ވ. ފުލިދޫ ސްކޫލުގެ މަލްޓިޕަރޕަސް ހޯލުގެ މަސައްކަތް ނުފެށި ލަސްވަނީ އެކަމަށް ބޭނުންވާ ބިން ހަމަޖެހިފައި ނެތުމުން ކަމަށް އެޑިއުކޭޝަން މިނިސްޓަރ އައިޝަތު އަލީ ވިދާޅުވެއްޖެއެވެ.

މިނިސްޓަރ މިހެން ވިދާޅުވީ، ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި، ފެލިދޫ ދާއިރާގެ މެންބަރު އިބްރާހީމް ފަޟުލް ރަޝީދު، މިކަމާ ގުޅޭގޮތުން ކުރެއްވި ސުވާލަށް ޖަވާބު ދެއްވަމުންނެވެ. މިނިސްޓަރ ވިދާޅުވީ، ފުލިދޫ ސްކޫލްގެ ހޯލު އަޅާނެ ބިމެއް ސްކޫލްގެ ގޯތިތެރޭގައި މިވަގުތު ނެތް ކަމަށެވެ. ހޯލު އަޅަން ޕްރޮޕޯޒް ކޮސްފައި އޮތީ ބައު ހޯލާއި، އޭވީ ރޫމް ހުރި ތަނުގައި ކަމަށެވެ. ހޯލު އެޅެން އޮތީ އެތަން ތަޅާލާފައި ކަމަށް މިނިސްޓަރ ވިދާޅުވިއެވެ. ސްކޫލްގައި މިވަގުތު ހުރީ 4 ކްލާސްރޫމާއި ހޯލް އިމާރާތެއް ކަމަށެވެ. އެހެންކަމުން ބައެއް ގްރޭޑްތަކުގެ ކިޔެވުން ކުރިއަށް ގެންދަނީ މަލްޓި ގްރޭޑްކޮށްކަން މިނިސްޓަރ ފާހަގަކުރެއްވިއެވެ. މޮނޮގްރޭޑްކޮށް ކިޔަވައި ދިނުމަށް މިހާރުވެސް އެ ސްކޫލަށް 8 ކްލާސްރޫމް ބޭނުންވާކަމަށް ވިދާޅުވިއެވެ.

މިހާރު ހުރި ހޯލް އިމާރާތް ތަޅާލުމަށްފަހު މަލްޓިޕަރޕަސް ހޯލް އަޅާއިފިނަމަ ކުދިން ކިޔަވާނެ ޖާގައެއް ސްކޫލްގައި ނޯންނާނެކަން މިނިސްޓަރ ފާހަގަކުރެއްވިއެވެ.

ހޯލް އެޅުމަށް ސްކޫލުގެ އުތުރަށް އޮތް ބިމުން 80 ފޫޓާއި 100 ފޫޓުގެ ބިމެއް ހަމަޖެހިއްޖެނަމަ ހޯލުގެ މަސައްކަތް ކުރިއަށްގެންދަން ފަސޭހަވާނެކަން ފާހަގަކުރައްވަމުން މިނިސްޓަރ ވިދާޅުވީ، އެކަން މިހާރު ކައުންސިލާ ހިއްސާ ކުރައްވާފައިވާ ކަމަށެވެ. އަދި ކައުންސިލުން އެކަމާ ގުޅޭގޮތުން ރައްޔިތުންނާ މަޝްވަރާ ކުރެއްވުމަށްފަހު ގޮތެއް ނިންމަވާނެ ކަމަށެވެ.

އެ ބިން ލިބުނުހާ އަވަހަށް ޓެންޑަރިންއަށް ފޮނުވޭނެ ކަމަށާއި، ހޯލުގެ ޑިޒައިންގެ މަސައްކަތް ވެސް މިހާރު ނިމިފައިވާ ކަމަށް މިނިސްޓަރ ވިދާޅުވިއެވެ.