ކުރިއަށް އޮތް ފުޓްބޯޅަ ސީޒަނަށް ތައްޔާރުވުމުގެ ގޮތުން މާޒިޔާ ސްޕޯޓްސް އެންޑް ރެކްރިއޭޝަނުން ފަރިތަކުރުންތައް ފަށައިފިއެވެ.
މާޒިޔާގެ ކޯޗުގެ މަގާމާ ދާދި ފަހުން ހަވާލުވި މުޙައްމަދު ޝިޔާޒް (މޯހަން) ގެ އިތުޝާދުގެ ދަށުން މާޒިޔާއިން ފަރިތަކުރުންތައް ފަށާފައިވަނީ ހޯމަ ދުވަހުގެ ހަވީރު މާފަންނު ޓާފް ދަނޑުގައެވެ. މާޒިޔާއިން ފަރިތަކުރުންތައް ފެށި ނަމަވެސް، އެ ޓީމުގެ ފަރިތަކުރުންތަކުގައި ގައުމީ ޓީމުގައި ހިމެނޭ ކުޅުންތެރިން ބައިވެރިއެއް ނުވެއެވެ.
މާޒިޔާއިން ބުނީ ގައުމީ ޓީމުގައި ހިމެނޭ ކުޅުންތެރިން އެ ޓީމުގެ ފަރިތަކުރުންތަކުގައި ބައިވެރިވާނީ ސްރީ ލަންކާގައި މި މަހު ފަށާ މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް) އަށްފަހު ކަމަށެވެ. އެހެންކަމުން ހޯމަ ދުވަހު މާޒިޔާއިން ފަރިތަކުރުންތައް ފަށާފައިވަނީ އެ ޓީމުގެ ޔޫތު ޓީމުގެ ބައެއް ކުޅުންތެރިންނާއެކުގައެވެ.
ކުރިއަށް އޮތް ސީޒަނަށް މާޒިޔާއިން އެ ޓީމުގެ ކޯޗަކަށް މޯހަން ހަމަޖައްސާފައިވާއިރު، މާޒިޔާގެ ކޯޗަކަށް އޭނާ ހަމަޖެއްސީ އަންނަ ސީޒަނުގެ ނިޔަލަށެވެ. މާޒިޔާގެ ކޯޗަކަށް މޯހަން ހަމަޖެއްސިއިރު، އެ ޓީމަށް މިދިޔަ ސީޒަނުގައި ކޯޗުކޮށްދިން ސާބިއާގެ ރިސްޓޯ ވިޑަކޮވިޗް ވަނީ އެ ޓީމާއެކު ހަދާފައިވާ އެއްބަސްވުން ފުރިހަމަކޮށް އިންޑޮނީޝިއާގެ ކުލަބު ބޯނިއޯއާ ގުޅިފައެވެ.
ކުރިއަށް އޮތް ސީޒަނަށް މޯހަން މާޒިޔާއާ ހަވާލުވިއިރު، އެންމެ ފަހުން އޭނާ އިރުޝާދުދީފައިވަނީ މިދިޔަ ސީޒަނުގެ ފުރަތަމަ ޑިވިޝަނުގައި މުޅިން އަލަށް ވާދަކުރި ސުޕަ ޔުނައިޓެޑް ސްޕޯޓްސް (ސަސް) އަށެވެ. އެކަމަކު ދާދި ފަހުން ސަސްއިން ވަނީ ދެ ފަރާތް އެއްބަސްވެގެން މޯހަންގެ އެއްބަސްވުން އުވާލާފައެވެ. މޯހަންއަކީ ފުރަތަމަ ޑިވިޝަނުގައި މާޒިޔާއަށް އިރުޝާދުދޭނެ ދިވެހި ހަތަރުވަނަ ކޯޗެވެ.
ކުރިއަށް ސީޒަނަށް މޯހަން މާޒިޔާއާ ހަވާލުވިއިރު، ރާއްޖޭގެ ފުޓްބޯޅަ ސީޒަން ފަށާނީ މި އަހަރުގެ ޑިސެމްބަރު މަހުގެ ތެރޭގައި ޕްރެޒިޑެންޓްސް ކަޕުންނެވެ. އަދި އެއަށްފަހު ކުރިއަށް އޮތް ސީޒަނުގެ ދިވެހި ޕްރިމިއާ ލީގު ފެށުމަށް ތާވަލުކޮށްފައިވަނީ އަންނަ އަހަރުގެ ފެބްރުއަރީ މަހުގެ ތެރޭގައެވެ. މާޒިޔާއަކީ އެންމެ ފަހުގެ ދެ ސީޒަނުގެވެސް ލީގު ޗެމްޕިއަނުންނެވެ.
