2022 ވަނަ އަހަރުގެ ބަޖެޓް: އިޖްތިމާޢީ ރައްކާތެރިކަން ކަށަވަރު ކުރުމަށް 3.1 ބިލިއަން ރުފިޔާ
31 އޮކްޓޯބަރު 2021 | އާދީއްތަ 04:512022 ވަނަ އަހަރު އާސަންދަ ސްކީމަށް ވާނީ 731 މިލިއަން ރުފިޔާ ބަޖެޓު ކޮށްފައި
އާސަންދަ
ރާއްޖޭގެ އިޖްތިމާޢީ ރައްކާތެރިކަން ކަށަވަރުކުރުމަށް އަންނަ އަހަރަށް 3.1 ބިލިއަން ރުފިޔާ ބަޖެޓްގައި ހިމަނުއްވާފައިވާ ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
އިޖުތިމާޢީ ރައްކާތެރިކަމުގެ އޮނިގަނޑުގެ ތެރެއިން ސަރުކާރުން އެއް ކަމަކަށް އެންމެ ބޮޑު ޚަރަދެއް ކުރަމުން އަންނަނީ އާސަންދަ ނިޒާމުގެ ތެރެއިން ރައްޔިތުންނަށް ސިއްޙީ ޚިދުމަތް ކަށަވަރުކުރުމަށެވެ. މިގޮތުން 2022 ވަނަ އަހަރު އާސަންދަ ސްކީމަށް 731 މިލިއަން ރުފިޔާ ބަޖެޓު ކޮށްފައިވާ ކަމަށް ފިނޭންސް މިނިސްޓަރ ވިދާޅިއެވެ.
އާސަންދައިގެ ނިޒާމުގައި އެއްވެސް ލިމިޓެއް ނެތި ހުޅުވާލާފައި ވުމުން އެކަމުގެ ސަބަބުން އިސްރާފުތައްވަމުން އަންނަ ކަމަށް މިނިސްޓަރ ވިދާޅުވިއެވެ. އެހެންކަމުން އެ އިސްރާފުތައް ކުޑަކުރުމަށް ޑޮކްޓަރީ ބޭސް ވިއްކޭނެ އެންމެ މަތީ އަގު މި އަންނަ އަހަރު ކަނޑައަޅައި، ބޭހުގެ ވިޔަފާރިން އެކަށީގެންނުވާ މަތީ މިންވަރުތަކުން ފައިދާ ނެގުމަށް ހުޅުވިފައި ހުރި ދޮރުތައް ބަންދުކުރެވޭނެކަމަށް މިނިސްޓަރ ވިދާޅުވިއެވެ. މީގެ އިތުރުން، ރާއްޖެ އެތެރެކުރާ ބޭސް ޕްރޮކިއޮ ކުރުމުގެ އުސޫލުތައް ހަރުދަނާ ކޮށްގެން އިތުރަށް އަގުތައް ތިރިކުރުމުގެ ފުރުސަތު ހޯދުމަށް ވެސް މަސައްކަތް ކުރާނެ ކަމަށް މިނިސްޓަރ ވިދާޅުވިއެވެ.
އިޖުތިމާއީ ރައްކާތެރިކަން ފޯރުކޮށްދިނުމުގެ ގޮތުން ނިކަމެތިންނާއި، އެކަނިވެރި މައިންނާއި، ޚާއްސަ އެހީއަށް ބޭނުންވާ ފަރާތްތަކާއި އެހެނިހެން އެހީތެރިކަން ބޭނުންވާ ފަރާތްތަކަށް ދޭ އެހީގެ ގޮތުގައި 363 މިލިއަން ރުފިޔާ ބަޖެޓުގައި ހިމަނާފައިވެއެވެ. އަދި ކާޑުގެ ބާވަތްތަކާއި ކަރަންޓުގެ އަގު ހެޔޮކުރުމަށް ސަރުކާރުން ދޭ އެހީގެ އިތުރުން، ދަތުރުފަތުރުގެ އަގު ތިރިކުރުމަށް ދޭ ސަބްސިޑީ ވެސް އަންނަ އަހަރު ދެމުންގެންދާނެއެވެ.
މިނިސްޓަރ ވިދާޅުވީ އިޖުތިމާޢީ ރައްކާތެރިކަމުގެ ދާއިރާއަކީ މި ސަރުކާރު ވެރިކަމަށް އައި އިރު ވަރަށް ބޮޑަށް އަޅާނުލެވި އޮތް ދާއިރާއެއް ކަމަށެވެ. ވަކިން ޚާއްސަކޮށް، މި ދާއިރާގައި ހައްލުކުރަންޖެހޭ ގިނަގުނަ ކަންކަންހުރިއިރު، ދާއިރާ ކުރިއަރުވަން އެކަށީގެންވާ ވަސީލަތްތައް ހޯދައިދީ އިންވެސްޓްމަންޓްތައް ކޮށްފައި ނުވާކަން މިނިސްޓަރ ފާހަގަކުރެއްވިއެވެ.
މިއަހަރުގެ ތެރޭގައި ސ. ހިތަދޫގައި ރީޖަނަލް ޑްރަގް ރިހެބިލިޓޭޝަން ސެންޓަރެއް ގާއިމުކުރަން ބަޖެޓުގައި އަލަށް ހިމަނާފައިވާއިރު، ހުޅުމާލޭގައި ގާއިމުކުރާ ނެޝަނަލް ޑްރަގް އޭޖެންސީގެ ވެލްނަސް ސެންޓަރުގެ މަސައްކަތް ވެސް ކުރިއަށްދާނެއެވެ. މި މަސައްކަތްތަކަކީ ރާއްޖެއަށް މަސްތުވާތަކެތި އެތެރެވާ ދޮރުތައް ބަންދުކޮށް، މަސްތުވާތަކެތީގެ ވަބާގައި ޖެހި މުޖުތަމައުން އެކަހެރިވެފައިވާ ފަރާތްތައް އަނބުރާ މުޖުތަމައަށް ގެނައުމަށް ކުރާ މަސައްކަތެކެވެ.
