ހދ. ކުޅުދުއްފުށީ ޕޯޓާއި އައްޑޫސިޓީ ޕޯޓު ތަރައްގީ ކުރުމުގެ މަޝްރޫއުގެ އަމަލީ މަސައްކަތް އަންނަ އަހަރު ފަށައިގަނެވޭނެ ކަމަށް ލަފާކުރެވޭކަމަށް މޯލްޑިވްސް ޕޯޓްސް ލިމިޓެޑްގެ ސީއީއޯ ޝާހިދު އަލީ ވިދާޅުވެއްޖެއެވެ.

ރާއްޖެއެމްވީއަށް ދެއްވި ޚާއްސަ އިންޓަވިއުއެއްގައި ޝާހިދު ވިދާޅުވީ ކުޅުދުއްފުށީ ޕޯޓާއި އައްޑޫސިޓީ ޕޯޓުގައިވެސް ކެޕޭސިޓީ ވަރަށް ލިމިޓެޑް ކަމަށެވެ. އެގޮތުން އެ ޕޯޓަށް ގާތް ކުރެވޭނީ 1200 ނުވަތަ 1500 ޓަނުގެ ބޮޑު ބޯޓުތަކަށް ކަމަށް ވިދާޅުވިއެވެ.

އެ ޕޯޓުތަކުގެ ކީވޯލްގެ އިތުރުން ޑްރާފްޓް ވެސް ތިލަކަން ބޮޑު ބޯޓު ފަހަރުތަކަށް ޕޯޓަށް ގާތް ނުކުރެވޭކަން ފާހަގަކުރައްވާ ޝާހިދު ވިދާޅުވީ ސަރުކާރުން ނިންމާފައިވަނީ ރީޖަނަލް ދެ ބަނދަރަށް ބާލާ މުދަލުގެ ޑިއުޓީގެ 50 އިންސައްތަ ކޮންސެޝަން ލިބޭނެ ގޮތަށް ކަމަށެވެ. އެހެންނަމަވެސް ކޮންސެޝަން އެހެން އޮވެ، ބޯޓު ފަހަރަށް ނާދެވޭތީ ދަތިތަކާއި ކުރިމަތިވާ ކަމަށެވެ.

ކުޅުދުއްފުށި ޕޯޓު ތަރައްގީކުރުމަށް މިހާރު ރަވާފައިވަނީ ތަންކޮޅެއް ފުން ކީވޯލެއް ލިބޭ ގޮތަށް، ކީވޯލް ބޭރަށް ދިގުކުރުމަށް ކަމަށް ޝާހިދު ވިދާޅުވިއެވެ.

މީގެ އިތުރުން ހިތަދޫ ޕޯޓު މިހާރު ހެދިފައި އިން ގޮތުން އެ ޕޯޓުގެ ކީވޯލް އިންނަނީ ގަމު ކަނޑާއި ވިލިނގިލި ކަނޑާ ދިމާ މެދަށް ކަމަށް ޝާހިދު ވިދާޅުވިއެވެ. އެތަނުގެ ބާނި އޮންނަ ގޮތުގެ ސަބަބުން އެތަނާ ކައިރިކޮށްފައި އޮންނަ ބޯޓުތައް ވަރަށް ބޮޑަށް ހަލުވާ ކަމަށާއި، ރައްކާތެރިކަމާއެކު މުދާ ބޭލުމުގައި ދަތިތަކެއް ކުރިމަތިވާ ކަމަށް ޝާހިދު ވިދާޅުވިއެވެ.

ޕޯޓަށް ގާތް ކުރާ ބައެއް ބޯޓުތަކަށް ޚިދުމަތް ދޭން ޖެހޭނީ ބޭރު އެންކަރުގައި ބާއްވައިގެން ކަމަށާއި ދެ ޕޯޓު ތަރައްގީ ކުރެވުމުން ދެ ޕޯޓަށްވެސް ބޮޑެތި ބޯޓުތައް އައުމުގެ ފުރުސަތު ބޮޑުވެގެންދާނެ ކަމަށް ޝާހިދު ވިދާޅުވިއެވެ.

ދެ ޕޯޓުގެ މަޝްރޫއުގެ މަސައްކަތާއި ގުޅޭގޮތުން ޝާހިދު ވިދާޅުވީ ކުޅުއްފުށީ ޕޯޓުގެ މާސްޓަރ ޕްލޭން ހަދާފައިވާއިރު އަހަރެއްހާ ދުވަހުގެ ތެރޭގައި މަސައްކަތްގައި ނިންމާލެވޭނެ ކަމަށް ލަފާ ކުރެވޭ ކަމަށެވެ. އަދި މިހާރު ފަންޑިން ހޯދުމުގެ މަސައްކަތް ކުރިއަށްދާ ކަމަށެވެ.

އައްޑޫ ސިޓީގެ ޕޯޓާއި ގުޅޭގޮތުން ޝާހިދު ވިދާޅުވީ އީއައިއޭގެ މަސައްކަތް ކުރިއަށްދާ ކަމަށާއި ޑީޓެއިލް ޑިޒައިނިންގެ މަސައްކަތް ނިމިފައިވާ ކަމަށެވެ.

ކުޅުދުއްފުއްޓާއި އައްޑޫ ސިޓީ ހިތަދޫގެ ޕޯޓު ތަރައްގީކުރުމަށް 200 މިލިއަން ރުފިޔާ ޚަރަދުވާނެ ކަމަށް ޝާހިދު ވަނީ ވިދާޅުވެފައެވެ.