ވައިޕާސް ތްރީ އޮން ތްރީ ބާސްކެޓް މުބާރާތް ކާމިޔާބުކަމާއެކު ނިންމާލައިފި

ވައިޕާސް ތްރީ އޮން ތްރީ ބާސްކެޓްބޯޅަ މުބާރާތް ކާމިޔާބުކަމާއެކު ނިންމާލައިފިއެވެ.

ހުޅުމާލޭ އެޗްޑީސީ ކޯޓުގައި މި މަހުގެ 17 ވަނަ ދުވަހުން ފެށިގެން 22 ވަނަ ދުވަހުގެ ނިޔަލަށް ކުރިއަށްދިޔަ މި މުބާރާތުގައި 64 ޓީމަކުން 250 އަށްވުރެ ގިނަ ކުޅުންތެރިން ވަނީ ވާދަކޮށްފައެވެ. އަދި މި މުބާރާތް ކުރިއަށްގެންގޮސްފައިވަނީ 10 އުމުރުފުރާއަކަށް ބަހާލައިގެންނެވެ.

އެގޮތުން މި މުބާރާތުގެ 13 އަހަރުން ދަށުގެ އަންހެން ޑިވިޝަނުގެ ޗެމްޕިއަންކަން ޝޫޓާސްއާ ވާދަކޮށް ސްކައި އިން ހޯދިއިރު، އެ އުމުރުފުރާގެ ފިރިހެން ޑިވިޝަނުގެ ޗެމްޕިއަންކަން ރިމްޝޮޓާ ވާދަކޮށް ހޯދާފައިވަނީ ނެކްސްޓް ޖެންއިންނެވެ. މި މުބާރާތުގެ 15 އަހަރުން ދަށުގެ އަންހެން ޑިވިޝަނުގެ ޗެމްޕިއަންކަން އެންޓްރާއާ ވާދަކޮށް ޕާލްއިން ހޯދާފައިވާއިރު، އާޗާސް ބްލޫއާ ވާދަކޮށް އެ އުމުރުފުރާގެ ފިރިހެން ޑިވިޝަނުގެ ޗެމްޕިއަންކަން ހޯދާފައިވަނީޓީމު އަންސެޓިފައިޑުންނެވެ.

މީގެ އިތުރުން 18 އަހަރުން ދަށުގެ އަންހެން ޑިވިޝަނުގެ ޗެމްޕިއަންކަން އެންއޭ އިން ހޯދީ ކްއަޑްރިޕަލް ބަލިކުރުމަށްފަހުއެވެ. އަދި ރޯޔަލްސްއާ ވާދަކޮށް އެ އުމުރުފުރާގެ ފިރިހެން ޑިވިޝަނުގެ ޗެމްޕިއަންކަން ހޯދީ ފޯއްވަޅިންނެވެ. މި މުބާރާތުގެ 23 އަހަރުން ދަށުގެ އުމުރުފުރާގެ އަންހެން ޑިވިޝަނުގެ ޗެމްޕިއަންކަން ފްރެންޗް ފްރައިސްއާ ވާދަކޮށް ސްވިސްއިން ހޯދިއިރު، ކުލަބު އޯލްސްޓާއާ ވާދަކޮށް އެ އުމުރުފުރާގެ ފިރިހެން ޑިވިޝަނުގެ ޗެމްޕިއަންކަން ހޯދާފައިވަނީ ޖެމީސްއިންނެވެ.

މި މުބާރާތުގެ އޯޕަން ބައިގެ އަންހެން ޑިވިޝަނުގެ ޗެމްޕިއަންކަން ހަސްޓްލާއާ ވާދަކޮށް އައިރިސްއިން ހޯދިއިރު، އޯޕަން ބައިގެ ފިރިހެން ޑިވިޝަނުގެ ޗެމްޕިއަންކަން ކްރިޕްޓަން ބަލިކުރުމަށްފަހު ހޯދާފައިވަނީ ޖެމީސްއެވެ.

ވައިޕާސް ބާސްކެޓްބޯޅަ ކުލަބުން ބުނީ މި މުބާރާތަކީ އެ ކުލަބުން އިންތިޒާމުކުރި ފުރަތަމަ މުބާރާތް ކަމަށާއި، އެހެންކަމުން ކުރިއަށް އޮތްތަނުގައި ބާސްކެޓްބޯޅަ ކުރިއެރުވުމަށާއި، ބާސްކެޓްބޯޅަ ކުޅުންތެރިންނަށް ފުރުސަތުތައް ހޯދައިދިނުމަށް އިތުރު މުބާރާތްތަކެއް ބޭއްވިގެންދާނެ ކަމަށެވެ.