ކްލައިމެޓް ޗޭންޖާ ގުޅޭ ކަރިކިއުލަމެއް އެކުލަވާލުމުގެ މަސައްކަތު ބައްދަލުވުމެއް އައްޑޫގައި ފަށައިފި
25 އޮކްޓޯބަރު 2021 | ހޯމަ 05:58މިއީ ޔޫރަޕިއަން ޔޫނިއަން ގެ އެހީ އާއެކު ކުރިއަށް ދާ ޕްރޮޖެކްޓެއް
ކްލައިމެޓް ޗޭންޖް އެންޑް ރެޒިލިއެންސް ވޯކްޝޮޕްގެ ތެރެއިން
މޫސުމަށް އަންނަ ބަދަލުތައް ދެނެގަނެ އެކަމަށް ޒުވާނުން އަހުލުވެރިކުރުމާގުޅޭ ކަރިކިއުލަމްއެއް އެކުލަވާލުމުގެ މަސައްކަތު ބައްދަލުވުމެއް އެމްއެންޔޫއިން ފަށައިފިއެވެ. އާދީއްތަ ދުވަހު އައްޑޫސިޓީ ހިތަދޫ ކެމްޕަހުގައި ފެށި މި ވޯކްޝޮޕް ދެދުވަހަށް ކުރިއަށް ދާނެއެވެ. މިއީ އެމްއެންޔޫއާއި އޮސްޓްރޭލިއާގެ ޔުނިވަރސިޓީ އޮފް ލީޖް، ޔުނިވަރސިޓީ އޮފް ޕެރިސް އަދި އިކޮނިމިކް ޔުނިވަރސިޓީ އޮފް ބްރަޓިސްލާވާ ގުޅިގެން އެމްއެންޔޫ މާލޭ އަދި ހިތަދޫގައި ކިޔަވައިދެއްވާ ލެކްޗަރާއިންނަށް އަމާޒުކޮށް ހިންގާ ވޯކްޝޮޕެކެވެ.
އިއްޔެ ފެށި މި ވޯކްޝޮޕް ހުޅުވުމުގެ ރަސްމިއްޔާތުގައި ޕްލޭނިން މިނިސްޓްރީގެ ސްޓޭޓް މިނިސްޓަރ ޢަބްދުﷲ ސާދިޤު އާއި އައްޑޫސިޓީގެ މޭޔަރ ޢަލީ ނިޒާރު އާއި ދިވެހިރާއްޖޭގެ ޤައުމީ ޔުނިވަރސިޓީގެ ވައިސް ޗާންސެލަރ ޑރ. މުހައްމަދު ޝަރީފު އާއި ޔުނިވަރސިޓީތަކުގެ ބޭފުޅުންނާއި އަދި އެމްއެންޔޫއާއި ހިތަދޫ ކެމްޕަސްގެ އިސް ބޭފުޅުން ބައިވެރިވެ ވަޑައިގެންނެވިއެވެ.
މޯލްޑިވްސް ޕްރޮޓެކްޓެޑް އޭރިއާ ސިސްޓަމްސް ގެ ދަށުން ޙިމާޔަތް ކުރެވިފައިވާ ނާޒުކު ތިމާވެއްޓެއް އޮތް ނޭޗަރ ޕާކާއި އެނޫނަސް ޤުދުރަތީ ކުޅިތަކާއި އެހެނިހެން ގިނަ ވަސީލަތްތަކެއް ހިމެނޭ އައްޑޫސިޓީގައި މިވޯކްޝޮޕް ކުރިއަށްދާއިރު ބައިވެރިންނަށް ތިމާވެއްޓާ ގުޅުންހުރި ގިނަ ކަންތައްތަކެއް ތަޖުރިބާ ކުރުމަށް ފުރުސަތު ލިބުމާއެކު ކަރިކިއުލަމް އެކުލަވާލުމުގައި ވެސް މުހިއްމު މަޢުލޫމާތުތަކެއް އެއްކުރެވޭނެ ކަމަށް ވޯކްޝޮޕްގައި އިސްކޮށް ޙަރަކާތްތެރިވެ ވަޑައިގަންނަވާ ފާތިމަތު ޝާދިޔާ ވިދާޅުވިއެވެ.
މިހާރުވެސް އެމްއެންޔޫ ގައި އެންވައިރޮމެންޓް މެނޭޖްމަންޓް ޕްރޮގްރާމެއް އޮންނަ އިރު، މިހާރު ކުރެވެމުންދަނީ އެއަށް އިތުރުކުރެވޭ ކްލައިމެޓް ޗޭންޖް އެންޑް އެޑަޕްޓޭޝަން ކަރިކިއުލަމްގެ މަސައްކަތެވެ. ޔޫރަޕިއަން ޔޫނިއަންގެ އެހީގައި 3 އަހަރު ދުވަހުގެ ތެރޭ އެކުލަވާލެވޭ މި ކަރިކިއުލަމް އާއެކު މޫސުމަށް އަންނަ ބަދަލުތަކުގެ ސަބަބުން ދިރިއުޅުމަށް ގެންނާނެ ބަދަލުތަކާއި ތިމާވެއްޓާ ގުޅުންހުރި މާޙައުލެއް ބިނާކުރާނެ ގޮތާއި ފަހުގެ ޓެކްނޮލޮޖީއާއެކު އުޅެން ދަސްކުރާނެ ގޮތުގެ ދިރާސާތަކެއް ހެދިގެންދާނެކަމަށް ޝާދިޔާ ވިދާޅުވިއެވެ.
