ގުޅީފަޅުގައި ކޮމާޝަލް ހާބަރު ހެދިގެންދާއިރު މަގަތު ފާލަމަށް ތިން ބޯޓު ގެނެވޭނެ: ޝާހިދު
ސަރުކާރުގެ ތަސައްވަރަކީ ގުޅީފަޅަކީ މާލޭގެ މޭޖަރ ކޮމާޝަލް ޕޯޓަކަށްވުން
އެމްޕީއެލްގެ ސީއީއޯ ޝާހިދު އަލީ
ގުޅީފަޅުގައި ކޮމާޝަލް ހާބަރު ހެދިގެންދާއިރު މަގަތު ފާލަމަށް ތިން ބޯޓު ގެނެވޭނެ ކަަމަށް މޯލްޑިވްސް ޕޯޓްސް ލިމިޑެޓްގެ ސީއީއޯ ޝާހިދު ޢަލީ ވިދާޅުވެއްޖެއެވެ.
ރާއްޖެއެމްވީއަށް ދެއްވި ހާއްސަ އިންޓަވިއުއެއްގައި ޝާހިދު ވިދާޅުވީ މިހާރު އޮތީ އެންމެ ބޯޓެއް ކަމަށާއި ނަމަވެސް ގުޅީފަޅުގައި ކޮމާޝަލް ހާބަރު ހެދިގެންދާއިރު މަގަތު ފާލަމަށް ތިން ބޯޓު ގެނެވޭނެ ކަމަށް ޝާހިދު ވިދާޅުވިއެވެ. ގުޅީފަޅުގައި ކޮމާޝަލް ހާބަރު ހެދިގެންދާއިރު ސަރުކާރުގެ ތަސައްވަރަކީ ގުޅީފަޅަކީ މާލޭގެ މޭޖަރ ކޮމާޝަލް ޕޯޓަކަށްވުން ކަަމަށް ވެސް ވިދާޅުވިއެވެ.
އެންމެ ބޮޑު ލައިނަރ ސައިޒްގެ ބޯޓު ފަހަރަށް ވެސް ކައިރި ކުރެވޭނެ ކަމަށް ވެސް ޝާހިދު ވިދާޅުވިއެވެ. މިހާރުގެ ހާލަތު ހުރިގޮތުން އެންމެ ބޮޑު ބޯޓެއް އަޔަސް ޚިދުމަތްދޭން ޖެހެނީ އެންކަރުގައި ބާއްވައިގެންކަން ފާހަގަކުރައްވައި ޝާހިދު ވިދާޅުވީ އެކަމަށް ވަރަށް ވަގުތު ހޭދަވާ ކަމަށެވެ. އަދި ގުޅީފަޅުގައި ކޮމާޝަލް ހާބަރު ހެދިގެންދާއިރު އެންމެ ޒާމަނީ ވަސީލަތްތައް ހުންނާނެ ކަމަށާއި މިހާރު ތިން ދުވަހުން ހުސް ކުރެވޭ ބޯޓު 12 ގަޑިއިރު ނުވަތަ ލަސްވެގެން 24 ގަޑިއިރު ތެރޭގައި ހުސް ކުރެވޭނެ ކަމަށް ވެސް ޝާހިދު ވިދާޅުވިއެވެ. އަދި މިކަމުގެ ސަބަބުން މަސައްކަތަށް އިތުރު ހަލުވި ކަމެއް އަންނާނެ ކަމަށް ވިދާޅުވިއެވެ.
މި މަޝްރޫއުގެ ޓެންޑަރ ކަރުދާސްތައް ތައްޔާރުކުރުމުގެ މަސައްކަތް ކަމާގުޅޭ މިނިސްޓްރީތަކުން ކުރަމުންދާ ކަމަށް ޝާހިދު ވިދާޅުވިއެވެ. ގުޅީފަޅު ބަނދަރު ތަރައްޤީ ކުރަނީ ކުރިއަތް އޮތް 30 އަހަރުގެ ޕްލޭނަކަށް ކަަމަށާއި އެ 30 އަހަރު ވެސް ތަނުގެ ކެޕޭސިޓީއަށް ލިމިޓް ނުވާނެ ގޮތަށް ބަލައިގެން ކަަމަށް ވެސް ވަނީ ފާހަގަކުރައްވާފައެވެ.
ގްރޭޓަރ މާލޭ ކަނެކްޓިވިޓީ ބްރިޖްގެ މަޝްރޫޢުގެ ދަށުން މާލެ-ވިލިމާލެ-ގުޅިފަޅު އަދި ތިލަފުށި ގުޅާލުމަށްވަނީ ނިންމާފައެވެ. މިޕްރޮޖެކްޓާއެކު ގްރޭޓަރ މާލެ ސަރަޙައްދުން އެންމެ ބޮޑު ބަދަލެއް އަންނާނީ ގުޅީފަޅަށެވެ. ބޯހިޔާވަހިކަމުގެ މަޝްރޫޢުތަކާއެކު، ވިޔަފާރީގެ ގޮތުން ވެސް ގުޅީފަޅުވެގެންދާނީ ސަރަޙައްދުގެ އިޤްތިޞާދީ މައި ހަބަށެވެ. މިބޮޑު މަންޒަރު ގުޅެނީ ގްރޭޓަރ މާލެ ކަނެކްވިޓީ ބްރިޖްގެ މަޝްރޫޢާއެވެ. ގުޅީފަޅާއި ބްރިޖް ގުޅާލާ ސަރަޙައްދު ހިމެނޭހެން 6 މިލިއަން ކިއުބިކް މީޓަރުގެ ސަރަޙައްދެއް ހިއްކުމުގެ މަސައްކަތް ނެދަލޭންޑްސްގެ ބޮސްކާލިސް ކުންފުންޏާ ހަވާލުކޮށްގެންވަނީ ކުރިއަށްގެންގޮސްފައެވެ.
ގުޅީފަޅު ތަރައްޤީކުރުމުގެ އެންމެ ބޮޑު މަޤްޞަދަކީ މާލޭގެ ވިޔަފާރި ބަނދަރު ގުޅީފަޅަށް ބަދަލުކުރުމެވެ. މި މަސައްކަތް ކުރިއަށްގެންދިއުމަށް މިއަހަރުގެ ބަޖެޓުގައި 400 މިލިއަނަށްވުރެ ގިނަ ރުފިޔާ ހިމަނާފައިވެއެވެ. ސަރުކާރުގެ ޢަމާޒަކީ ޖާގައިގެ ގޮތުން ތަނަވަސް ޒަމާނީ، އަދި ބައިނަލްއަޤްވާމީ ވިޔަފާރި ބަނދަރެއްގެގޮތުގައި މިބަނދަރު ހެދުމެވެ. އަދި މާލޭގައި މި ޚިދުމަތް ދިނުމަށް އޮތް ދަތިތަކަށް ހައްލެއް ހޯދައިދިނުމެވެ. ޓްރާންޝިޕްމަންޓް ބަނދަރުގެ މަސައްކަތް ނިމުމުން ބަނދަރު ހިންގުމުގެ މަސައްކަތް ހަވާލުކުރާނީ މިހާރުވެސް މާލެ ވިޔަފާރި ބަނދަރު ހިންގަމުން އަންނަ މޯލްޑިވްސް ޕޯޓްސް ލިމިޓެޑްއާއެވެ.
ގުޅީފަޅުގައި ބައިނަލްއަގުވާމީ ވިޔަފާރި ބަނދަރެއް އެޅުމުގެ މަޝްރޫއަކީ މާލޭގެ ބަނދަރުތަކުގެ ޖާގައިގެ ދަތިކަމުގެ ސަބަބުން ޚިދުމަތް ހޯދާ މީހުންނަށް ދިމާވާ ދަތިތައް ހައްލު ކުރުމަށްޓަކައި ކުރިއަށް ގެންދިޔުމަށް ހަމަޖެހިފައިވާ ޕްރޮޖެކްޓެކެވެ. މިގޮތުން، ސަރުކާރުން ނިންމާފައިވަނީ 2023 ވަނަ އަހަރު ގުޅީފަޅު ޕޯރޓް ހުޅުވުމުން އެ ސަރަހައްދަށް މާލޭ ކޮމާރޝަލް ހާބަރު، ނޯތު ހާބަރު، އަދި ޓީ ޖެޓީ ސަރަހައްދުގެ ބައެއް ހިދުމަތްތަކާއި މަސައްކަތްތައް ބަދަލު ކުރުމަށެވެ. މި ޕްރޮޖެކްޓާއެކު މާލޭގެ ބަނދަރުގެ ތޮއްޖެހުމުގެ މައްސަލައަށް ބޮޑު ޙައްލެއް ލިބޭނެއެވެ. އަދި ވިޔަފާރިވެރިންނަށް ވެސް އަވަސް ޚިދުމަތާއެކު އޭގެ ފަސޭހަތައް ލިބޭނެއެވެ.
ގުޅީފަޅު ތަރައްގީވަމުން އަންނައިރު އެތަނުގައި ރޭސް ޖެހޭނެ އިންތިޒާމް ހަމަޖެއްސުމަށް މަސައްކަތް ކުރަމުން އަންނަކަމަށް ޔޫތް މިނިސްޓަރ އަހުމަދު މަހުލޫފް ވަނީ ވިދާޅުވެފައެވެ. ރާއްޖޭގައި ވެސް ރޭސިން ކުރިއެރުވުމަށް އެކިއިރު އެކި މަސައްކަތްކޮށްފައިވާކަން ފާހަގަކޮށްލެވެއެވެ. އެގޮތުން މިދިޔަ ސަރުކާރުންވަނީ ހުޅުމާލޭގައި ރޭސިން ޓްރެކެއް ހެދުމާއި ބެހޭގޮތުން ވާހަކަދައްކާފައެވެ. އެހެންނަމަވެސް، މި މަސައްކަތް ކުރިއަށްދާގޮތެއް ނުވިއެވެ.
