ކ.މާފުށީގައި ކުލަގަދަކޮށް ޒުވާނުންގެ ދުވަސް ފާހަގަކޮށްފިއެވެ.
ޔޫތު އެސޯސިއޭޓާ ހަވާލުވެ ހުންނެވި އިބްރާހިމް ޒަކީ ރާއްޖެއެމްވީއަށް ވިދާޅުވީ ޒުވާނުންނަކީ ގައުމުގެ މުސްތަގުބަލް ކަމަށާއި، އެދުވަސް ކުލަގަދަކޮށް ފާހަގަކޮށް، ޒުވާނުންގެ މަސައްކަތުގެ ވަޒަން ކުރަން ޖެހޭ ކަމަށެވެ. އެހެންކަމުން ޒުވާނުންގެ ދުވަހާއި ގުޅިގެން ގިނަ ހަރަކާތްތައް ކުރިއަށް ގެންދިޔަ ކަމަށާއި، ހުރިހާ ހަރަކާތްތަކަށް ވެސް ޒުވާނުންގެ ފުރިހަމަ އެއްބާރުލުން ލިބިގެން ދިޔަ ކަމަށް ޒަކީ ވިދާޅުވިއެވެ.
ޒަކީ ވިދާޅުވީ ބުރާސްފަތި ދުވަހު މަސް ރޭސް ކުރިއަށް ގެންގޮސްފައިވާ ކަމަށާއި، ހުކުރު ދުވަހު ކެނޯ ރޭހާއި އަދިިވެސް ޒުވާނުންނާއި ގުޅޭ ގިނަ ހަރަކާތްތައް ކުރިއަށްގެން ދިޔަ ކަމަށެވެ. ދެދުވަހަށް ބަހަލައިގެން ޒުވާނުންގެ ދުވަސް ފާހަގަކޮށްފައިވާއިރު، މުބާރާތްތަކުން ވަނަވަނައަށް ދިޔަ މީހުންނަށް އިނާމު ދީފައިވާ ކަމަށް އޭނާ ވިދާޅުވިއެވެ. މީގެ އިތުރުން ބާބަކިޔުއަކާއެކު ލައިވް ބޮޑުބެރުގެ ހަރަކާތްތައްވެސް ކުރިއަށް ދިޔައެވެ.
ޒުވާނުންނަކީ ވަރަށް ބުރަކޮށް މަސައްކަތް ކުރާ ބައެއްކަން ފާހަގަކުރައްވައި ޒަކީ ވިދާޅުވީ އެރަށުގެ ގިނަ ޒުވާނުންނަކީ ގެސްޓްހައުސް ވިޔަފާރީގައި ވަރަށް ބުރަކޮށް މަސައްކަތް ކުރާ ބައެއް ކަމަށެވެ. ބުރަކޮށް އުޅެމުން ވެސް މިދުވަހުގެ ހަރަކާތްތަކުގައި ބައިވެރިވުމުން އެކަން ޒަކީ ފާހަގަކުރެއްވިއެވެ.
މި ހަރަކާތްތަކުގެ ސަބަބުން ގުޅުންތައް ބަދަހިވެގެންދާއިރު މިފަދަ ހަރަކާތްތައް ކުރިއަށް ގެންދިއުމަށް ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ލިބޭ ކަމަށާއި، ކުރިއަށް އޮތްތަނުގައި ވެސް މިފަދަ ހަރަކާތްތައް ކުރިއަށް ގެންދާނެ ކަމަށް ޒަކީ ވިދާޅުވިއެވެ.
