ވެކްސިން ފުރިހަމަނުކުރާ 39،000 އަށްވުރެ ގިނަ މީހުން އެބަތިބި
26 އޮކްޓޯބަރު 2021 | އަންގާރަ 01:38ވެކްސިންގެ ފުރަތަމަ ޑޯޒް ޖެހީ 50 މީހުން
ކޮވިޑް-19 ވެކްސިން ޖެހުން
ކޮވިޑް-19އިން ދިފާއުވުމަށް ޖަހާ ވެކްސިންގެ ދެވަނަ ޑޯޒް ފުރިހަމަނުކުރާ 39،340 މީހުން އެބަތިބި ކަމަށް ދައްކައިފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އާންމުކޮށްފައިވާ މައުލޫމާތުގައިވާގޮތުން ހޯމަ ދުވަހު މުޅި ރާއްޖެއިން ވެކްސިން ޖެހީ 440 މީހުންނެވެ. މީގެތެރެއިން ފުރަތަމަ ޑޯޒް ޖަހާފައިވަނީ 50 މީހުންނެވެ. އެއީ މާލެ ސަރަހައްދުން ވެކްސިންގެ ފުރަތަމަ ޑޯޒް ޖެހި 35 މީހުންނާއި، އަތޮޅުތެރެއިން ވެކްސިންގެ ފުރަތަމަ ޑޯޒް ޖެހި 15 މީހުންނެވެ. މިއާއެކު ވެކްސިންގެ ފުރަތަމަ ޑޯޒް ޖެހި މީހުންގެ ޖުމްލަ 394،099 އަށް ވަނީ އަރާފައެވެ.
މީގެ އިތުރުން 390 މީހަކު ވެކްސިންގެ ދެވަނަ ޑޯޒް ޖަހާފައިވާއިރު، މީގެ ތެރޭގައި ހިމެނެނީ މާލެ ސަރަހައްދުން ވެކްސިން ފުރިހަމަކުރި 220 މީހުންނާއި، އަތޮޅުތެރެއިން ވެކްސިން ފުރިހަމަކުރި 170 މީހުންނެވެ. މިއާއެކު މުޅި ރާއްޖެއިން ވެކްސިން ފުރިހަމަކުރި މީހުންގެ ޖުމްލަ ވަނީ 354،759 އަށް އަރާފައެވެ.
އެޗްޕީއޭއިން އާންމުކޮށްފައިވާ މައުލޫމާތުން އެނގޭގޮތުގައި ރާއްޖޭގައި މިވަގުތު ވެކްސިން ފުރިހަމަނުކުރާ 39،340 މީހުން އެބަތިއްބެވެ. ރާއްޖޭގައި ބަލި ފެތުރުން ކޮންޓްރޯލްކުރުމަށާއި، އެކަކު ގައިން އަނެކަކު ގަޔަށް ބަލި އެރުން މަދުކުރުމަށް ވީހާވެސް ގިނަ ބަޔަކު ވެކްސިންގެ ދެ ޑޯޒް ފުރިހަމަކުރުމަށް ސަރުކާރުން ގެންދަނީ ބާރުއަޅަމުންނެވެ.
