ޖިންސީ ގޯނާގެ އެކި މައްސަލަތަކުގައި 30 މުވައްޒަފަކު ވަޒީފާއިން ވަނީ ވަކިކޮށްފައި - މިނިސްޓަރ

ޖިންސީ ގޯނާގެ އެކި މައްސަލަތަކުގައި 30 މުވައްޒަފަކު މިހާތަނަށް ވަޒީފާއިން ވަކިކޮށްފައިވާ ކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވެއްޖެއެވެ.

ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި، ގަލޮޅު ސްކޫލުގައި ކުއްޖަކަށް ޖިންސީ ގޯނާ ކުރި މައްސަލައާ ގުޅިގެން މިނިސްޓްރީން އަޅާފައިވާ ފިޔަވަޅުތައް ސާފުކުރުމަށް ހިންނަވަރު ދާއިރާގެ މެމްބަރު ޖީހާން މަހުމޫދު ކުރެއްވި ސުވާލަކަށް ޖަވާބު ދެއްވަމުން މިނިސްޓަރ ވިދާޅުވީ، އެޑިއުކޭޝަން ދާއިރާގައި ޖިންސީ ގޯނާގެ 40 ވަރަކަށް މައްސަލަ މިހާތަނަށް ހުށަހެޅި ބެލިފައިވާ ކަމަށާއި، އޭގެ ތެރެއިން 30 މުވައްޒަފަކު ވަޒީފާއިން ވަކިކޮށްފައިވާކަމަށެވެ. ޖިންސީ ގޯނާގެ މައްސަލަތަކަކީ މިނިސްޓްރީން ވަރަށް ސީރިއަސް މައްސަލަތަކެއްގެ ގޮތުގައ ބަލަމުންދާ މައްސަލަތަކެއްކަމަށް މިނިސްޓަރ ވިދާޅުވިއެވެ.

މިހާރުވެސް ޖިންސީ ގޯނާއާ ގުޅޭ 7 ވަރަކަށް މައްސަލަ މިނިސްޓްރީން ބަލަމުންދާއިރު ތުހުމަތު ކުރެވޭ ހުރިހާ މުވައްޒަފުން ތިބީ ސަސްޕެންޑް ކުރެވިފައި ކަމަށެވެ.

ގަލޮޅު މަދަރުސާގައި ހިނގި ހާދިސާ މިނިސްޓްރީއަށް ރިޕޯޓް ކުރި ވަގުތުން ފެށިގެން ވަރަށް ސީރިއަސް މައްސަލައެއްގެ ގޮތުގައި ބައްލަވަމުން ގެންދަވާ ކަމަށާއި، އެވަގުތުން ފެށިގެން ތުހުމަތުކުރެވޭ ދެ މީހަކު ސަސްޕެންޑްކޮށް، މިކަމުގައި ޝާމިލުވާ މީހާ ވެސް ހައްޔަރު ކޮށްފައިވާކަމަށެވެ.

ފުލުހުން ބުނެފައިވަނީ އެ މައްސަލައިގައި ހައްޔަރުކުރީ އުމުރުން 63 އަހަރުގެ އަންހެނެއް ކަމަށެވެ. އަދި މި މީހާ ހައްޔަރުކުރީ ކޯޓް އަމުރެއްގެ ދަށުންކަމަށް ވެސް ފުލުހުންވަނީ ބުނެފައެވެ. މި މައްސަލަ ފެންމަތިވުމުން ގަލޮޅު ސްކޫލުން އަމާޒުވި ފާޑުކިޔުންތަކާ ގުޅިގެން އެ ސްކޫލުން ނެރުނު ބަޔާނެއްގައި ބުނެފައިވަނީ ޓީޗަރުންގެ ބެލުމުގެ ދަށުން ދަރިވަރުން ފާހާނާއަށް ފޮނުވަންޖެހޭ ގޮތަށް ހަމަޖައްސާފައިވާކަމަށެވެ. އަދި ސްކޫލްގެ އެކި ސަރަހައްދުގައި 18 ސީސީޓީވީ ކެމެރާ ހަރުކޮށް މޮނީޓަރ ކުރަން ފަށާފައިވާކަމަށެވެ.

ސްކޫލު މާހައުލަކީ ދަރިވަރުންނަށް ރައްކާތެރި މާހައުލަކަށް ހެދުމަށްޓަކައި، ސްކޫލުތަކުގައި ސެކިއުރިޓީ އޮފިސަރުން ބައިތިއްބާފައިވާ ކަމަށެވެ. އަދި ކޮންމެ ސްކޫލެއްގައި ވެސް ސީސީޓީވީ ކެމެރާ ހަރުކޮށް މިފަދަ އަމަލުތަކަށް ޖާގަ ނުދެވޭނެ ގޮތަކަށް އިންތިޒާމުތައް ހަރުދަނާ ކުރަމުންދާ ކަމަށް މިނިސްޓަރ ވިދާޅުވެފައެވެ.

މިނިސްޓަރ ވިދާޅުވީ ތައުލީމު އުގަންނައިދޭ ތަންތަނަކީ ކުދިންނަށް ރައްކާތެރި ތަނަކަށް ހެދުމަށް މިނިސްޓްރީން ކެނޑިނޭޅި މަސައްކަތް ކުރައްވާނެ ކަމަށެވެ. އެ ޔަގީންކަން އެންމެހާ ބެލެނިވެރިންނަށް ވެސް މިނިސްޓަރ ދެއްވިއެވެ. އެފަދަ ހާދިސާތައް ނުހިނގާނެ ގޮތަކަށް ކަންކަން ތަރުތީބު ކުރަމުން ގެންދަވާ ކަމަށާއި، ޓީޗަރުންނަށް ލައިސަންސް ދިނުމަށް ކަނޑައަޅާފައިވާއިރު، ދަރިވަރުންނާ ދިމާވާނެ އެހެން މުވައްޒަފުންނަށް ވެސް ލައިސަންސެއް ދިނުމަށް މަސައްކަތް ކުރަައްވަމުން ގެންދަވާ ކަމަށް މިނިސްޓަރ ވިދާޅުވިއެވެ.