ކ.ތިލަފުށީގައި ކުނި މެނޭޖް ކުރުމަށް ސިސްޓަމެޓިކް އިންގިލާބީ ބަދަލެއް ގެންނާނެކަމަށް މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވިދާޅުވެއްޖެއެވެ.

ރާއްޖެއެމްވީއަށް ދެއްވި ޚާއްސަ އިންޓަވިޔުއެއްގައި މިނިސްޓަރު ޝައުނާ ވިދާޅުވީ ކުނީގެ މައްސަލަ ހައްލުކުރުމަކީ މިނިސްޓްރީގެ މެންޑިޑޭޓްގައި ހިމެނިފައިވާ ކަމެއް ކަމަށެވެ. އެގޮތުން ރާއްޖޭގެ އެކި ސަރަހައްދުތަކުގައި ކުނި މެނޭޖްކުރުމުގެ މަސައްކަތް އެކި ލެވަލްގައި ކުރިއަށްދާ ކަަމަށެވެ.

މިނިސްޓަރު ޝައުނާ ވިދާޅުވީ ތިލަފުށީގައި ކުނި މެނޭޖްކުރުމަށް ފެށި މަސައްކަތް ވަރަށް ކާމިޔާބު ކަމަށާއި، އެ ސަރަހައްދު ވަރަށް ބޮޑަށް ސާފުކުރެވިފައިވާ ކަމަށެވެ.

ތިލަފުއްޓަކީ ކުނިވަޅުލައިގެން ހިއްކާފައިވާ ރަށެކެވެ. ރާއްޖޭގެ ރަށެއް ގޮތުގައި ތިލަފުށި ހަމަޖެއްސީ 1992 ވަނަ އަހަރުއެވެ. ވޭސްޓްމެނޭޖްމަންޓް އުސޫލުން މާލެއިން އެންމެ ފުރަތަމަ ތިލަފުއްޓަށް ކުނި ގެންދަން ފެށީ 1992 ވަނަ އަހަރު ޖުލައި މަހުގެ 2 ވަނަ ދުވަހުއެވެ. ތިލަފުށީގައި ވޭސްޓްމެނޭޖްމަންޓްގެ މަސައްކަތް ފެށީ 1 ލޭންޑިންގ ކްރާފްޓާއި، 4 ހެވީލޯޑް ޓްރަކާއި، 2 އެކްސްކަވޭޓަރާއި އެއް ލޯޑަރުންނެވެ. މާލޭގެ ކުނީގެ މައްސަލައަށް ހައްލެއް ހޯދުމަށް ކުރެވުނު މި ބޮޑު މަސައްކަތުން، ތިލަފުށި 4.6 މިލިއަން ފޫޓަށް ވަނީ ބޮޑުކޮށްފައެވެ. މީގެއިތުރުން ކުނި ވަކި ނުކޮށް، އެންދުމުގެ ސަބަބުން، މާލެ ސަރަހައްދުގައި ދުންބޯވެ، ތިމާވެއްޓާއި ރައްޔިތުންނަށް އެތައް ގެއްލުންތަކެއް ކުރިމަތިވަމުންދެއެވެ.