ގުޑުގުޑާ ދޫނި (ފްލެމިންގޯ) ހިފި މީހަކު ހޯދައި، އެ މީހާ ގެންގުޅުނު ދޫނި އަތުލާފައިވާ ކަމަށް އެންވަޔަރްމެންޓް ޕްރޮޓެކްޝަން އެޖެންސީ (އީޕީއޭ)އިން ބުނެފިއެވެ.

އިޕީއޭއިން ބުނީ ބުރާސްފަތި ދުވަހު ހއ. ބާރަށުން ފްލެމިންގޯއެއް ހިފައި ވިއްކަން އުޅުނު މީހަކު ހޯދިފައިވާ ކަމަށާއި، އެ ފްލެމިންގޯއަށް މިހާރު ހިމާޔަތް ދީފައިވާ ކަމަށެވެ. އަދި އޭގެ ފިޔަގަނޑު ކޮށާލާފައިވާކަން އީޕީއޭއިން ފާހަގަކޮށްފައިވެއެވެ.

މީގެ އިތުރުން އީޕީއޭއިން ބުނީ ފްލެމިންގޯ ހިފައި، ވިއްކަން އުޅުނު މީހާ ދެނެގަނެވިފައިވާއިރު، ކުރިއަށް އޮތްތަނުގައި އެމީހާގެ ބަޔާން ނަގައި ފިޔަވަޅު އަޅާނެ ކަމަށެވެ.

ހިޖުރަ ކުރުމުގެ ތެރޭގައި ރާއްޖެ އައި ފްލެމިންގޯތަކެއް ރާއްޖޭގެ އެކިއެކި ރަށްރަށަށް ދަނީ ޖައްސަމުންނެވެ. އެގޮތުން ހއ. ބާރަށަށް ދިޔަ ފްލެމިންގޯތަކެއް ހިފައި އެއިން ދޫންޏެއް 30،000 ރުފިޔާއަށް ވިއްކަން ޖެހުމުން މައްސަލަ ހޫނުވެފައިވެއެވެ. އެކަމާ ގުޅިގެން އީޕީއޭއިން ބުނެފައިވަނީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހިމާޔަތްކުރެވިފައިވާ، ހިޖުރަކުރާ ދޫނިތައް ހިފައި ހައްޔަރުކޮށް ގޯނާކުރާ މީހުން ހުއްޓުވުމަށާއި، އަދި މިފަދަ މީހުންނަށް ފާރަވެރިވާން ޖެހޭ ކަމަށެވެ. އެހެންކަމުން މިފަދަ ކަންކަން ކުރާ މީހުންގެ މައުލޫމާތު (ދޫނި ހިފައި، ވިއްކާ ފަރާތުގެ ނަން، ގޭގެ ނަމާއި އަތޮޅާއި ރަށް، އަދި ހިފާވިއްކާ ދޫނީގެ ބާވަތާއި އަދަދު) އަދި ފޮޓޯ މި އެޖެންސީގެ ހޮޓްލައިން ނަންބަރު 7980379ށް މެސެޖުކޮށް ނުވަތަ [email protected] އަށް އީމެއިލް ކޮށްދިނުމަށް އީޕީއޭއިން އެދިފައިވެއެވެ.

ހިމާޔަތްކުރެވިފައިވާ ދޫނިތައް ހިފާ މީހުންނާއި، އަދި މިދޫނިތައް ގަނެވިއްކާ ވިޔަފާރި ކުރަމުންދާ މީހުންނާމެދު "ތިމާވެއްޓަށްދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދު" އާއި "ގުދުރަތީ ގޮތުގައި ނުވަތަ ޠަބީއީ ގޮތުގައި ހިމާޔަތްކޮށް ރައްކައުތެރިކުރާ ދިރޭ ތަކެއްޗާބެހޭ ގަވާއިދު"ގެ ދަށުން ޖޫރިމަނާ ކުރެވޭނެ އެވެ.