވަރަށް ބޮޑަށް ތެލަށް ބަރޯސާވާ ގައުމެއްކަމަށް ޝައުނާ ވިދާޅުވިއެވެ. އެކަމަށް ދައުލަތުގެ ބަޖެޓުން އެތައް ހޭދައެއްކުރާކަމަށް ވެސް ޝައުނާ ވިދާޅުވިއެވެ. ނަމަވެސް ސަރުކާރުން މިހާރު ހަކަތަ އުފެއްދުމުގައި ތެލަށް ބަރޯސާވުން ކުޑަކޮށް އިޔާދަކުރަނިވި ހަކަތައަށް ދިޔުމުގެ ސިޔާސަތެއް ގެންގުޅޭކަމަށް ވިދާޅުވެ ޝައުނާ ވަނީ މިކަމުގައި ސަރުކާރުން ގެންގުޅޭ ސިޔާސަތުގެ މައްޗަށް ވެސް އަލިއަޅުވާލައްވާފައެވެ.
އަދި އިޔާދަކުރިނިވި ހަކަތައަށް ދިޔުމުގައި ރާއްޖެއަށް ވަރަށް ބޮޑަށް ބޭރުގެ އެހީތެރިކަމާއި ފައިސާ ބޭނުންވާނެކަމަށް ޝައުނާ ވިދާޅުވިއެވެ. އަދި ނެޓް ޒީރޯއަށް ވާސިލުވުމަކީ ހަމައެކަނި އެންމެ ގައުމެއްގެ ކަމެއްނޫންކަމަށް ވިދާޅުވެ ޝައުނާ ވަނީ މިކަމުގެ ފަހަތުގައިވާ ސައިންސް ދެނެގަނެ މުޅި ދުނިޔެ ހަކަތަ އުފެއްދުމުގައި އިޔާދަކުރަނިވި ހަކަތައަށް ބަދަލުވުމަށް ގޮވާލައްވާފައެވެ.
މިބައްދަލުވުމުގައި ވަނީ ދުނިޔެއިން ހަކަތަ އުފެއްދުމުގައި ބޯޓުދެލި އެންދުން ހުއްޓުވުމަކަށް ގެނައުމަށް އެހެން ގައުމުތަކުގެ މިނިސްޓަރުން ވެސް ގޮވާލައްވާފައެވެ. އަދި ހުރިހާ އެންމެން ގުޅިގެން މިކަމުގައި ނަތީޖާ ހާސިލުކުރުމާމެދު ވަނީ ވާހަކަދައްކަވާފައެވެ.
