ށ. ގޮއިދޫ އަނެއްކާވެސް މޮނިޓަރިންގގެ ހާލަތަށް!

ށ.ގޮއިދޫއިން ކޮވިޑް-19ގެ ކޭސްތަކެއް ފެނުމާގުޅިގެން އެރަށް އަނެއްކާވެސް މޮނިޓަރިންގއަށް ލައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ ކޮވިޑު-19އާ ގުޅިގެން ސިއްހީ ގޮތުން އިތުރަށް ބަލަންޖެހޭ ކަންކަން ބެލުމަށް, 3 ނޮވެމްބަރު ވީ ބުދަ ދުވަހު ގޮއިދޫ މޮނިޓަރިންގގެ ހާލަތަށް ގެނެސްފައިވާ ކަމަށެވެ.

އެޗްޕީއޭއިން ބުނިގޮތުގައި ކޮވިޑް-19އިން ރައްކާތެރިކުރުމަށް "އާންމު ސިއްހަތު ރައްކާތެރިކުރުމުގެ ގާނޫނު"ގެ 12 ވަނަ މާއްދާގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިފައިވާ ގާނޫނީ އިޚްތިޔާރުތަކުގެ ތެރެއިން، މިކަން ކުރީ އިތުރަށް ބަލަންޖެހޭ ކަންކަން ބެލުމަށް ކަމަށެވެ. އަދި ވަކިގޮތެއް އަންގަންދެން އެ ރަށުން ފޭބުމާއި، ހުއްދަނެތި އެއްވެސް މީހަކު އެރަށަށް އެރުން މަނާވާނެ ކަމަށް އެޗްޕީއޭއިން ބުނެއެވެ.

ގޮއިދޫ ކައުންސިލުން ބުނީ މި ހުސްވި އޮކްޓޯބަރު މަހުގެ 28 ވީ ބުރާސްފަތި ދުވަހު, ފްލޫ ކްލިނިކުން ނެގި 4 ސާމްޕަލެއް ޕޮޒިޓިވްވެފައިވާ ކަމަށެވެ. މިހާރުވެސް ކޮންޓެކްޓް ޓްރޭސިންގގެ މަސައްކަތްތައް ކުރަމުންދާއިރު، ޑައިރެކްޓް ކޮންޓެކްޓުންގެ ގޮތުގައި ފާހަގަކުރެވުނު އިތުރު މީހުންވެސް ބައްޔަށް ޕޮޒިޓިވްވެފައިވާ ކަމަށް ކައުންސިލުން ބުނެއެވެ.

ގޮއިދޫ ކައުންސިލުން އިތުރަށް ބުނިގޮތުގައި މިހާތަނަށް ގޮއިދޫއިން ނެގުނު 49 ސާމްޕަލްގެ ތެރެއިން 19 ސާމްޕަލްއެށް ކޮވިޑް 19އަށް ޕޮޒިޓިވްވެފައިވާކަމަށާއި، ނަތީޖާ ނުލިބި 2 ސާމްޕަލް އެބަހުރި ކަމަށެވެ. ޕޮޒިޓިވްކޭސްތަކާއި ގުޅިގެން 19 ގެއެއް މޮނިޓަރިންއަށް ލާފައިވާއިރު، ކޮންޓެކްޓް ޓްރޭސިންގެ ދަށުން އިތުރުން 19 ގެއެއްވެސް ވަނީ މޮނިޓަރިންއަށް ލާފައިއެވެ.

ށ.ގޮއިދޫ ވަނީ މި ދިޔަ ޖުލައި މަހުވެސް ކޮވިޑް ގެ ކޭސްތަކެއް ފެނިގެން މޮނިޓަރިންގއަށް ލާފައެވެ.