އަމީތާބުގެ ދުލުން ދިވެހިރާއްޖެ!

އދ. ގެ އާންމު މަޖިލީހުގެ 76 ވަނަ ދައުރުގެ ރިޔާސަތަށް ރާއްޖޭގެ ޚާރިޖީ ވަޒީރު އަބްދު ﷲ ޝާހިދު ހޮވިވަޑައިގެންނެވީ އދ. ގެ މެންބަރު ގައުމުތަކުގެ ތެރެއިން 143 ގައުމެއްގެ ވޯޓުންނެވެ. މެންބަރު 193 ގައުމުން ބައިވެރިވެގެން ރައީސަކު ހޮވާފައި ވަނީ ސިއްރު ވޯޓަކުންނެވެ. ރިޔާސަތާއި ހަވާލުވެވަޑައިގަތުމަށްފަހު ޝާހިދު ވިދާޅުވީ އދ.ގެ އާންމު މަޖިލީހުގެ ރައީސްކަމުގެ މަގާމާއި ހަވާލުވީ ދިވެހި ރައްޔިތުންގެ އެއްބާރުލުމާއެކުގައި ކަމަށެވެ. ޝާހިދު ވިދާޅުވީ މިއަދު ފެނިގެން މިދަނީ ރައީސް ސާލިހުގެ ޚާރިޖީ ސިޔާސަތު ބޭރު ދުނިޔެ ބަލައިގެންފައިވާ މިންވަރު ކަމަށެވެ.

76 ވަނަ ސެޝަނުގެ ރައީސަކަށް ޝާހިދު ހޮވިވަޑައިގަތުމުން ބައެއް މީހުން ދުށީ އެއީ ވަރަށް ކުޑަކަމެއްގެ ގޮތުގައެވެ. އަދި އަނެއް ބަޔަކު ވަނީ މިކަމަށް ޖޯކުވެސް ޖަހާފައެވެ. އެންމެ ބޮޑަށް މީހުން ޖޯކު ޖެހި އެއް ކަމަކީ އދ. ގެ އާންމު މަޖިލީހުގެ 76 ވަނަ ޝެޝަނުގެ ރައީސްގެ ހަސިއްޔަތުން ޝާހިދު ރާއްޖެއަށް ޒިޔާރަތް ކުރެއްވުމުން އެކަމާއެވެ. ސޯޝަލް މީޑިއާގެ އެކި ޕްލެޓްފޯމްތަކުގައި މިކަމަށް މީހުން ޖޯކު ޖަހާފައިވާއިރު އެކި ކަހަލަ ފޮޓޯތައް ވެސް ހަދައިގެން އަޕްލޯޑްކޮށްފައިވެއެވެ. އަދި "ޝާހިދު، ޝާހިދުއާ ބައްދަލުކުރައްވައިފި" ކަމަށް ބުނެ ފޮޓޯތައް އަޕްލޯޑް ކޮށް މަލާމާތް ވެސް ކުރިއެވެ.

ޝާހިދު އދ. ގެ އާންމު މަޖިލީހުގެ 76 ވަނަ ޝެޝަނުގެ ރައީސަކަށް ހޮވިވަޑައިގަތުމާއި ގުޅިގެން ރާއްޖެއަށް ހަގީގަތުގައި ވެސް ލިބުނީ ވަރަށް ރީތިނަމަކެވެ. ދުނިޔޭގެ އެންމެ މަގްބޫލު ޝޯތަކުގައި ރާއްޖޭގެ ވާހަކަ ވަނީ ދެކެވެން ފަށާފައެވެ. އަވަށްޓެރި އިންޑިއާގެ ސޮނީ ޓީވީން ގެނެސްދޭ މަގްބޫލް ޝޯއެއް ކަމަށްވާ "ކޯން ބަނޭގާ ކްރޯޑް ޕަތީ" ގައި ވެސް ރާއްޖެއާ ބެހޭ ގޮތުން އަމީތާބް ބައްޗަން ވަނީ ސުވާލުކޮށްފައެވެ.

އެގޮތުން ޝޯގެ ބައިވެރިޔަކާއި ކުރިމަތި ކުރުވި މި ސުވާލުގައި އަހާފައިވަނީ އދ. ގެ އާންމު މަޖިލީހުގެ 76 ވަނަ ޝެޝަނުގެ ރައީސަކަށް ހޮވިވަޑައިގެންނެވި އަބްދު ﷲ ޝާހިދު ނިސްބަތްވެވަޑައިގަންނަވަނީ ކޮން ގައުމަކަށްތޯއެވެ. އެގޮތުން ދީފައިވާ އޮޕްޝަންތަކުގެ ތެރޭގައި އިންޑޮނީޝިޔާ، މޮރޮކޯ މެލޭޝިއާ އަދި ދިވެހިރާއްޖޭގެ ނަން ވަނީ ހިމާނާފައެވެ.   

ކޯން ބަނޭގާ ކްރޯޑް ޕަތީ އަކީ އާންމުންގެ މެދުގައި މަގްބޫލް ޝޯ އަކަށްވާއިރު ތިންވަނަ ސީޒަން ފިޔަވައި މި ޝޯ އުފެދުނީއްސުރެ ހުށަހަޅައިދެމުން އަންނަނީ އަމީތާބެވެ. 2000 ވަނަ އަހަރު އުފެދިގެން ދިޔަ މި ޝޯގެ މިހާރު ކުރިއަށް ދަނީ 13 ވަނަ ސީޒަނެވެ. މި ޝޯ ފަރުމާކުރެވިފައިވަނީ ކުރާ ސުވާލުތަކަށް ރަނގަޅު ޖަވާބު ދޭ މީހުންނަށް ފައިސާގެ ބޮޑެތި އަދަދުތައް ލިބޭ ގޮތަށެވެ.

މިކަހަލަ ޕްލެޓްފޯމަކުން ވެސް ރާއްޖޭގެ ނަން ވިދާލުމުން ހަމަ މި ރީތިނަން ލިބިގެން ދަނީ ދިވެހި ރައްޔިތުންނަށެވެ. ދުނިޔޭގައި ރާއްޖެ އެންމެ ބޮޑަށް އިޝްތިހާރު ކުރެވިގެން ދަނީ އަދި މަޝްހޫރު ވެފައިވެސް ވަނީ ފަތުރުވެރިކަމުގެ މަންޒިލެއްގެ ގޮތުގައި ކަމަށްވާއިރު މިހާރު ރާއްޖޭގެ ނަމާއި އދ. ގެ އާންމު މަޖިލީހުގެ 76 ވަނަ ޝެޝަނުގެ ރައީސްގެ ނަން ވެސް ވަނީ ގުޅިފައެވެ. މިއީ ހަގީގަތަކުގައި ވެސް ރާއްޖެއަށް ލިބުނު ޝަރަފަކާއި ފަޚުރެކެވެ.