ސޫދާނުގެ ބަޣާވާތާ ގުޅިގެން ވޯލްޑް ބޭންކުން ދެމުން އައި އެހީތައް މެދުކަނޑާލައިފި
28 އޮކްޓޯބަރު 2021 | ބުރާސްފަތި 02:04ސޫދާންގައި ހިންގި ބަޣާވާތާ ގުޅިގެން ކަންބޮޑުވެވަޑައިގަންނަވާ ކަމަށް ވޯލްޑް ބޭންކުގެ ރައީސް ޑޭވިޑް މަލްޕާސް ވިދާޅުވި
ސޫދާން ބަޢާވާތް
ސޫދާންގެ އަސްކަރިއްޔާއިން އެ ޤައުމުގައި ހިންގި ބަޣާވާތާ ގުޅިގެން ވޯލްޑް ބޭންކުން ދެމުން އައި އެހީތައް މެދުކަނޑާލައިފިއެވެ.
ވޯލްޑް ބޭންކުގެ ރައީސް ޑޭވިޑް މަލްޕާސް ނެރުއްވި ބަޔާނެއްގައި ވިދާޅުވީ ސޫދާންގެ އަސްކަރިއްޔާއިން އެ ޤައުމުގައި ހިންގި ބަޣާވާތާ ގުޅިގެން ކަންބޮޑުވެވަޑައިގަންނަވާ ކަމަށެވެ. އަދި މިކަމުގެ ސަބަބުން އެ ޤައުމަށް އިޖުތިމާޢީ ގޮތުންނާއި އިޤްތިޞާދީ ގޮތުން އަރައިގަތުމަށް ހުރަސްތަކާ ކުރިމަތިވެދާނެކަމުގެ ބިރު އެބައޮތް ކަމަށެވެ.
މި އަހަރުގެ މާރޗް މަހު ސޫދާނަށް ވޯލްޑް ބޭންކުން ވަނީ އެތައް ބިލިއަން ޑޮލަރުގެ އެހީތައް ފޯރުކޮށްދީފައެވެ. މިއީ ފާއިތުވެދިޔަ 30 އަހަރު އެ ޤައުމަށް މިހާ ބޮޑު އަދަދަކުން އެހީ ދިން ފުރަތަމަ ފަހަރަށްވާއިރު ސޫދާނަށް ވަނީ 3 ބިލިއަން ޑޮލަރުގެ އެހީ ފޯރުކޮށްދީފައެވެ. މި އެހީ ފޯރުކޮށްދީފައިވަނީ ދަނޑުވެރިކަމާއި ސިއްހީ ޚިދުމަތް ކުރިއެރުވުމަށާއި ދަތުރުފަތުރުގެ ނިޒާމު ހަރުދަނާ ކުރުމަށެވެ.
ވޯލްޑް ބޭންކުން ވެސް އެހީތައް މެދުކަނޑާލުމަށް ނިންމާފައިވާއިރު އެފްރިކަން ޔޫނިއަން (އޭޔޫ)ގެ ހުރިހާ ހަރަކާތަކުން ސޫދާން ވަނީ ސަސްޕެންޑްކޮށްފައެވެ. ސޫދާނުގައި މިނިވަން އިންތިޚާބެއް ބާއްވައި ރައީސަކު އިންތިޚާބުކޮށް އިންތިޚާބީ ސަރުކާރެއް އެކުލަވައި ނުލަނީސް ސޫދާންގެ ސަސްޕެންޝަން އުވާނުލާނެ ކަމަށް އޭޔޫއިން ވަނީ ބުނެފައެވެ.
ސޫދާންގެ އަސްކަރިއްޔާއިން ބުނީ ސަރުކާރުގެ ބާރުތައް ނިގުޅައިގަތީ ދާޚިލީ ހަމަނުޖެހުންތައް ހުއްޓުވަން ކަމަށެވެ. ސޫދާންގެ އަސްކަރިއްޔާގެ ޗީފް ޖެނެރަލް އަބްދުލް ފައްތާޙް އަލްބުރްހާން މުޚާތަބު ކުރައްވާ އަބްދުލް ފައްތާޙް ވިދާޅުވީ ސިޔާސީ ފަރާތްތަކެއް ހައްޔަރުކޮށް ސަރުކާރުގެ ބާރުތައް ނިގުޅައިގަތީ ގައުމުގެ ދާޚިލީ ހަމަނުޖެހުންތައް ހުއްޓުވަން ކަމަށެވެ. މިއީ މިނިސްޓަރުން ހައްޔަރުކުރުމާ ގުޅިގެން ސޫދާންގެ އަސްކަރިއްޔާއިން ވާހަކަ ދެއްކެވި ފުރަތަމަ ފަހަރެވެ.
މިކަމާ ގުޅިގެން ފައްތާހު އިތުރަށް ވިދާޅުވީ ހައްޔަރުކުރީ އަސްކަރިއްޔާއާ ދެކޮޅަށް މަސައްކަތް ކުރަމުން އަންނަ މިނިސްޓަރުން ކަމަށެވެ. އަދި ހައްޔަރުކުރި ފަރާތްތަކަށް އެއްވެސް ގެއްލުމެއް ދީފައި ނުވާނެ ކަމަށާއި އެމީހުން މިހާރު ވަނީ ފައްތާޙްގެ ގެއަށް ގެންގޮސްފައި ކަމަށެވެ. "ބޮޑުވަޒީރު މީގެ ކުރިން ހުންނެވީ އޭނާގެ ގެކޮޅުގައި. އެކަމަކު އޭނާއަށް ލިބިދާނެ ގެއްލުމަކަށް ބަލައި މިހާރު ވާނީ އަޅުގަނޑު (ފައްތާޙް) ގެ ގެއަށް އޭނާ ގެނެވިފައި" ކަމަށް ވެސް ފައްތާޙް ވިދާޅުވިއެވެ.
ސޫދާންގައި ބަޣާވާތްކޮށް ވެރިކަން ފުރޮޅާލީ 2019 ވަނަ އަހަރުއެވެ. އޭގެ ފަހުން އެގައުމު ހިންގަމުން އަންނަނީ ސަރުކާރާއި އަސްކަރިއްޔާ އާ ދެބައިންނެވެ.
