ދުނިޔޭގެ ފިނިހޫނުމިން 1.5 ގައި ހިފެހެއްޓިފައި ނުވާކަން ފާހަގަކުރައްވައި، ދުނިޔޭގެ ފިނިހޫނުމިން 2 ޑިގްރީއަށް މައްޗަށް ދިޔަ ނަމަވެސް، ރާއްޖެ ދެމިއޮތުމަށް ހިޔަނި އެޅިގެންދާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ވިދާޅުވެއްޖެއެވެ.

ޔުނައިޓެޑް ނޭޝަންސް ކްލައިމެޓް ޗޭންޖް ކޮންފަރެންސް އޮފް ދަ ޕާޓީސް (ކޮޕް26)ގެ ވޯލްޑް ލީޑަރސް ސަމިޓްގައި ވާހަކަފުޅު ދައްކަވަމުން ރައީސް ވިދާޅުވީ، ދުނިޔޭގެ އެހެން ޤައުމުތަކާ ވެސް އެ ހަޤީޤަތާ ކުރިމަތިލާންޖެހޭނެކަމަށެވެ. ރައީސުލްޖުމްހޫރިއްޔާގެ ވާހަކަފުޅުގައި ރާއްޖެއަކީ ވެސް މޫސުމަށް އަންނަ ބަދަލުތަކުގެ ސަބަބުން ކުރިމަތިވާ މައްސަލަތަކަށް ޙައްލެއް ހޯދުމަށް ދުނިޔޭގެ ފެންވަރުގައި މަސައްކަތް ކުރަމުންދާ ޤައުމެއްކަމަށާއި، މި ޙާލަތަކީ ހަމައެކަނި އެއް ޤައުމަކުން ކުރާ މަސައްކަތުން ޙައްލު ހޯދޭނެ ކަމެއް ނޫން ކަމަށެވެ.

މޫސުމަށް އަންނަ ބަދަލުތަކުގެ ސަބަބުން ރާއްޖެ ހުށަހެޅިފައިވާ ނުރައްކާތެރި ހާލަތު ބަޔާންކުރައްވައި ރާއްޖެއިން ދައްކަމުންގެންދާ ވާހަކަތައް ދުނިޔޭގެ ލީޑަރުން އަޑުއަހާނީ ކޮންކަމެއް ކޮށްދީގެންތޯ ރައީސުލްޖުމްހޫރިއްޔާ ސުވާލު އުފެއްދެވިއެވެ.

ރައީސުލްޖުމްހޫރިއްޔާ ވަނީ މޫސުމަށް އަންނަ ބަދަލުތަކުގެ ސަބަބުން ދިވެހިންގެ ދިރިއުޅުމަށް ކޮށްފައިވާ ނޭދެވޭ އަސަރުތައް މި ސަމިޓުގައި ބައިވެރިވެވަޑައިގެންނެވި ލީޑަރުންނާ ޙިއްޞާކުރައްވާފައެވެ. ފާއިތުވި މަހެއްހާ ދުވަހުގެ ތެރޭގައި އެމަނިކުފާނު ރާއްޖޭގެ ބައެއް ރަށްރަށަށް ކުރެއްވި ދަތުރުފުޅުތަކުގެ ތަޖުރިބާ ޙިއްޞާކުރައްވަމުން ވިދާޅުވީ، ފާއިތުވި މަހެއްހާ ދުވަހުގެ ތެރޭގައި ރާއްޖޭގެ 6 ރަށަކަށް ޒިޔާތްކުރެއްވިއިރު ކޮންމެ ރަށަކީ ވެސް ރަށް ގިރުމުގެ މައްސަލަ ކުރިމަތިވެފައިވާ ރަށެއް ކަމަށެވެ. އެހެންކަމުން ރަށަކަށްފަހު ރަށެއް ފެނުއަޑިއަށް ދިއުމުގެ ބިރު މިހާރު ހީވާން ފަށާފައިވާކަމަށެވެ. މިއީ ދިވެހިންނާ މިއަދު ކުރިމަތިލާންޖެހިފައިވާ އެއް ހަޤީޤަތްކަމުގައިވާ މޫސުމަށް އަންނަ ބަދަލުތަކުގެ ނޭދެވޭ އަސަރުތަކުގެ ކުޑަ މިސާލެއްކަން އެމަނިކުފާނު ފާހަގަކުރެއްވިއެވެ.

އެމަނިކުފާނު ވަނީ ޖައްވަށް ވިހަގޭސް ބޭރުކުރާ ބޮޑެތި ޤައުމުތަކުން، މޫސުމަށް އަންނަ ބަދަލުތަކުގެ ސަބަބުން ތިމާވެއްޓަށް ކުރާ ނޭދެވޭ އަސަރުތަކުން އަރައިގަތުމަށް ވެފައިވާ ވަޢުދުތައް ފުއްދުމަށާއި ތިމާވެއްޓަށް ކުރާ ނޭދެވޭ އަސަރުތަކަށް މާލީ އެހީތެރިކަން ފޯރުކޮށްދިނުމަށް ޕެރިހުގައި ވެފައިވާ ވަޢުދުތައް ފުއްދުމަށް ކުރާ މަސައްކަތްތައް އިތުރުކުރުމަށް ވެސް ގޮވާލައްވާފައެވެ. އެހެންނަމަވެސް ކުރިންދީފައިވާ ޔަޤީންކަމާ އެއްގޮތަށް ކަންކަން ފަހިކުރުމުގެ ގޮތުން، ހުރަސްތައް ނައްތާލުމާއި ކުރަންޖެހޭ ދިރާސާތައްކުރުމާއި ލިޔެކިޔުންތައް ތައްޔާރުކުރުންފަދަ ކަންކަން، ކުރިން ކުރެވިފައި ނެތުމުން މޫސުމަށް އަންނަ ބަދަލުތަކުގެ ސަބަބުން ކުރިމަތިލާންޖެހިފައިވާ ޙާލަތުގެ ނާޒުކުކަން އިޙްސާސް ކުރެވިފައި ނުވާކަން އަންގައިދޭކަމަށާއި އަދި އެއީ ހިތާމަކުރައްވާކަމެއް ކަމުގައި އެމަނިކުފާނު ވިދާޅުވިއެވެ.

މޫސުމަށް އަންނަ ބަދަލުތަކަށް ހޭނުމަށްޓަކައި ޤައުމުތައް އެއްގަލަކަށް އަރައި، އެންމެ ނާޒުކު ޤައުމުތަކަށް އެހީތެރިވާން ޖެހޭކަމުގައި ވެސް ރައީސުލްޖުމްހޫރިއްޔާ ވިދާޅުވިއެވެ. މޫސުމަށް އަންނަ ބަދަލުތަކުގެ ސަބަބުން ނުރައްކަލަށް ހުށަހެޅިފައިވާ ރާއްޖެފަދަ ނާޒުކު ޙާލަތުގައިވާ ޤައުމުތައް ދެމިއޮތުމަށްޓަކައި މޫސުމަށް އަންނަ ބަދަލުތަކުން ކުރާ ނޭދެވޭ އަސަރުތަކަށް މާލީ އެހީތެރިކަން ފޯރުކޮށްދިނުމަށާއި އެއްބަސްވެފައިވާ ގޮތަށް ޒިންމާދާރުކަމާއެކު ހަރުދަނާ ފިޔަވަޅުތަކެއް އެޅުމަށް ދުނިޔޭގެ ލީޑަރުން އެއްބަސްވެވަޑައިގަތުމަށް އެމަނިކުފާނު ގޮވާލެއްވިއެވެ.

ރައީސުލްޖުމްހޫރިއްޔާ ދެއްވި ބަޔާން ނިންމަވާލައްވަމުން ވަނީ މިއީ މޫސުމަށް އަންނަ ބަދަލުތަކުގެ ސަބަބުން ދުނިޔެ ކުރިމަތިލާޖެހިފައިވާ ހާލަތު ބަދަލުކުރުމަށް މަސައްކަތްކުރުމަށް ލިބޭ އެންމެ ފަހު ފުރުޞަތުކަމަށް ވެދާނެކަން ދުނިޔޭގެ ލީޑަރުންނަށް ހަނދާންކޮށްދެއްވައި މި ފުރުޞަތު ބޭކާރުވެގެން ދިޔަނުދިނުމަށް އިލްތިމާސްކުރައްވާފައެވެ.