ދިވެހިރާއްޖެއާއި އެމެރިކާގެ ގުޅުމަށް ތާރީޚީ ކުރިއެރުންތަކެއް ލިބިފައިވާ ކަމަށް އެމެރިކާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު އެލެއިނާ ޓެޕްލިޒް ވިދާޅުވެއްޖެއެވެ.
ސަފީރުގެ ގޮތުގައި ހުރުމަށް ލިބުނު ފުރުސަތު ނިމުމަކަށް އައުމާއި ގުޅިގެން ދެއްވި ވަދާއީ މެސެޖްގައި ވިދާޅުވެފައިވަނީ މަގާމު އަދާކުރުމުގެ ފުރުސަތު ލިބުމުން ވަރަށް އުފާވި ކަމަށެވެ. މިއީ ލިބުނު ވަރަށް ބޮޑު ކުރިއެރުމެއްގެ ގޮތުގައި އެކަމަނާ ފާހަގަކުރެއްވިއެވެ.
އެލެއިނާ ވިދާޅުވީ ދެގައުމުގެ ގުޅުމަށް ތާރީޚީ ކުރިއެރުންތަކެއް ލިބިފައިވާ ކަމަށާއި، މި ގުޅުންތައް އިތުރަށް ބަދަހިވެގެންދާނެކަން ޔަގީންކުރާ ކަމަށެވެ. ރާއްޖެއިން ދިމާވެ މަސައްކަތްކުރި ފަރާތްތަކާއި އެކުރިވެރިން މަތިން ހަނދާން ނުނެތޭނެ ކަމަށާއި، ބެހެއްޓެވި ގާތް ކަމަކީ މަސައްކަތްތަކަށް ލިބުނު އިތުރު ދިރުމެއް ކަމަށް އެލެއިނާ ވިދާޅުވިއެވެ.
އެލެއިނާ ވިދާޅުވީ ގާތް މުސްތަގުބަލެއްގައި ރާއްޖެއަށް ޒިޔާރަތް ކުރެވޭނެ ކަމަށް އުންމީދު ކުރާ ކަމަށެވެ. އަދި ވަގުތާއި ޚިޔާލާއި ސަގާފަތް ހިއްސާކޮށް ދިނުމުން އެކަން ވެސް އެލެއިނާ ފާހަގަކުރެއްވިއެވެ.
މީގެ އިތުރުން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ އަރިހަށް އެލެއިނާ ވަނީ މިމަހުގެ 19 ވަނަ ދުވަހު ވަދާއީ ޒިޔާރަތް ވެސް ކުރައްވާފައިވެއެވެ.
މި ބައްދަލުކުރެއްވުމުގައި ރައީސް ވަނީ ރާއްޖެއާއި އެމެރިކާ ސަރުކާރުގެ ގުޅުން ބަދަހިކުރުމަށް އެލެއިނާގެ ސަފީރުކަމުގެ ދުވަސްވަރު ކުރެއްވި މަސައްކަތްތައް ފާހަގަކުރައްވައި ޝުކުރު އަދާކުރައްވައިފައެވެ. އަދި އެކަމަނާއަށް ކާމިޔާބު މުސްތަގުބަލަކަށް އެދިވަޑައިގަންނަވާކަމުގައި އެމަނިކުފާނު ވިދާޅުވިއެވެ. ހަމަ އެއާއެކު އެމެރިކާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަނީ އެކަމަނާގެ ސަފީރުކަމުގެ ދައުރުގައި ރައީސް ބެހެއްޓެވި ގާތްކަމަށް ޝުކުރު އަދާކުރައްވައިފައެވެ. އަދި ކުރިއަށް އޮތް ދުވަސްތަކުގައި ވެސް އިތުރު ދާއިރާތަކުން ގުޅުން ގާއިމްވެގެންދާނެ ކަމަށް އުންމީދު ކުރައްވާ ކަމަށާއި، އެމެރިކާގެ ސަރުކާރުން ރާއްޖެއާ އެކު ގުޅުން ބަދަހިކުރުމަށް އެހީތެރިކަމާއި، އެއްބާރުލުން ދެއްވާނެކަމުގެ ޔަގީންކަން ވަނީ ދެއްވައިފައެވެ.
