ރާއްޖެއަށް 100 ކިލޯއަށް ވުރެ ގިނަ މަސްތުވާތަކެތި އެތެރެކުރިކަމުގެ ތުހުމަތުގައި ހައްޔަރުކުރި 10 މީހުންގެ ތެރެއިން އެކަކު އަނެއްކާވެސް ދޫކޮށްލައިފިއެވެ.
މި މައްސަލައިގައި ހައްޔަރުކުރި މީހުންގެ ތެރެއިން 3 މީހެއްގެ ބަންދުގެ މުއްދަތު ހަމަވާތީ ކްރިމިނަލް ކޯޓުގައި ބަންދު މުރާޖަޢާކުރުމަށް އަންގާރަ ދުވަހު ބޭއްވި އަޑު އެހުމުގައި ދޫކޮށްލާފައިވަނީ ގއ. ދެއްވަދޫ، ދޭލިޔާގެ، މިދުހަތު އިބްރާހިމް، 26، އެވެ. އޭނާ ދޫކޮށްލާފައިވަނީ އެ މައްސަލައިގައި މިވަގުތަށް އޭނާ ބަންދުގައި ބަހައްޓަން ޖެހޭ ވަރަށް ހެކި ނެތުމުންނެވެ.
މި މައްސަލައިގައި 10 މީހަކު ހައްޔަރުކޮށްފައިވާއިރު މީގެ ކުރިންވަނީ ދެ މީހަކު ދޫކޮށްލާފައެެވެ. އެ ދެމީހުން ވެސް ދޫކޮށްލާފައިވަނީ، ބަންދުގައި ބަހައްޓަންޖެހޭ ވަރަށް ހެކި ނެތުމުންނެވެ. އެ މައްސަލަ އިސްތިއުނާފުކުރަން ފުލުހުން ޕީޖީއަށް ހުށަހެޅިއެވެ. އެހެންނަމަވެސް އެ މައްސަލަ އިސްތިއުނާފު ނުކުރަން ޕީޖީން ވަނީ ނިންމާފައެވެ. ޕީޖީގެ އެ ނިންމުން ބިނާވަނީ ހައިކޯޓުގެ މަރުޙަލާގައި އިތުރު ހެކި ހުށަހެޅުމުގެ ފުރުޞަތު ނޯންނާނެތީއާއި، ދަށުކޯޓަށް ހުށަހެޅި ހެއްކާއި ޤަރީނާގެ މައްޗަށް ބަލައި ބަންދުން ދޫކޮށްލި އަމުރު އިސްތިއުނާފު ކޮށްގެން ވަކި ތަފާތު ނަތީޖާއެއް ނެރެވިދާނެކަމަށް ނުފެނުމުންނެެވެ. މި ދެމީހުންގެ މައްޗަށް އިތުރު ހެކި ޤަރީނާ ހޯދިއްޖެނަމަ ހައްޔަރުކުރުމުގެ އައު އަމުރަކަށް އެދި ދަށުކޯޓަށް ހުށަހެޅުމުގެ ފުރުޞަތު އޮންނާނެ ކަމަށް ޕީޖީންވަނީ ބުނެފައެވެ.
މި މައްސަލައިގައި ހައްޔަރުކުރި މީހުންގެ ތެރެއިން ފުލުހުން ވަނަވަރު އާއްމުކުރީ 8 މީހެއްގެއެވެ.
މި މީހުން ހައްޔަރުކުރި އޮޕަރޭޝަން ކުރިއަށް ގެންދިޔައީ، އޮކްޓޯބަރ މަހުގެ 13 ވަނަ ދުވަހުއެވެ. އެ އޮޕރޭޝަންގައި ރާއްޖޭގެ ބައެއް ފަޅު ރަށްތަކާއި، ހުޅުމާލެއާއި މާލެ އާއި މާލޭގެ ބައެއް ގޭގޭގެ އިތުރުން ސަފާރީއަކާއި ލޯންޗެއް ބަލައި ފާސްކުރިއެވެ. 100 ކިލޯއަށްވުރެގިނަ މަސްތުވާތަކެތި ހޯދާފައިވަނީ ފަޅުރަށެއް ކަމަށްވާ އދ. ބޮޑުކާށިހުރާއިންނެވެ.
މިއޮޕަރޭޝަންގެ އިތުރުން އޮކްޓޯބަރ މަހުގެ 15 ވަނަދުވަހު 215 ކިލޯގެ މަސްތުވާތަކެތި ރ. އޮތޮޅުން ވަނީ އަތުލައިގެންފައެވެ. އެ އޮޕަރޭޝަންގައި ވެސް ދެ މީހަކު ވަނީ ހައްޔަރުކޮށްފައެވެ.
