އިދިކޮޅު ޕީޕީއެމް ޕީއެންސީ ކޯލިޝަނުން ހުކުރު ދުވަހު މާލެ ސަރަހައްދުގައި ހިނގާލުމުގެ ހަރަކާތެއް ބާއްވައިފިއެވެ.
ރަތް ކުލައިގެ ޓީޝާޓު ލައިގެން ގައުމީ ދިދައާއި، އިންޑިއާ ސިފައިން ބޭލުމަށް ގޮވާލާ ލިޔުންތަކާއެކު އިދިކޮޅުގެ ގިނަ ބަޔަކު ވަނީ ހުކުރު ދުވަހު ހަވީރު މާލޭގެ މަގުތަކުގައި ހިނގާލުމެއް ބާއްވާފައެވެ.
"މިނިވަންކަމުގެ ހިނގާލުން" މި ނަމުގައި ކުރިއަށްގެންދިޔަ މި ހަރަކާތަކީ މި ސަރުކާރުގެ ސިޔާސަތުތަކުގެ ސަބަބުން ރާއްޖޭގެ ސިޔާދަތީ މިނިވަންކަމަށް އަސަރު ކުރަމުންދާކަމަށް ބުނެ ހިންގި ހަރަކާތެކެވެ.
މި ހިނގާލުމުގައި ޕީޕީއެމް-ޕީއެންސީގެ ލީޑަރޝިޕްގެ އިސް މީހުން ހަރަކާތްތެރި ވެފައިވާއިރު، މާލޭގެ އެކި މަގުތަކުގައި ހިނގާލުން ކުރިއަށް ގެންގޮސްފައިވެއެވެ. އެގޮތުން ލީޑަރޝިޕްގެ އިސް ފަރާތްތަކުން ވަނީ "އިންޑިއަން މިލިޓަރީ އައުޓް" ޖަހާފައިވާ ލިޔުންތައް ހިފައިގެން ހިނގާލުމުގައި ބައިވެރިވެފައެވެ.
އިދިކޮޅު ކޯލިޝަނުގެ ފަރާތުން ދޭތެރެ ދޭތެރެއިން ގެންދަނީ ސިލްސިލާ މުޒާހަރާތައް ކުރަމުންނެވެ. އެކި ނަންނަމުގައި ކުރިއަށްގެންދާ މުޒާހަރާތަކުގައި މައިގަނޑު ގޮތެއްގައި ގޮވަނީ މަނީ ލޯންޑަރިންގެ ކުށް ސާބިތުވެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން މިނިވަން ކުރުމަށެވެ.
ފަހަކަށް އައިސް އިދިކޮޅުން ކުރިއަށްގެންދާ މުޒާހަރާތަކާއި އެއްވުންތަކުގައި ގައުމީ ދިދައާއި ރަތްކުލައިގެ ޓީޝާޓް ބޭނުންކުރާއިރު، މައިގަނޑު ޝިއާރެއްގެ ގޮތުގައި ބޭނުންކުރަނީ "މިނިވަންކަމުގެ ދިފާއުގައި ދިވެހީން" މިއެވެ.
އިދިކޮޅުން އެންމެ ފުރަތަމަ އެއްވުންތައް ބާއްވަން ފަށާފައިވަނީ "އިންޑިއާ އައުޓް"ގެ ނަމުގައެވެ. އެއަށްފަހު ކޮވިޝީލްޑް ވެކްސިން ޖެހުމާ ދެކޮޅަށްވެސް އަޑުއުފުލާފައިވާއިރު، ފިޔަވަތި އިސްލާހުކުރުމާއި ތަހުގީގުތައް އަވަސް ކުރުމާއި ދީނުގެ ދިފާއުގެ ނަމުގައިވެސް ތަފާތު އެކި އެއްވުންތައް ބާއްވާފައިވެއެވެ. ނަމަވެސް މިއިން ކޮންމެ އެއްވުމެއްގައިވެސް މައިގަނޑު ގޮތެއްގައި ގޮވާލާފައިވަނީ ރައީސް ޔާމީނު މިނިވަން ކުރުމަށެވެ.
