އެއް މިލިއަން ހަމަކޮށްދިން ފަތުރުވެރިޔާއަށް ރާއްޖެއިން މަރުހަބާ ކިޔައިފި
29 އޮކްޓޯބަރު 2021 | ހުކުރު 11:26މިއަހަރު ނިމުމުގެ ކުރިން 1.3 މިލިއަން ފަތުރުވެރިންނަށް ވަނީ އަމާޒު ހިފާފައި
އެއް މިލިއަންވަނަ ފަތުރުވެރިޔާއަށް މަރުހަބާ ކިޔުން
އެއް މިލިއަން ހަމަކޮށްދިން ފަތުރުވެރިޔާއަށް ރާއްޖެއިން މަރުހަބާ ކިޔައިފިއެވެ.
އެއް މިލިއަން ހަމަވި ފަތުރުވެރިޔާ ރާއްޖެއައިސްފައިވަނީ ހުކުރު ދުވަހުގެ ހަވީރު އެމިރޭޓްސްގެ ފްލައިޓެއްގައެވެ. ރާއްޖެ ޒިޔާރަތްކުރި އެއް މިލިއަން ވަނަ ފަތުރުވެރިއާއަކީ ފްރާންސަށް ނިސްބަތްވާ ވިންސެންޓް ވިކްޓަރ ކޮރެންޓިން ޕިޓާއު ނަމަކަށް ކިޔާ ފިރިހެނެކެވެ. މިއީ އޭނާ ރާއްޖެއަށް ކުރާ 20 ވަނަ ދަތުރެވެ. ވިންސެންޓާއި، އޭނާގެ އަންހެނުންނަށް މަރުހަބާ ކިޔުމަށް ވިޒިޓް މޯލްޑިވްސްއާއި، ޓުއަރިޒަމް މިނިސްޓްރީ އަދި އެމްއޭސީއެލްގެ އިސް ބޭބޭފުޅުން ވަޑައިގެންނެވިއެވެ.
ކުރިން އަމާޒު ހިފާފައިވާ އެއް މިލިއަން ފަތުރުވެރިންގެ އަމާޒަށް ވާސިލްވުމުން މިހާރު އަމާޒު ހިފާފައިވަނީ 1.3 މިލިއަން ފަތުރުވެރިންނަށް ކަމަށް ޓޫރިޒަމް މިނިސްޓަރ ޑރ އަބްދުﷲ މައުސޫމް ވަނީ ވިދާޅުވެފައެވެ.
ޓުއަރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން މިހިނގާ އޮކްޓޯބަރު މަހުގެ 1ން 21ށް 91،628 ފަތުރުވެރިއަކު ވަނީ ރާއްޖެ އައިސްފައެވެ. މިމަހު ދުވާލެއްގެ މައްޗަށް 4،363 ފަތުރުވެރިން އައިސްފައިވާ ކަމަށް ވަނީ ރެކޯޑުކުރެވިފައެވެ.
މިއަހަރުގެ މިހާތަނަށް ރާއްޖެ އައި ފަތުރުވެރިންގެ އެންމެ ބޮޑު ބައެއް ހިއްސާކުރަނީ އިންޑިއާ މާކެޓުންނެވެ. އިންޑިއާ މާކެޓު 22.8 އިންސައްތަ ހިއްސާކުރާއިރު އެ މާކެޓުން އައި ފަތުރުވެރިންގެ އަދަދު 219،381 އަށް އަރައެވެ. ދެވަނައަށް އެންމެ ބޮޑު ބައެއް ހިއްސާކުރަނީ ރަޝިއާ މާކެޓެވެ. އެއީ 18.8 އިންސައްތައާއެކު 180،517 ފަތުރުވެރިންނެވެ. ތިންވަނައިގައި 6.7 އިންސައްތަ ހިއްސާއާއެކު ހިމެނެނީ ޖަރުމަނު މާކެޓެވެ. އެ މާކެޓުން 64،200 ފަތުރުވެރިން އައިސްފައިވެއެވެ.
މިއަހަރު އެންމެ ގިނަ ފަތުރުވެރިން އައިސްފައިވަނީ އޮގަސްޓު މަހުއެވެ. އެއީ 143،599 ފަތުރުވެރިންނެވެ. އަދި ސެޕްޓެމްބަރު މަހު 114،896 ފަތުރުވެރިން އައިސްފައިވާކަމަށް ވަނީ ރެކޯޑުކޮށްފައެވެ. ތިންވަނައަށް އެންމެ ގިނަ ފަތުރުވެރިން އައީ މާޗް މަހުއެވެ. އެއީ 109،585 ފަތުރުވެރިންނެވެ.
