ކުޅުދުއްފުށި ސިޓީ ކައުންސިލާއި، ކުޅިވަރާ ބެހޭ ވުޒާރާ އާއި، ޑަބްލިއު ސްޕްޓްސް އަދި ހޭންޑްބޯލް މޯލްޑިވްސް ގުޅިގެން ރާއްޖޭގައި ބާއްވާ ފުރަތަމަ ބޯޗް ހޭންޑްބޯޅަ ކޯޗުން ތަމްރީނުކުރުމުގެ ކޯސް ހޮނިހިރު ދުވަހުގެރޭ ކުޅުދުއްފުށީގައި އިފުތިތާހުކޮށްފިއެވެ.

މި ކޯހުގައި ހއ. އަތޮޅުން ފެށިގެން ޅ. އަތޮޅާ ހަމައަށް 30 ކޯޗުން ބައިވެރިވެއެވެ. އެއް ހަފުތާގެ މުއްދަތަށް ކުރިއަށްގެންދާ މި ކޯޗިން ކޯހުގައި ކިޔަވައިދެއްވާނީ ޕާކިސްތާނުގެ ދެ ކޯޗުންކަމުގައިވާ ބާބާ ސުލްތާން ބަޖުވާ އާއި މުޙައްމަދު ސޮހައިބެވެ. މިއީ މިހާރުގެ ޕާކިސްތާނުގެ ގައުމީ ޓީމުގެ ކޯޗުންނެވެ.

މި ކޯސް އިފުތިތާހުކުރުމަށް ހޮނިހިރު ދުވަހުގެރޭ ކުޅުދުއްފުށި ސިޓީ އެންއޯސީ ހޯލުގައި ބޭއްވި ރަސްމިއްޔާތުގައި ވާހަކަ ދައްކަވަމުން ކުޅުދުއްފުށި ސިޓީގެ މޭޔަރު މުޙައްމަދު އާތިފް ވިދާޅުވީ ލާމަރުކަޒީ ނިޒާމަކީ ވަރަށް ބޮޑަށް ތާއީދުކުރައްވާ ނިޒާމެއް ކަމަށާއި، ކުޅިވަރުގެ ހަރަކާތްތަކާއި މިފަދަ ތަފާތު ކޯސްތައްވެސް މާލޭގެ އިތުރުން އަތޮޅު ތެރެއަށް ލާމަރުކަޒުވެގެން ދިއުމަކީ ވަރަށް ބޮޑަށް އުފާކުރައްވާ ކަމެއްކަމުގައެވެ. އަދި މިކަމުން ދޭހަވަނީ ސަރުކާރުން ކަންކަން ކޮށްދެއްވާނީ މާލެއަށް އެކަނި ނޫން ކަމަށާއި، އަތޮޅުތަކުގެ ކުޅިވަރު ކުރިއެރުވުމަށްވެސް އިސްކަމެއް ދެއްވާ ކަންކަމުގައި ވިދާޅުވިއެވެ.

މި ރަސްމިއްޔާތުގައި ވާހަކަ ދައްކަވަމުން ހޭންޑްބޯލް މޯލްޑިވްސްގެ ނައިބު ރައީސް އަޙުމަދު މުޖުތަބާ ވިދާޅުވީ މި ފަހަރު ކޯސް ހިންގުމުގެ ފުރުސަތު ޑަބްލިއު ސްޕޯޓްސްއަށް ލިބިގެން ދިޔައީ ހޭންޑްބޯޅަ ކުޅުންތެރިން އުފެއްދުމަށާއި، އެ ކުޅިވަރު ކުރިއެރުވުމަށް ޑަބްލިއު ސްޕޯޓްސްއިން ކުރައްވާ މަސައްކަތުގެ ސަބަބުން ކަމަށެވެ. އަދި މިފަދަ ފުރުސަތުތަށް ފަހިވެގެން ދާނީ އެކަމެއް ކުރަން އުޅޭ ބަޔަކަށްކަންވެސް ފާހަގަކުރެއްވިއެވެ.

މިކޯހުގައި ތަމްރީނުވާ ކޯޗުން ކުރިއަށް އޮތްތަނުގައި ރާއްޖޭގައި ބޭއްވޭ އެކިއެކި މުބާރާތްތަކުގައި ބޭނުންކުރުމަށް ހަމަޖެހިފައިވާ ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ. އޮކްޓޯބަރު މަހުގެ 30 ވަނަ ދުވަހުން ފެށިގެން އަންނަ ނޮވެމްބަރު މަހުގެ ހަވަނަ ދުވަހުގެ ނިޔަލަށް ކުރިއަށްދާ މި ކޯހުގެ ޕްރެކްޓިކަލް އޮންނާނީ ކޮންމެ ދުވަހެއްގެ ހަވީރުއެވެ. އަދި ރޭގަނޑު ތިއަރީ ކުލާސްތަށް ކުރިއަށްދާނެއެވެ. މިއީ ދެ ޖިންސަށް އަމާޒުކުރެވިފައިވާ ކޯޗިން ކޭމްޕެކެވެ.

މި ކޯޗިން ކޯސް ނިމުމުން، ނޮވެމްބަރު މަހުގެ ހަތްވަނަ ދުވަހުން ފެށިގެން އެ މަހުގެ 26 ވަނަ ދުވަހުގެ ނިޔަލަށް އިތުރު ކޯޗިން ކޭމްޕެއް ކުރިއަށްދާނެއެވެ. އެއީ ގައުމީ ބީޗް ހޭންޑްބޯޅަ ސްކޮޑަށް ބައިވެެރިން ހޮވުމަށް ބާއްވާ ކޯޗިން ކޭމްޕެކެވެ. މި ކޯޗިން ކޯހާއި ކޯޗިން ކޭމްޕް ހިންގުމުގެ ފުރުސަތު ޑަބްލިއު ސްޕޯޓްސްއަށް ދެއްވި ކަމަށްޓައި ކުޅިވަރާ ބެހޭ ވަޒީރު އަޙްމަދު މަޚްލޫފާއި، ހޭންޑްބޯލް މޯލްޑިވްސްއަށް ޑަބްލިއު ސްޕޯޓްސްގެ ފަރާތުން ވަނީ ޝުކުރުއަދާކޮށްފައެވެ.