މިހާރު ކުރިއަށްދާ ޓީ20 ވޯލްޑް ކަޕުގައި ބުދަ ދުވަހު ކުޅުނު މެޗުން ބަންގްލަދޭޝް އަތުން އިންގްލެންޑް މޮޅުވެއްޖެއެވެ.

ގްރޫޕް އެކެއްގައި ހިމެނޭ އިންގްލެންޑުން މި މުބާރާތުގައި ކުޅުނު ދެވަނަ މެޗުން މޮޅުވީ ބަންގްލަދޭޝް އަތުން އަށް ވިކެޓުންނެވެ.

ޔުނައިޓެޑް އަރަބި އެމިރޭޓްސް (ޔޫއޭއީ) ގައި ކުޅުނު މެޗުގެ ޓޮސް ދިމާވުމުން ބަންގްލަދޭޝްއިން އެންމެ ފުރަތަމަ ކުޅެން އަރައި، 20 އޯވަރު ހަމަވިއިރު ނުވަ ކުޅުންތެރިން ނުބައިވެގެން ހެދުނީ 124 ލަނޑެވެ. އެ ގައުމުން އެންމެ ރަނގަޅަށް ކުޅުނީ 30 ބޯޅައިން 29 ލަނޑު ހެދި މުޝްފިގުރް ރަހީމާއި ނުވަ ބޯޅައިން 19 ލަނޑު ހަމަކުރި ނަސުމް އަޙްމަދެވެ.

ޖަވާބުގައި އިންގްލެންޑް ކުޅެން އަރައި 14.1 އޯވަރުގެ ތެރޭގައި ދެ ކުޅުންތެރިއަކު ނުބައިވެގެން ވަނީ 126 ލަނޑު ހަދައި، މެޗު ކާމިޔާބުކޮށްފައެވެ. އެ ގައުމުން އެންމެ ރަނގަޅަށް ކުޅުނީ 38 ބޯޅައިން 61 ލަނޑު ހެދި ޖޭސަން ރޯއި އާއި 25 ބޯޅައިން 28 ލަނޑު ހަމަކުރި ޑޭވިޑް މަލަންއެވެ.

މި މެޗުން އިންގްލެންޑް މޮޅުވިއިރު، މި މުބާރާތުގައި ކުޅުނު ފުރަތަމަ މެޗުން އެ ގައުމު ވަނީ އެންމެ ފަހުގެ ޗެމްޕިއަން ވެސްޓް އިންޑީޒް އަތުން ހަ ވިކެޓުން މޮޅުވެފައެވެ. އެއާއެކު ގްރޫޕް އެކެއްގެ އެއްވަނައިގައި އިންގްލެންޑް އޮތީ ހަތަރު ޕޮއިންޓާއެކުއެވެ. ދެވަނައިގައި އޮތް ސްރީ ލަންކާ އާއި، ތިންވަނައިގައި އޮތް އޮސްޓްރޭލިއާ އަދި ހަތަރުވަނައިގައި އޮތް ސައުތު އެފްރިކާއަށް ލިބިފައިވަނީ ދެ ޕޮއިންޓެވެ.

މީގެ އިތުރުން މި މުބާރާތުގައި ބުދަ ދުވަހުގެރޭ ކުޅުނު މެޗުން ގްރޫޕް ދޭއްގައި ހިމެނޭ ނެމިބިއާ ވަނީ ސްކޮޓްލެންޑް އަތުން ހަތަރު ވިކެޓުން މޮޅުވެފައެވެ.