ނަޞްރުގެ ދުވަހު ކުޅުދުއްފުށީގައި ޚާއްސަ ހިނގާލުމެއް ބާއްވަނީ
2 ނޮވެމްބަރު 2021 | އަންގާރަ 13:12މިހިނގާލުމުގައި ޢަފީފުއްދީން ސްކޫލްގެ ސީނިއަރ ކެޑޭޓުންނާއި، ކުރީގެ ދަރިވަރުންނާއި އަދި ބޭންޑްވެސް ބައިވެރިވާނެ
ކުޅުދުއްފުށީގައި ބޭއްވި ޕެރޭޑެއްގެ ތެރޭން
ނަޞްރުގެ ދުވަހާ ގުޅުވައިގެން ކުޅުދުއްފުށީގައި ޚާއްސަ ހިނގާލުމެއް ބާއްވަން ހަމަޖެހިފައިވާކަމަށް ކުޅުދުއްފުށީ ސިޓީ ކައުންސިލުން ހާމަކޮށްފިއެވެ. ސިޓީ ކައުންސިލާއި ޢަފީފުއްދީން ސްކޫލް ގުޅިގެން ދުވަހުގެ ހަރަކާތްތައް ކުލަގަދަކޮށް ފާހަގަކުރަން ނިންމާފައިވާއިރު، ހިނގާލުން ކުރިއަށްދާނީ މާދަމާ ހަވީރު ކުޅުދުއްފުށީގެ ބޮޑެތި މަގުތަކުގައެވެ.
މިމިހިނގާލުމަކީ ކުޅުދުއްފުށީގެ އެންމެހާ ރައްޔިތުންނަށް ބައިވެރިވުމުގެ ފުރުސަތު ހުޅުވާލައިގެން ކުރިއަށްގެންދާ ހަރަކާތެކެވެ. މިހިނގާލުމުގައި އަފީފުއްދީން ސްކޫލުގެ ސީނިއަރ ކެޑޭޓުންނާއި ކުރީގެ ކެޑޭޓް އިސްދަރިވަރުން އަދި ބޭންޑްވެސް ބައިވެރިވާނެ ކަމަށް ސިޓީކައުންސިލުން ބުނެއެވެ.
މީގެ އިތުރުން ކުޅުދުއްފުށީގެ ދާއިރާތަކުގެ މަޖްލިސްމެންބަރުންނާއި، ކުޅުދުއްފުށީ ސިޓީގެ ސްކޫލްތަކުގެ ދަރިވަރުންނާއި، ސަރުކާރުގެ މުއައްސަސާތަކުގެ މުއައްޒަފުން ބައިވެރިވުމަށް ވަނީ ހަމަޖެހިފަ އެވެ. މިހިނގާލުމުގައި ބޭންޑްގެ ހަރަކާތްތައް ވެސް ފެނިގެންދާނެ އެވެ.
މިހިނގާލުން ފެށުމަށް ހަމަޖެހިފައިވަނީ މާދަމާ ހަވީރު 4:00ގައި ކުޅުދުއްފުށީ ސިޓީ ކައުންސިލް އިދާރާ ކުރިމަތިންނެވެ.
