މޮރިއޭރޯއާއެކު ގައުމީ ޓީމުގެ ފަރިތަކުރުންތައް ފަށައިފި

ރާއްޖޭގެ ގައުމީ ފުޓްބޯޅަ ޓީމުގެ އައު ކޯޗުގެ މަގާމަށް ހަމަޖެއްސި އިޓަލީ އާއި އިންޓަ މިލާނަށް މީގެ ކުރިން ކުޅުނު މިޑްފީލްޑަރު ފްރެންސެސްކޯ މޮރިއޭރޯއާއެކު، ގައުމީ ޓީމުން ފަރިތަކުރުންތައް ފަށައިފިއެވެ.

ގައުމީ ޓީމުގެ ކޯޗުގެ މަގާމަށް އުމުރުން 52 އަހަރުގެ މޮރިއޭރޯ ހަމަޖެއްސިކަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް އިއުލާންކުރެއްވީ މިދިޔަ ބުރާސްފަތި ދުވަހެވެ. މައުލޫމާތު ލިބޭ ގޮތުން މޮރިއޭރޯ ރާއްޖޭގެ ގައުމީ ޓީމާ ހަވާލުވީ އެއް އަހަރުގެ އެއްބަސްވުމެއްގެ ދަށުންނެވެ. ރާއްޖޭގެ ގައުމީ ޓީމާ މޮރިއޭރޯ ހަވާލުވިއިރު، މިއީ ގައުމީ ޓީމަކަށް މޮރިއޭރޯ އިރުޝާދުދޭނެ ފުރަތަމަ ފަހަރެވެ. އަދި މިއީ އޭޝިއާގައި އޭނާ މަސައްކަތް ކުރާނެ ފުރަތަމަ ފަހަރުވެސްމެއެވެ.

ގައުމީ ޓީމުގެ އައު ކޯޗަކަށް މޮރިއޭރޯ ހަމަޖެއްސިއިރު، އޭނާ ވެފައިވަނީ މި އަހަރު ތެރޭގައި ގައުމީ ޓީމަށް ކޯޗުކަންކޮށްދޭ ތިންވަނަ ކޯޗަށެވެ. އެގޮތުން މީގެ ކުރިން ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނުގައި ރާއްޖެއިން ނެރުނު ދަށް ނަތީޖާތަކުގެ ސަބަބުން ނެދަލެންޑްސްގެ މާޓިން ކޫޕްމަން ވަނީ މަގާމުން ވަކިކޮށްފައެވެ. އަދި މި ފަހުން ނިމުނު "އުރީދޫ ސާފް ޗެމްޕިއަންޝިޕް 2021" ގައި ގައުމީ ޓީމުގެ ކޯޗުކަމުގެ މަގާމާ ވަގުތީ ގޮތުން ހަވާލުވީ އެސިސްޓަންޓް ކޯޗު އަލީ ސުޒޭނެވެ.

މޮރިއޭރޯއާއެކު ހޯމަ ދުވަހުގެރޭ ގައުމީ ފުޓްބޯޅަ ދަނޑުގައި ގައުމީ ޓީމުން ވަނީ ފަރިތަކުރުންތައް ފަށާފައެވެ. ގައުމީ ޓީމާ ހަވާލުވުމަށްފަހު އިޓަލީގެ ނޫހެއް ކަމަށްވާ ކަލްޗިއޯމެރްކާޓޯއަށް ދިން އިންޓަވިއުއެއްގައި މޮރިއޭރޯ ބުނީ ވީޑިއޯތަކުން ފެނުނު މަންޒަރަށް ބަލާއިރު ރާއްޖޭގެ ފުޓްބޯޅައިގެ ފެންވަރު ރަނގަޅު ކަމަށެވެ. އެކަމަކު ރަނގަޅު ކުރެވޭނެ ކަންކަން އެބަހުރި ކަމަށާއި، އެގޮތުން ކުޅުންތެރިންގެ ޖޯޝް ރަނގަޅުކޮށް ކާމިޔާބުގެ މަގަށް ގެންނަން ކުރެވެން ހުރި މަސައްކަތް ކުރަން ތައްޔާރަށް ހުރި ކަމަށްވެސް ވަނީ ބުނެފައެވެ.

މޮރިއޭރޯއާއެކު ގައުމީ ޓީމުގެ ފަރިތަކުރުންތައް ފެށިއިރު، އަންނަ ނޮވެމްބަރު މަހު ސްރީ ލަންކާގައި ބޭއްވުމަށް ހަމަޖެހިފައިވާ މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް) ގައި ރާއްޖެ ވާދަކުރާނެއެވެ. އެ މުބާރާތުގައި ހަތަރު ގައުމު ވާދަކުރާއިރު، އެ ގައުމުތަކަކީ ރާއްޖެ އާއި ލަންކާގެ އިތުރުން ބަންގްލަދޭޝް އާއި ސީޝެލްސްއެވެ.

އެ މުބާރާތުގެ ކުރިން އަންނަ ހުކުރު ދުވަހު ގައުމީ ފުޓްބޯޅަ ޓީމުން ކުރެއްދޫ އައިލެންޑް ރިސޯޓުގެ ޓީމާ ދެކޮޅަށް އެ ރިސޯޓުގައި ޚާއްސަ މެޗެއް ކުޅޭ ގޮތަށް މިހާރު ވަނީ ހަމަޖެހިފައެވެ. ކުރެއްދޫގައި ގައުމީ ޓީމުން ޚާއްސަ މެޗެއް ކުޅޭއިރު، މިދިޔަ ހޮނިހިރު ދުވަހު ގައުމީ ޓީމުން ވަނީ ހދ. ކުޅުދުއްފުށި ސިޓީގައިވެސް ޚާއްސަ މެޗެއް ކުޅެފައެވެ. އެ މެޗަކީ ކުޅުދުއްފުށީގައި ސަރުކާރުގެ ފަރާތުން އެޅި ފެންވަރު ރަނގަޅު ޓާފް ދަނޑު ހުޅުވުމުގެ ގޮތުން ކުޅުނު މެޗެކެވެ. އެ މެޗުން ގައުމީ ޓީމު މޮޅުވީ ފަސޭހަކަމާއެކު 6-0 ގެ ނަތީޖާއަކުންނެވެ.

ކުޅުދުއްފުށީ ޓާފް ދަނޑު ރަސްމީކޮށް ހުޅުވުމަށް ހޮނިހިރު ދުވަހުގެ ހަވީރު ގައުމީ ޓީމުން ޚާއްސަ މެޗެއް ކުޅުނުއިރު، އެ މެޗަކީ މާލޭގައި ކުރިއަށްދިޔަ ސާފް ޗެމްޕިއަންޝިޕަށްފަހު ގައުމީ ޓީމުން ކުޅުނު ފުރަތަަމަ މެޗެވެ.